الاثنين، 11 يوليو 2011

كرتونة الذكريات





بيقولّك واجب تدويني 


من الزميلة العزيزة نور أجمل بنوتة مصرية


ما وجدته في جعبتي حاليا . . 




الحقيقة أكتر ذكري دايما بتيجي علي بالي هي تفكيري العام أيام ثانوية عامة , وتفكيري خاصة أيام التنسيق , وده لأني دلوقتي بجد حاسس إن أيامها مكنتش بني آدم طبيعي , بإختصار كده كانت كل أفكاري عن التعليم والمذاكرة تتلخص في إني أقعد في أوضتي وقدامي طبق مليان لب وجمبه علبة عصير , وعلي يميني الكاسيت الكبير المحمل بأجمل ألبومات الفترة دي , أيوه فعلا دي كانت معداتي للمذاكرة , وطبعا معاهم كتاب بقي والحاجات دي , 3 سنين مفتحتش كتاب من غير أغاني شغالة جنبي , تقولولي بتذاكر إزاي ؟ . . أقولكو والله ما فاكر , كان مستوايا طبعا زي الزفت وكل يوم بتطرد من درس شكل , ده غير إن المدرسة كانت بالنسبة لي هي محل البلاي ستيشن :) . . من 6 الصبح لحد 2 الضهر كل يوم . .

نرجع لموضوع المذاكرة , أنا فعلا مكنتش عارف حاجة لدرجة إني مكنش عندي أي تصور لحياتي بعد الثانوية , ولا كان في دماغي إني أحاول أجيب مجموع والكلام ده , ولا كنت بسأل كلية إيه عايزة مجموع كام ولا حتي أعرف أسماء الكليات والله بدون مبالغة , منتهي الهطل , ولا كان ليا أحلام ولا كنت عايز أطلع حاجة معينة ولا ليا أي هدف في الحياة , كل اللي كنت بعمله في الفترة دي إني باكل وأنام وألعب بلاي ستيشن وأسبّل للبنات اللي معايا في الدروس :) . .

جت فترة التنسيق . . تقريبا كنت بضرب برشام في الوقت ده . . أنا فاكر بابا كان بياخدني من إيدي كده وأنا مغيب تماما لمش عارف فين أماكن غريبة كده وفاكر إعادة تصحيح للإمتحانات مع إني كنت واثق إني حالل غلط :)) . . وبما إني برسم حلو كانوا قالولي أدخل مستوي مش فاكر إيه كده عمارة , كانت حلوة بصراحة بما إني بحب الرسم , و ودوني نادي كده إسمه نادي الطيران عشان آخد درجات تفوق رياضي , بجد حاسس إني كنت منقاد تماما وأنا مش فاهم أي حاجه في أي حاجة , عايز أقولكو إني كنت متخيل لبعد الثانوية بسنتين إني عشان رحت متأخر ساعة علي مكتب التنسيق فمعرفتش أدخل فنون جميلة أو فنون تطبيقية , والواقع إني أصلا مجبتش مجموعهم , بس الظاهر إنهم كانوا مخبيين عليا :)) . . طبعا في النهاية ومن غير ما خد بالي دخلت كمبيوتر ساينس في مودرن أكاديمي , قمة الفشل , قالولي أدخل هندسة بس أنا رفضت لأني عارف نفسي كويس مش بتاع حساب خالص . . تقريبا بعدها بسنة كنت لسه بسأل هو أنا كان جالي إيه في التنسيق , قالولي تجارة إنتساب طبعا , قلت قشطه :) . .

كنت جايب 82 % بالمناسبة . . طبعا درجات المستوي ودرجات التفوق الرياضي والإنجليزي والألماني اللي كنت مقفّلهم (دول اللي بينصفوني) الحاجات دي اللي رفعتني شوية مع الدرجات الهزيلة التانية . .

