الخميس، 23 أغسطس 2012

يحرق ... وسنينه





كتب الكتاب .. يوم أنتظره بفارغ الصبر .. مش للجواز نفسه لا سمح الله .. بل لإختبار قوة إرادتي في تنفيذ قناعاتي .
إختلفت الأقاويل في تفسير الحادث الجلل اللي بيحصل اليوم ده .. ألا وهو توقيع الـ إستغفر الله العظيم – قايمه !
طبعا هنعمل "سكيب" لمظاهر الحب أو محاولة الحب في طريقتين الزواج المعروفين ونتجاهل ضحكات ووعود الطمأنينه والأمان والثقه وندخل في الجد .
" يعني غلطة أهلي أنهم عايزين يأمّنوني " .. فيه لسه حد بيقول الجمله دي حد يطمّنّي ؟؟

من غير رغي .. هعرض آراء بعض الفئات ورؤيتهم للموضوع ككل قبل ما نركز في القايمه .

الولاد ، المِن ماشاء الله : طبعا عايزين شبكه بمبلغ متواضع .. عايزين شقه إيجار .. ومش عايزين مهر أو مؤخر .. وفيه منهم – مش كلهم للأسف – مش عايزين قايمه
البنات ، الجيرلز عشان ما بيكبروش أبدا : عايزين شبكه غاليه (إشمعني) .. عايزين مهر أو مؤخر .. عايزين قايمه تضمن حقهم .. عايزين شقه تمليك وإن تظاهروا أو قبلوا بالعكس .
الأهل الله يباركلهم : للبنت عايزين كل حاجه .. وللولد مش عايزين أي حاجه

من غير فتي .. هعرض برضو تقرير الشرع في موضوعين متشابكين "المهر والقايمه" ، والفتوي نقلا عن الدكتور علي جمعه من دار الإفتاء المصريه ..

قال الله تعالي : (وَآتوا النِّساء صَدقاتِهِنّ نِحلَةً فإن طِبنَ لَكُم عَن شَئٍ مّنهُ نَفسًا فكُلوهُ هَنيئاً مَريئاً) البقرة .
وقوله تعالي : ( والمُحصناتُ من النِّساءِ إلا مَلكَت أيمَانُكُم كتابَ اللهِ عليكُم وأُحِلَّ لكم ما وراء ذلكم أن تبتغوا بأموالِكم مُحصِنينَ غيرَ مُسافِحينَ فما إستمتعتم به منهُن فآتوهُنّ أجورَهُنّ فريضَةً ولا جُناحَ عليكُم فيما تَراضَيتُم به مِن بَعدِ الفريضَةِ إنّ الله كانَ عليمًا حكيمًا ) النساء .
"قرر الشرع حقوقا للمرأة معنوية ومالية وجعل لها ذمتها الماليه الخاصه وفرض لها الصداق ولها حق التصرف فيه ، وإذا ما قامت المرأة بإعداد عش الزوجيه بمقدم صداقها سواء أمهرها الزوج الصداق نقدا أو قدمه إليها في صورة جهاز أعده لعش الزوجيه فيكون هذا الجهاز ملكا للزوجه ملكا تاما بالدخول ومالكه لنصفه بالعقد وبدون دخول"

طبعا مش هجيب سيرة رأي القانون لأنه بيتكلم بس عن "إيه العمل في حالة الطلاق؟" .. إحنا لسه عالبَر هنا .
دلوقتي الشرع بيقول إن الزوجه ، العفش بيبقي ملك ليها ملكا تاما في حالة إن الزوج مدفعش مهر .. تمام ، ولا هفتح بُقي !
وبعد كده العُرف – الله يحرقه – بيقول إن في ظل إنعدام الثقه حول العالم فأهل العروسه بيخللو العريس يمضي علي قايمه بالعفش عشان ممكن يبيعه كنوع من الغلاسه ويقول معرفكوش .. ممكن برضو !

طيب .. نرجع بقي من الأول كده تاني معلش وناخد حاجه حاجه ..

الشبكه : عُرف
المهر : شرع
المؤخر : عُرف
القايمه : عُرف
الشقه (التمليك) : عُرف
راح فين الشرع !!

