ده العادي بتاعي علي فكرة . .

إيه مواصفات الإنسان العادي ؟؟

اللي عايش في مجتمع عادي , في دولة عاديه , في كوكب عادي . . ؟؟

مواصفات بسيطه جدا بحاول إني أحققها ( آه والله بحاول ) , علشان بس أقف قدام المرايه كده وأتفشخر وبعلو صوتي وأقول . . أنا إنسان عادي !!

وللأسف ده اللي أنا بضيع وقتي فيه بقالي خمس سنين , وكل يوم أصعب من اللي قبله , لغاية ماسألت نفسي . . إيه !! . . ده ده العادي !! أمال لو طلبت حاجه أكتر من كده هيحصل فيا إيه !!!

ومحاولاتي دي بتتمثل في حاجات بحاول إني أعملها بشكل طبيعي . .

بحاول أنام بدري وأصحي بدري .

بحاول آكل أكل صحي و متكامل وفي مواعيد منتظمه .

 بحاول ألعب رياضه بإنتظام .

بحاول أحب وأرتبط وأتجوز .

بحاول أتواصل إجتماعيا مع الناس اللي حواليا .

بحاول أكسب إحترامي لنفسي .

بحاول أتكلم في الموبايل (من غير إسراف والله) .

بحاول لما أتخنق أنزل أشم هوا نضيف .

بحاول أدرس اللي أفهمه و أشتغل اللي أتفوق فيه .

بحاول أصل الرحم .

بحاول أركب مواصلات عامه .

بحاول لما أعيا أتعالج .

بحاول أبقي نضيف .

كلها تصرفات عاديه وطبيعيه جدا , بس بقول لنفسي يمكن مليش نصيب فيها دلوقتي , بس معني كده إن أنا هقدر أحقق الحاجات دي كمان عشرين سنه مثلا !!  أمال حياتي هتبقي مرفهه إمتي !!  وأنا عندي ستين سنه !!   أنا مش طالب كنوز وفلوس بالهبل , أنا بس نفسي أحس إن فيه أمل , مش عارف إزاي الناس وصل بيها الحال إنها تقتنع إن العادي إن الأب يفضل يصرف علي إبنه بعد ما يشتغل , آه والله ده بقي عادي , ده فيه ناس إتجوزت و خلفت ولسه بيتصرف عليها , ممكن يكون فيه نسبة من الغلط فيهم وفي أهلهم , بس الباقي غلطة مين !! . . بجد مش قادر أتخيل إني أروح أتقدم لواحده وأنا فيه مليم مش دافعو من جيبي , ولو دفعت . . وده أنا عارف إنه مستحيل , مش قادر أحس بأمان ها أوفره لأسرتي بعد كده  . . إزاي واحد بعد ما يطلع عينه من 8 الصبح لـ8 بالليل رغم إن ده يتعارض مع حقوق الإنسان إنه يجيله نفس ياكل أو يحاول ياكل أكل مفيد (هو التيك أواي مفيش وقت لغيره ) , إزاي يجيله نفس يمارس رياضه ده لو قدر أصلا , إزاي يجيله نفس يقرا كتاب ده لو عرف يفتح عنيه , إزاي يجيله نفس يخرج يشم هوا ده لو لقي هوا يشمه , إزاي يجيله نفس يكلم حد أو يشوف حد . . . أنا كل ما أفتكر واحدة قريبتنا وهي بتقول لعريس بنتها اللي إترفض بعد كده , يعملوا إيه 4000 جنيه في الشهر دلوقتي !! . .  والله قعدت ألطم وصعب عليا الواد اللي كان بيحبها . . وصعبت عليا نفسي !!

حاولت مره أحسبها لقيت إني علشان أفطر وأتغدي وأتعشي وأركب مواصلات أو أدفع بنزين رايح جاي من الشغل وعلشان أخرج أفك عن نفسي وأشرب عصير وعلشان أروح الجيم وعلشان أتكلم في الموبايل . . (ده بفرض إني لقيت وقت للحاجات دي كلها أصلا خلال يوم واحد ) , عاوز بالميت وأنا جاي علي نفسي ومع العلم إني مش عايش في القاهره . . 65 جنيه .

يعني في الشهر عايز 1950 جنيه . . ممكن حد يقول إني ببالغ , ويقولي مش لازم تخرج ومش لازم تروح الجيم يعني . . بس صدقوني أنا كده إنسان عادي جدا . . وبعدين بقي المبلغ ده ولا حاجه أصلا , أنا محسبتش إيجار شقة ومصاريف سفر لو مغترب في شغل , محسبتش فواتير كهرباء ومياه وغاز أو بوتاجاز , محسبتش مصاريف علاج , محسبتش شراء الهدوم ولو دي مش مصاريف شهريه بس أهي مصاريف , محسبتش (رفاهيات) زي الفاكهه , محسبتش النت اللي قدام حضراتكو دلوقتي , محسبتش الجنيهات الفضه اللي بتقع من جيبي , محسبتش نثريات تانيه كتير . . وبعدها المفروض إنك يبقي معاك فلوس علي جنب للطوارئ , ولو . . لو . . إتجننت في عقلك وعاوز تحوش . . !!

إمبارح كنت بكلم ماما في التليفون وفي وسط الكلام بقولها الناس عماله تتكلم عن أسعار الطماطم اللي غليت , وضحكت وقلتلها أي خدمه أنا مظبتك , مبحبش الطماطم ولا عمري قلتلك إعمليلي سلطه . .

قالتلي فعلا , وإبسط  . . مش هعملك كمان ولا مكرونه ولا خضار ولا صينية بطاطس ولا بيتزا . .