طبعا يا جماعه مكنتش دي النهاية وبعد شهر ونص في مودرن أكاديمي طلعت منها وحياتي إتقلبت رأسا علي عقب ولهذا قصة أخري معظمكم عِرفها . .

إهداء . . 

لكل صديق جديد إكتسبته في هذا العالم الرائع

عتاب . . 

هبقي أعاتب نفسي بيني وبيني :)

كلمة . . 

مقولتين مؤمن بيهم

تمني الأفضل . . ولكن إستعد للأسوء
المعرفة قوة . . إذا لم تستخدمها . . تخلي عنها 

شكر . . 

لكل من ساهم بشكل أو بآخر - سلبي قبل ما يكون إيجابي - في تكوين شخصيتي ونظرتي للحياة . 


14 التعليقات:

Bent Men ElZman Da !! يقول...

اجمل حاجه بجد انك صريح ومش خايف من حاجه ولا كلام حد وانت بتحكى ذكرياتك
بس انت مش حكيت كتير بردو

احلى فتره هى الثانويه العامه
عشان لسه الواحد كان بيكون تفكيره عن العالم اللى حواليه اللى هو بعيد عن ماما وبابا والكلام ده
والاجمل
ان بعدها الموضوع بيتطور والواحد بيقدر يفهم ويستوعب اللى حواليه ايه اللى صح وايه اللى غلط

ربنا يوفقك فى حياتك للاحسن ان شاء الله :))

ابراهيم رزق يقول...

البساطة و الفضفضة هى عنوان صنوقك

لكن مكتب التنسيق نفسى يتلغى لكن فى بلد زى مصر الواسطة و المحسوبية شغالة هو حماية للغلابة

تحياتى

reemaas يقول...

هههههههههههههههههههه
والله مانا عارفه اقولك يا مصطفى انا ضحكت ازاى
جايز لان الكلام عفوى اوى
جايز حاولت اتخيلك وانت مبرشم كده ولا فاهم حاجة فى حاجة

حلوة حكايه مخبيين عليك وكنت فاكر علشان رحت متاخر دى

على فكرة انا كمان كنت بذاكر وانا بسمع اغانى تخيل؟وفضلت كده فى الكليه كمان

عاوزة اعرف باقى الحكااااااااااايه

nesma hatem يقول...

عجبنى موضوع هعاتب نفسى بينى وبين نفسى ده :)

مش لوحدك على فكرة اللى مكنتش عارف فى كليات ايه ولا ايه المجموع اللى ممكن تاخده الكليات دى ، الأختلاف بس فى ليه مكنتش عارف :D

سؤال فضولى بقه :) لو كنت عارف انت عايز تدخل ايه وجايب مجموع كويس كنت دخلت ايه غير اللى دخلته علشان مكتب التنسيق ؟
فنون .. أعلام .. عمارة ولا شرطة برضه :)

Unknown يقول...

حلوه كرتونتك :)
بس غريبه انك مكانش ليك في أي حاجه كده صحيح ان معظم الولاد كانوا مقضينها زيك بس من كتاباتك تخيلت انك كنت شاطر.
و عموماً انت كنت شاطر بردو في اللغات و الرسم و أكيد الأدب و ماتخفش مفاتاكش كتير الكليات كلها بتتساوى بعد التخرج اللي بيفرق بجد هو الشغل...بس ماعرفناش اذا كنت استمتعت في الفتره دي و لا كنت متضايق.
ربنا يوفقك دائماً للأفضل و انك تعمل دائماً اللي بتحبه

FAW يقول...

bent mn l zaman da

رغم إن الصراحة كتير بتزعل المستمع أو بتجرح صاحبها , بس أنا شايفها أفضل سياسة وأفضل مبدأ في الحياة

فعلا كانت أجمل فترة رغم بعض مساوئها

نورتيني ومعلش إني محكيتش كتير . . خللي حاجة للبوستات الجاية :)

FAW يقول...