للأسف لما بسأل ناس كتير عن إيه سبب القايمه ، يكون الرد :عشان الزوجه تضمن حقها ، بسأل طب هو إيه حقها ده ؟ .. يكون الرد : العفش بتاعها
قعدت أفكر .. طب إيه اللي خللي العفش يبقي بتاعها ؟
لقيت ناس بتقول إن في الأصل زمان أيام ما كان فيه بني آدمين في مصر كانوا بيدفعوا مهر للعروسه ، بعد كده الحاله إتدهورت والعريس بقي بيجيب العفش بديل للمهر ، دلوقتي الحاله إنهارت والعروسه بقت بتتنازل أكتر وبتشارك في العفش .. ناس طيبين قوي يا خال !
ناس تانيه – رجاله وياللعجب – قالوا إن العفش ده تعويضا عن حالتها المعنوية السيئة في حالة الطلاق .. رغم إني شايف تساوي الحالتين بس مش موضوعنا .
طيب .. بما إن العفش – علي حد قولهم – بديل للمهر ، إيه تعريفهم للشبكه ؟
هتطلع طنط دلوقتي – أي طنط – وتقوللي الشبكه دي بقي هديه كده العريس يقدّر بيها غلاوة العروسه عنده !!!! .. وحياة طنط !!

طبعا كل ده خرف .. القرآن الكريم مذكرش غير كلمة واحدة : "الصــــــــداق" ، أي المهر .
وحيث إن العُرف – الله يحرقه تاني – جري علي إن السيد المؤخر هو المهر حين يجري تأخيره لما يحصل طلاق إن شاء الله ، إذن المهر ، هو المؤخر ، هو الصداق ، هو ما يتم تقديمه للعروسه أو أهلها ، أي هو الشبكه ، أي نعم !
إذن : المهر = الشبكه = المؤخر   .. لا يجوز الجمع بينهم ، نفسي أكون ما بقولش جديد !
إذن برضو : لما سيادتك كعريس بتدفع "شبكه" يبقي ما تِنطسّش في نظرك وتمضي علي مؤخر وتقول إنه مهر جري تأخيره ! .. خلصنا من دي ؟
بالنسبه للعفش والقايمه والذي منه .. طبعا دلوقتي يا شابه إنتي خدتي مهرك "شبكه" وباقيلك من الشرع عند جوزك شقه وعفش ، أيوه ، شقه وعفش ، بالكامل .

الزوج شرعا عليه يوفر السكن (إيجار أو تمليك) ، وعليه يفرشه بالكامل علي حسابه .. وفي هذا رسالتين ..
أولا : شرعا لا يحق للزوجه مطالبة زوجها بالعفش في حالة الطلاق إذا طبق الشرع بحذافيره ، لأنه هو اللي هيبقي جايبه كله ، وماجابوش عوضا عن مهر ولا حاجه لأنه جاب شبكه ، وبالتالي : نـــــو قايمه .
ثانيا : شرعا وواقعيا وإنسانيا وكل حاجه ، لا يحق للزوجه مطالبة زوجها بإشتراطات خاصه في نوع وأسعار العفش .. إتقوا الله !
فيه رأي (أنثوي) هيقول طب ما أنا هدفع معاه عشان نجيب عفش كويس – وقبل ما أنطق هتقول – بس  أكتب قايمه عشان اضمن "حقي" .
هرد أقول : وماله حقك عليا أنا ، بس تكتبي في القايمه اللي انتي إشتريتيه بس ، أيوه ، لأنه دفعلك مهر ، أو مهر في صورة شبكه .

