الأربعاء، 1 يونيو 2011

زمان . . وأنا صغير








الذكريات دي حاجة عجيبة قوي , قد إيه بتنعش حياة الواحد وبتخلّي للحاضر بتاعه معني , بحب كل فترة كده أقعد أقلب في أدراجي وحاجتي القديمة يمكن أطلع حاجة تبسطني , تضحكني , تشوقني . .
النهاردة وبعد ما كنت قررت مادخلش حملة التدوين اليومي لمدة شهر اللي بيقولوا عليها دي سبحان الله لقيت حاجة أكتب عنها أول يوم . . معرفش بكره بقي هيبقي ظروفي إيه . . بس أشك .
المهم . . وأنا بقلب في درج في أوضتي لقيت جواب قديم قوي , أو جوابين الحقيقية . . أظرف كده (كانت) شيك ومكتوب عليها بالإنجليزي , وصورة طالعة من ظرف منهم , مكدبش عليكم علي طول إفتكرت إيه دول , بس كنت محتاج أفتحهم عشان أفتكر فيهم إيه , وقد كان . .
زمان , مش فاكر كنت كام سنة , ومش فاكر برضو الموضوع ده حصل إزاي بس أعتقد إن كان فيه حد بينظمه . . الحد ده بعتلي بيانات طفل (ما أنا كنت ساعتها طفل برضو) عايش في مالطا !! . . والمفروض إني أراسله ونبقي أصحاب وكده , وحيث إني بحب الإنجليزي وشاطر فيه من زمان فقلت واي نوت ؟
وفعلا . . بعت للولد ده جواب . . أو بصراحة مش فاكر مين اللي بدأ بس اللي عندي منه دلوقتي جوابين . .
أول جواب لقيته حاطط فيه صورته هو وأخوه . . طبعا عيال حلوين قوي :) . . أجانب بقي يا جدع . . دي صورتهم


هو اللي واقف . .



بس لاحظت إن بيتهم شبه بيوتنا مش فظيعة قوي يعني . . أو يمكن اللي بيوتهم أحسن من كده مكنوش عبروني : )
نيجي بقي للجواب نفسه . . أنا هكتبهولكو مترجم علي طول علشان الواد أصلا خطه مشبك ومنعكش خالص . . فقلت بلاش أرفعه زي الصورة . .

عزيزي مصطفي . .
أنا يسعدني جدا إني أبقي صديقك بالمراسلة
كما تعرف , إسمي لوك , أنا عندي 10 سنوات ونص (يا عسل) . . وطولي 130 سم :)
هواياتي (علي طول كده !!) هي تسلق الجبال , ركوب الدراجات , الغوص , القراءة , والإستماع إلي موسيقي البوب (طبعا أنا أول ما شفت تسلق الجبال والغوص دي إنفجرت ضحك وقلت ده أنت يا بني متجيش حاجة جنب لعب البلي والبلاي ستيشن اللي أنا محترف فيهم )
فريقي الغنائي المفضل هو البيتلز (خنفس قوي :) ) . . والبيتش بويز و ديفيد بويي ( مش متأكد من الإسم ده بصراحة الخط مش واضح)
أنا أعيش في قرية صغيرة ( ها ها ها طلع فلاح أهو ) . . إسمها باسماساد (إسم غريب قوي) . . هناك بيوت سكنية كثيرة في هذه المنطقة منذ مرور فيضان كبير هنا (يا عيني يابني)
أتمني إننا نصبح أصدقاء , متشوق جدا لإستلام رد منك . .
صديقك . . لوك
طبعا مش فاكر أنا بعتله إيه بس الأكيد إني أكيد حاولت أتمنظر عليه وأحكيله عن هواياتي ومدينتي الفظيعة وكل الحاجات الوهمية اللي بعملها . . وطبعا بعتله صورتي برضو وشاف فرق الجينات الواضح :))
وده بقي الجواب التاني . .

عزيزي مصطفي
أنا كنت سعيد جدا عندما إستلمت خطابك . . مؤخرا كان الجو عندنا في مالطا مشمس (الظاهر إني سألته عالجو عندهم :) ) . . وحار جدا و رطب جدا ودرجة الحرارة بالفعل وصلت 30 !! . . (لا ياشيخ)
وكيف الجو عندكم في الزقازيق (تخيلوا الإسم طلع من بقه فعلا :) )
والدي جون جاء مرة إلي مصر (معرفش ليه بيقول إسمه !!) وقال إنها مكان رائع جدا (الله يكرمك يا عم جون)
وقال إنه من بين كل الأشياء التي شاهدها أحب الأهرامات أكثر شئ
نحن ستة في أسرتي (الظاهر إني كنت شغال في التعداد ساعتها وحبيت أعمل عليهم سيرش :) ) . . أنا و أخويا بين , ومامتي دوريس . . وإتنين هامستر (وكتبلي بين قوسين فئران عشان أنا جاهل بقي :) ) . . فيران !! . . لاحظوا إنه حسبهم من ضمن الستة !! . . حاجة آخر قرف :)
متشوق للرد منك . . لوك
وبعدين في الآخر كتبلي ملحوظة المرة دي . .