إبراهيم رزق

ربنا يخليك يا أستاذنا

ربنا يرحمنا من الواسطة ونلغي مكتب التنسيق

نورت

FAW يقول...

reemaas

مبسوط إني ضحكتك , أنا بقي متخيل شكلي :))

إنتي كمان ؟؟ . . و100 % ؟ . . اللهم لا حسد :))

بقية الحكاية يا ستي إني قبلت في شرطة وبقيت موظف ميري :)

ده بإختصار شديد طبعا . .

FAW يقول...

nesma hatem

أمال يعني هفضح نفسي هنا :))

أكيد كنت هحتار ما بين فنون وإعلام . . كنت هصلي إستخارة بقي :))

FAW يقول...

شيرين

أهو إنتي :)

مش غريبة ولا حاجة , أنا كنت بعشق القراية , بس أي حاجة بتتقري غير المذاكرة :)

واللغات كنت متأسس فيها كويس والفضل لمدرستي الإبتدائية ومدرسيني ساعتها ربنا يكرمهم

والرسم دي موهبة بفضل الله

فعلا كل الكليات متساوية ومعظم الناس بتشتغل بالكورسات , يعني فعلا المجهود والإرادة هم اللي بيفرقو

هي كانت فترة رائعة وبحبها جدا , بس لما كبرت زعلت علي خبراتي المحدودة ساعتها وكم الفرص اللي ضيعتها , إكتشفت إني كان ممكن أعيشها ألذ وأحسن من كده

تحياتي . .

ميرام يقول...

ادي نموذج لحياة الظباط الي بيتنططو علينا










هههههههههههههههههههههههههههههههه
(: دا مش تعليقي والله بس لو عدت عليك القصيدة الي كان طالب في شرطة كاتبها وعملو عليها حدوته تخيلت البوست بتاعك منشور كدا والكومنتات نازلة مااشاء الله (:

المهم (:
عجبني انك صريح قوي كدا (:

ولا فيها أكذب ولا فييها أتجمل
(:
بس أنا استغربت قوي ان في حد ميبقاش عارف الكليات ولا عايز ايه ولا كدا
هههه أنا بدأت اشك انك كنت في القصه (:
او يمكن عشان أنا كان متحددلي مصيري بالكامل .. الي الحمد للله مااتحققش
(:
كان مطلوب مني أدخل طب ..
وبقدرة قادر بقيت مهندسة هههه ماتتصورش خذلتهم ازاي
الغريب اني عمرري في حياتي مافكرت في كلية هندسة دي .. وكان نفسي قوي أزووغ من تاريخ العيلة في طب وصيدلة وأروح اعلام بس ماكانش معترف بيها عندنا ههههه
ددخلت هندسة والحمد لله بجد ربنا كاتب الخير
اكتشفت بعد كدا اني لو كنت دخلت طب او صيدلة كنت مش هعدي السنة (:
واني في كليتي الميمونة لقيتني ههههه
الكارثة بقى هتبقى لو انت مالقيتش نفسك في شرطة
انا رغيت أكتر منك تقريبا (:
تحياتي

FAW يقول...

ميرام

ولا يفرق معايا أي تعليقات بصراحة :)

فيه بعض الظباط بيصوروا للناس إنهم إتولدوا ظباط , وعايزينهم يصدقوا إنهم - الظباط - ملهمش أي صغائر

محدش يعرف نصيبه فين , ولا الخير فين , ده نصيب . .

ربنا يوفقك في كليتك وفي حياتك العمليه

أنا ملقيتش نفسي فيها " بوضعها الحالي " . . يا هي تتغير يا أنا أمشي , بس أنا مش هتغير

ولا رغيتي ولا حاجة :)

غير معرف يقول...

حلو انك تقدر تكتب عن مرحلة بحياتك .. بغض النظر شو كانت ..

في ناس الصندوق هاد ما بقدروا يفتحوا ولناس ثانيه بكون فاضي ..

:)

FAW يقول...

blue

عندك حق فعلا في موضوع إنه ساعات بيكون فاضي :))

تحياتي . .