يبقي خلاصة الكلام للرجاله :
لو هتجيب شبكه ، إوعي تدفع مهر أو تكتب مؤخر
لو هتجيب العفش كله ، إوعي تكتب قايمه
لو هتجيب نص العفش ، إكتب قايمه بالنص التاني بس ، بس إقراها كويس وحياة والدك !
لو سيادتك حاليا مضيت القايمة بالفعل وفيها مؤخر وجبت شبكة ، عايز أقولك إنك إتنصب عليك ، صحيح مفيش حل ولو حصل طلاق هتدفع المؤخر وترجع العفش كله ، إذا عرفت أصلا ! .. بس عايزك تعرف إن أهل طليقتك إن شاء الله ، قبلو علي نفسهم حاجه مش من حقهم وهي المؤخر ، ونص العفش بتاعك .. بس الصراحه ، الغلطه غلطتك .
رغم إن الشرع يكسب في رأيي ومش محتاج أعقّب تاني ، بس كلمة الثقة بتزن علي وداني من كتر ما بسمعها .. الخلاصه ، الزوج اللي مش واثقين فيه إنه يرجع عفشنا ، ما نثقش فيه إنه يعاملنا معاملة كويسه ، أو إنه يودّ أهلنا ، أو إنه يحبنا ، أو إنه يربي عيالنا ، أو أو ..
ملحوظه علي الهامش : إزاي يا زوج تقبل علي نفسك إنك تمضي علي وصل أمانه "قايمه" ؟؟ .. لو مش شايفينك أمين يبقي بلاش منك !
وإنتي ، إزاي يا زوجه تقبلي علي نفسك لو جوزك كارهك يبقي عايش معاكي عشان بس خايف يتحبس ؟؟ .. لو مفيش حب يبقي بلاش منك !
وإنتو يا أهل ، إنتوا إرتضيتو تجيبو بتمن الشبكه – ضمنيا – جزء من العفش ، تاخدو مؤخر علي أي أساس ! وتاخدو العفش اللي جابه العريس اللي تمنه أضعاف الشبكه علي أي أساس !! .. "كل جسد نبت من سحت فالنار أولى به" (حديث شريف)

طبعا كل ده كلام في الهوا عشان الأهالي بتوع بنتي مش أقل من أختها أم شبكه بأربعين ألف ، ومش أقل من بنت عمها اللي كتبت قايمه بمتين ألف ، ومش أقل من بنت خالتها اللي ساكنه في تمليك !!

وأخيرا ..

لو فيه عروسه بشبكه حنينه ومن غير قايمه ولا مؤخر ومتكلمنيش في العفش اللي هجيبه ولا شقتي فين وإزاي .. وتكون "جذّابه"- "ليّا".. أنا شاري J



9 التعليقات:

غير معرف يقول...

مجتمع قذر ، و افكار متخلفة و بالية ، و الحل الوحيد إنك تعيش حياتك و تقضيها ، لحد ماتلاقي البني آدمه اللي تفهم ، و.على الأرجح هاتكونوا تجاوزتوا الثلاثين ، هي هاتقبل عشان الخوف من العنوسة ، و انت هايكون معاك من المال مايكفي لشبكة و شقه تمليك و مهر و فرح أسطوري كمان

يلعن ديك ابو دي بلد على ده مجتمع !!

FAW يقول...

غير معرف ليه بس ما تعرّفني :)

آخر جملتين حقيقيتين وهيحصلوا غالبا :)

تحياتي ..

غير معرف يقول...

ههههههههههههه افكار غير معرف تفطس ضحك وف نفس الوقت مستفز..
ماعلينا ..عجبني جداااا موضوووعك...حاجة شرعية وتماااااااااام وانا بجد اول مرة اعرف بحاجات كتير في بوستك...
واتمنى ان الناس والمجتمع كله يفهمها ...
تحياتي وودي وان شاء الله تكون عينك كويسة بعد العملية ..

شريف القاضى يقول...

لخبطتنى معاك يا درش ...

بس للاسف معظم كلامك صحيح ميه فى الميه ...
الجواز اتحول لتجارة -مشروع - بيعة - سميها زى ما أنت عاوز ..
كل طرف حريص انه يستفيد أقصى إستفادها من الطرف التانى ..
للاسف الكلام اللى انت بتقوله على الشرع والعرف أتحدى يكون بيطبقه غير 5 فى المية من المجتمع اللى هو متمثل فى السلفيين على أقصى تقدير ..
أما الباقى فبيمشى على الاصول
والتقليد وشبكة بنت عمتها
وعفش بنت خالتها و مؤخر بنت خالتها ..
للاسف أعرف واحد كان هيفركش الجوازة قبل فرحة بأسبوع عشان المؤخر هو عاوز مبلغ وهما عاوزين ضعفه ..
وهو أصلا ما كنش مقتنع بشرعية المؤخر بس ما قدرش يقنع أهل العروسة بالشرع .. كلمنى عن حقوق الزوجة و ما تكلمنيش على الدين والشرع لما الامور بتوصل للفلوس ..!!

