زي دلوقتي من خمسه وعشرين جيت . . بس معرفتش ساعتها إني إبتديت . .
بقالي ساعه مش عارف أبدأ الموضوع منين . . ويمكن وأنا بكتب لو عرفت . . أرجع أمسح الكلمتين دول . . يعني لو ملقيتوهمش مش هتعرفوا إنكوا كان المفروض تلاقوهم قبل ما أنا أعرف إن . . . ماعلينا . .
ساعات الواحد بيبقي جواه كلام كتير قوي عايز يقوله , ومبيعرفش يعبر . . النهارده بس تميت 25 سنه . . . بحاول أفتكر كل أعياد ميلادي اللي مريت بيها زمان , ركزت قوي علشان أتخيل أحاسيسي ساعتها , إفتكرت إني كنت ببقي فرحان قوي لما أتم سنة كمان فوق سنين عمري القليله , 6 . . 7 . . 8 . . الأرقام دي . . . إستغربت قوي من نفسي إزاي كنت ببقي مستني اليوم ده بفارغ الصبر , أكيد مش علشان الهدايا وعيد الميلاد و كده (رغم أنهم سبب برضو) . . بس علشان بكبر في نظر نفسي , وبتباهي بكل سنة بختبرها في الحياه قدام اللي أصغر مني , واللي أكبر مني كمان . . أفرح قوي لو حد سألني عندك كام سنة وأجاوب بكل فخر . . تسعه !!
ببص لنفسي دلوقتي . . مش فرحان خالص , بالعكس . . إحساسي غريب قوي . . ببص للي أصغر مني علي إني قديم ومترب بالنسبه له , شايفه منطلق وعايش حياته وأنا بشتغل وطالع عين أهلي وهو شايفني راحت عليا , وفي نفس الوقت ببص للي أكبر مني علي إنه . . (أكبر مني) . . اللي رقصوا علي السلم . . !! . . ده إحساسي دلوقتي .
أعتقد إن الحماس للتقدم في السن ده عامل زي منحني رسم بياني , بياخد إتجاه تصاعدي من أول ما الإنسان يوعي لغاية سن واحد وعشرين . . سن كمال الأهليه , يتخلله بقي سن البلوغ وسن البطاقه وسن الرخصه . . وبعد كده المنحني بياخد إتجاه تنازلي مفاجئ لغاية مايتخسف بيه الأرض ويتحول لحاجه من إتنين . . يا هاجس و خوف . . يا إقتناع وإيمان .
أنا عارف طبعا إن زي ما أنا عندي دلوقتي 25 سنه , فا فيه اللي دلوقتي عندهم 28 و 35 و 40 , وأنا بالنسبة لهم لسه صغير . . بس هي الأمور كلها دايما كده . . نسبيه .
وعلي فكرة الأعمار الكبيرة – نسبيا - عامة وأنا منهم . . هما كمان رغم إنهم مش فرحانين بمرور السنين بس برضو بيتمنوها تجري . . بس بطريقه تانيه يمكن أكون شرحتها (هنا)
بحاول أحدد نقط معينة لحاجات حققتها في خمسه وعشرين سنة فاتوا . . ومش قادر . . وبحاول أحط خطه أو أهداف لسنة قدام . . ومش عارف . . الظروف والبيئه المحيطه دايما بتخليك كل فترة تغير إتجاهاتك ونظرياتك ومبادئك وطموحاتك , أنا بقي الحاجات دي بتتغير عندي كل نص ساعه . . إنسان (هزهوز) زي ما أختي بتهزر معايا ساعات . . لأ بتتكلم جد مابتهزرش . . أقل مثال بوست زي ده , قريته في ساعتين عشرين مره تقريبا , وكل مره كنت بغير حاجه !!
عارفين إزاي فيه ناس بتنسي عمرها , وبتفضل عايشه بعقلية وتصرفات العشرينات وهم في الخمسينات وأكتر , أو ناس بتعيش ده كله ومبتعملش حساب اليوم اللي هيتفاجئوا فيه بعمرهم الحقيقي . . دايما خايف قوي أكون منهم بتفكيري ده !!
أكيد لما جيت اعمل مدونه , مفكرتش أبدا إني هحب أسجل لحظه زي دي . . بس لأ . . أنا مبسجلهاش . . أنا بنعيها . . لأنها إنتهت .
الحسنة الوحيدة بقي في الموضوع إن الواحد كل ما بيكبر وبييجي عيد ميلاده . . الهدايا بتبقي عظيمه قوي بصراحه . . بس برضو ليها منحني بياني بتختلف نقطة تحوله من إنسان لآخر , بس في الآخر النتيجه واحده , إنك هتكتفي بـ بوسه . . . ده لو خدتها !!
نهاية نفسي أشكر كل من تسبب بشكل أو بآخر - سلبي قبل مايكون إيجابي - في تكوين شخصيتي ونظرتي للحياه . .
ملحوظه : أول زلزال يحصل في تاريخ جمهورية مصر العربية سنة
92. . كان يوم عيد ميلادي . . بلا فخر . .