إنت لغتك الإنجليزية والهجاء عندك كويس قوي بالنسبة لعربي (وكتبها أرابيك مش إيريبيان) . . آسف جدا إني مقدرش أتكلم ولا أكتب بلغتك (واد ذوق قوي يعني والله)
ولكن إذا كنت تعرف اللغة المالطية (طبعا محدش يسألني إيه اللغة المالطية دي!!) أكتر من الإنجليزية قولي وأنا أكتبلك بيها (حد الله يا عم )
طبعا حاجة تفرح بجد إن الواحد يتواصل مع حد من قارة تانية . . أيام بقي ولا كان فيه موبايلات ولا إيميل ولا فيس بوك ولا الهوا . . كله بالحمام الزاجل . .
مع الجوابين دول لقيت جواب تالت من بنت من أمريكا (شيكاغو) إسمها جيسيكا . . الظاهر والله أعلم إني كنت سفير نوايا حسنة وأنا صغير :))
الظرف كان عليه ستيكر بإسم وعنوان عيلتها (حاجة مفتخرة قوي ) . . بس ماكنتش كاتبة جواب , كانت بس باعتالي بوست كارد كاتبه فيه . .
عزيزي مصطفي (يالهوي !! . . عزيزي !! :) )
أتمني لك أجازة سعيدة (مش فاهم بصراحة) ومليئة بالسعادة في كل لحظة منها
صديقتك . . جيسيكا
والله عالمي من وأنا صغير يا جدعان :)
بس للأسف المزة مكنتش باعتة صورة :(
اللي أنا فاكره كويس إن ماما كانت مشجعاني جدا علي الموضوع ده , حاجة فعلا كويسة إن أي أم أو أب يشجعوا ولادهم علي تجربة جديدة . . بس طبعا للأسف التجربة مستمرتش أكتر من كده لما دماغي إشتغلت و قررت إن اللعب بالعجل ألذ بكتير :)
أيام . . 



8 التعليقات:

reemaas يقول...

عالمى انت من صغرك يا مصطفى

انا كمان بصراحة تخيلته وهو بيقول الزقازيق بس حساه فشار 10 سنين وتصلق جبال ازاى ولا مؤاخذه .....اى الناس دى


جميلة الذكريات بحب الفلاش باك انا

جميله اول تدوينة

Unknown يقول...

هههههههه تعليقاتك على الجوابات جامده جداً مصري مصري يعني خصوصاً في الجزء الأخير بتاع (للأسف المزة مكنتش باعتة صورة) كلكم هذا الرجل:)
ذكريات جميله و الأجمل تشجيع أهلك لك بجد شئ مفرح إن الطفل يلاقي حد يشجعه على الهوايات الغريبه و التواصل العالمي.
تحياتي ليك و حاول تكمل تدوين متابعاك

Unknown يقول...

:)
حلوة الجوابات دي
تصدق انا عمري ما حاولت أعمل موضوع المراسلة دة بالرغم من انه كان طالع موضة كدة .. في وقت ما ..
كل العيال صحابي كانوا مصاحبين ناس بالمراسلة .. عن طريق مجلات ماجد و كدة ..
إلا أنا :)
كنت بحب أقرا قصص !!
و كنت مستغربة فكرة اني اتعرف على حد معرفهوش .. كطفلة أصلا شكاكة لوحدها :)
اتعرفت على مدونتك النهاردة .. :)
فرصة سعيدة :)

FAW يقول...

reemaas

عارف يا فندم :)

أيوه والله أنا قلت كده برضو . . شكله أبو لمعة بتاع مالطا :)

نورتي ومنورة دايما . .

FAW يقول...

شيرين

مبسوط إنها عجبتك :)

كلنا هذا الرجل ؟ . . ههههههه

فعلا , وإن شاء الله أعمل كده مع ولادي

هحاول أكمل إن شاء الله

تحياتي . .

FAW يقول...

شيماء

أنا كمان كنت بحب أقرا قصص , ده كان جنون عندي , مش عيب خالص . . ميكي وسوبر مان وعلاء الدين وماجد وتان تان وفلاش :)

يشرفني إنك إتعرفتي علي المدونة وتنوريني دايما .

Emtiaz Zourob يقول...

ياربي ... ذكرتني بنفسي وانا صغيرة ،، كنت مصاحبة اصدقاء كثير من برة بالمراسلة ،، عرب واجانب .. يا الله ، اتذكرتهم ليلى من الجزائر ، مارتا وامرة من اسبانيا .. ومن البوسنة ومن القدس ! ومن المغرب ومن وين كمان ؟؟ مش فاكرة بس كنت كثير صغيرة وشاطرة بالانجليزي " الاولى على المدرسة " اتعرفت عن ناس كثير ولحتى الان محتفظة بالرسائل وكروت المعايدة ..

رجعتني لذكريات زمان ..

FAW يقول...

وجع البنفسج

مبسوط والله إني بسطتك

الذكريات الجميلة البسيطة بتفرح قوي

الجميل والساذج مني إني كنت فاكر نفسي الوحيد اللي كنت براسل ههههه :)

نورتي وتحياتي ليكي