تحياتى ومفتقدك

FAW يقول...

amina

شكرا جدا لقراءتك الموضوع ومبسوط إنه عجبك ومبسوط أكتر إني ضفتلك معلومة ولو بسيطه

بدعي معاكي حد يستوعب

عملية إيه !!

تحياتي .. :)

FAW يقول...

يا دكتور

السلفيين فعلا منهم كتير بيطبق الشرع ، بس بيطبقوه في إنهم مابيعملوش فرح و"معازف" ، إنما لو معاهم فلوس بيجيبو شبكه ويكتبوا قايمه ومؤخر عادي جدا ، مش هقول كلهم طبعا بس هم في دي زينا عادي

بجد بكره كلمة العرف وفكرتني كمان قد ايه بكره كلمة الأصول ، هو ايه أصله ده !

أنا أعرف طلق مرتين بعد كتب الكتاب عشان القايمه !

حقوق الزوجه ، حقوق طبقا لإيه يعني ! كلمة حقوق دي مستفزة جدا ! .. طبعا كلامي عالماديات المبتكرة .

منور يا باشا وخلينا نشوفك :)

ميرام يقول...

:D
وحيث اني مقتنعه بكل الكلام الي فوق دا بشكل مجمل مش تفصيلي
مصر كلها مقتنعه بيه by the way D: D: D:
لكن انا مش هطبقه ..
لأنك بنفس المبدأ هيتقالك ياواد يامؤمن D:
اشمعنا دي الي مسكت تطبيق الشريعه فيها D: D:
دا كدا المجمل ...
تعالى للتفصيل
مبدايا أتفق معك ان القائمة عرف اجتماعي ...
لكن تعالى اقولك ان المهر دا هو الآتي
البنت بتبقى قاعده كدا يجي عريس يديها مبلغ( يتفق عليه )او يكون في حال الاختلاف ما يدعى ب مهر المثل ..
الواقع ان المهر دا خارج حدود كل الي بيتم تجهيزه على غير المتعارف عليه
يعني دا مبلغ مادي كدا للعروسة (تدلع بيه نفسها ) ( تحتفظ بيه ) تعمل اي حاجة
في المقابل شرعا برضه ..
العريس المفروض بياخدها زي ماهي كدا ويجهز كل متطلبات الحياة اللي يستحب ( انها تكون مكافئة ) لحياتها في بيت أهلها .. ولا تشترط في حال التراضي

لو دا بيحصل فعلياا القايمة دي هتختفي تماما لانها مش هيبقى ليها مدلول
بالتالي .. الي دفع المهر ! مش مفروض يمضي على الي البنت جابته بس !!
بغض النظر عن فكرة انه يمضي اصلا ...
انا بس باكد على ان المهر دا مش عوض عن نص الفرش ...
دا الشق الاول ,,
التاني بقى .. الرسول عليه افضل الصلاة والسلام دعى لقليلات المهر
وفي حالات صحابة تزوجو بخاتم من حديد .. وفي بسورة من القرآن .. والخ
تعالى شوف المجتمع الي الرسول عليه الصلاة والسلام كان عايش فيه ..
وقارنه بالمجتمع دا ...
مجتمع صغير كل شخص معروف نسبه وأصله وفصله وأخلاقه ودينه
لمجتمع يجي فيه عريس تروح تسأل في الشارع تلاقي مصر كلها عارفاه او مش عارفاه (بتحلف بأخلاقه) مشيا بمقولة 0 يابخت من وفق راسين )
وبعد الطلاق تلاقي (نفس المصر) بتقول والله كنت عارف بس خفت اقول انه فيه وفيه :D

المجتمع دا مش غلطان لما تسال وتقول انه مش مؤتمن على بنته وبيتكلم في شوية عفش !!
هو بالتاكيد مش مؤتمن على بنته ويوم ما بيجوز بنته بيبقى كأنه بيسحب كارت حظك او محاكمة في لعبه بنك الحظ D:

