الاثنين، 17 يناير 2011

:(







يعني إيه قوميه عربيه ؟
يعني نعرف أخبار الثورة التونسيه من حليفة الصهيونيه
يعني إيه إستهبال ؟
يعني (الحزب) (يوصي) بعدم نشر أي تصريحات حكوميه سلبيه أم إيجابيه
يعني إيه إستسهال ؟
يعني وزير التربيه والتعليم ينزل يقف مع المتظاهرين ويمضي تعهد علي نفسه بعدم إتخاذ قرارات نقل تعسفيه
يعني إيه إستقرار ؟
يعني تجاهل وتناسي ونسيان علشان نأكل العيال
يعني إيه تونس ؟
يعني تسليم من فسدة لفسدة
يعني إيه تونس ؟
يعني ننسي الفتنه الطائفيه
يعني إيه بطولة حوض النيل ؟
يعني ننسي تونس
يعني إيه مصر ؟
يعني أي بطولة في كرة القدم
يعني إيه وطنيه ؟
يعني فوق الـ100 ألف متفرج رافعين أعلام مصر وأغاني وطنيه وعلاء وجمال وهتافات بحب مصر
يعني إيه كورة ؟
يعني آلاف الفقراء جايين من كل مكان وبيدفعوا فلوس علشان يتفرجوا علي حفنة مليونيرات
يعني إيه وطنيه ؟
يعني أحرق نفسي علشان آخد حقي
يعني إيه إنتماء ؟
يعني أسيب اللي إتحرق يولع وأروح أتفرج عالماتش
يعني إيه ملل ؟
يعني (برضو) يطلع مريض نفسيا
يعني إيه ثقه وجبروت ؟
يعني صرف إعانات وخفض أسعار وتأجيل ضرائب جديده لحين إنتهاء الموجه
يعني إيه وطنيه ؟
يعني سنيه وصوفيه وشيعيه وقرآنيه وأخوانيه وبهائيه ومسيحيه ويساريه وناصريه وبدو وقبليه وتغيير وغد وتجمع وبلاوي زرقه
يعني إيه إنتماء ؟
يعني إنتماء للفرقه , ضد الجماعه , لسرقة الوطن
يعني إيه حرية ؟
يعني إسم تمثال في أمريكا
يعني إيه ديموقراطيه ؟
يعني مادة عمرها ما هتنزل في مناهجنا
يعني إيه حضارة ؟
يعني إعتراف ضمني بإنها إنتهت . . بإنها 7000 سنة . . منذ مولدي وحتي هذه اللحظه
يعني إيه تغيير ؟
يعني كلام وصور أكتر علي الفيس بوك
يعني إيه رجال الوطن ؟
يعني رجل الحزب . . رجل الشارع . . رجل الإنترنت . . ولا أحد يعرف الآخر