والفكرة مش في شوية العفش
بس لان التعسير بيخلي في حسبان لعواقب الأمور أكتر ...
لكن عايز تقنعني ان في ولد خايف يطلق عشان القايمة D:
دا على أساس ان قانوننا المصري ماشاء الله سيف على الرقاب D:
على فكرة انا لحد دلوقتي ومن سوء حظي ماشفتش ولد طلق ودفع مستحقاته D:
حتى الي عندهم اولاد وعليهم نفقه بيطلعو اوراق بغير حالتهم الماديه وبدل مايدفع تلات الاف بيدفع 300 D:
تعالى للحق بقى .. البنت الي عايزة تتطلق بتتخلى عن كل حاجة دي ممكن تدفعله فلوس كمان لأن المنطقي ان الرجل هو المتحكم بزمام الامور
لكن الولد الي عايز يطلق بيرمي كلمة تقع !

يمكن انت بتتكلم على حالتك او على ناس عاقلين ومتربيين
لكن خليك صادق مع نفسك وهتلاقي ان تلات ارباع المجتمع مش كدا !!!
وهتلاقي ان نسبة النفاق والخداع والتجمل والتمثيل في البداية بتختلف تمااما عن مايؤول اليه الأمر بعد التملك D:


وعلى فكرة نظرية بنت خالي وبنت عملفي جالهم كذا دي في الشرع برضه D:
مهر المثل دا هو مهر من تماثل البنت من أهلها من حيث الجمال والمال و ووو
يعني اذا اختلفو في قيمة الصداق دا بيرجعو لمثيلتها من أهلها ...

من ضمن تطبيق الشريعه ان البنت مش ملزمة تطبخ ولا تغسل انما دا تكرما منها لكن في المقابل الراجل ملزم بالنفقه الكاملة كل على سعته :D شوف بقى مين الشاب المصري الجميل الي هيطبق الشرع في دي D: D: D: D:

في الأخر هقولك انه للاسف لأن الزمن دا مادي بحت بقت فيه المادة اغلى واثمن من الأخلاق آلت الامور لما هي عليه

وفي النهاية افتراض سوء النية مش هيضر لو الشخص كويس ...
لكن هيفيد لو الشخص وحش D:

هرجع أكتبلك كتييييييييييييييييير على البوست بتاع الحجاب بس لما اخلص الديزاين الي معايا

FAW يقول...

ميرام

حقك طبعا ماتطبقيش اللي انتي عايزاه :)

بصراحه مكنتش عارف عن مهر المثل ده ، بس عامة ده مع إفتراض تساوي الجمال والمال وو :) ، وده مش واقعي يعني :)

المهر خارج حدود الإتفاق مختلفناش ، أنا بس بقول إنه هوّ هوّ الشبكة مش منفصلين


جزئية إن المهر عوض عن نص الفرش أنا معاكي إنها مش صح ، أنا قلتها كرأي شائع أو يمكن ورد عليّا أنا

معاكي جدا في وضع المجتمع الحالي والفرق بينه وبين السابق ، بس برضو مش شايفه عذر ، أو يعني أنا لما بوجه رسالة للرجال إنهم يلتزموا بالشرع بقول إن ده هيقلل المشاكل دي أصلا ، ومعها طبعا رسالة للجانب الآخر إنه يتهاود شوية :)

بالنسبة للقانون ، أعرف فعلا ناس إتهربوا ، وأعرف برضو واحد - كمثال قريب - مدخلش بيته 5 سنين لحد ما اتنازلت عن القضية اللي عملتها رغم إنها بالفعل أخدت عفشها !

أقولك كمان الشرع بيقول إيه ، الست المفروض ماترضعش ، الزوج يجيب مرضعة ، دي للرجالة .. للستات بقي ، الطفل مش من حقها ، لو حتي بيرضع الزوج يجيبله مرضعة مش مشكلة ، بس مش من حقها تمنعه ولو لحظه عنه

نورتيني جدا ومتأخرة كالعادة

مش هتوريني الديزاين ؟

ميرام يقول...

:D
ان شاء الله هفتح ويب سايت فيه شغلي (:
وأنت اول المدعوين