الاثنين، 12 سبتمبر، 2011

لــــسّـــه







أول يومين
أول وتاني إسبوعين
قبل السنين
أيام ما كنا صغيرين

أول دقيقة , قلبي قاد فيها حريقة
أول مرة أشوف , علشان أشوفك طريقة
أول ضحكة جاية بتجري من بعيد
أول غيرة بتكشيرة في عيون بريئة

تاني أعيشهم , مش بعدهم , لأ قبل النهاية
قبل اليومين الضيقين
قبل السنين , أيام ما كنا حنيّنين

أيام أول لقا , أول سهر , أول رسالة
أول مرة العينين ندهت تعالي
أول لبس بذوق حبيبك
أول غمز , لمز , إحساسهم بحالة

تاني أعيشهم , مش بعدهم , لأ قبل النهاية
قبل قلوبنا الميّتين
قبل السنين , أيام ما كنا متجمّعين

أيام أول كسوف , أول كلمة حب إتشكلت حروف
أول مرة طلعت : طمنّي عليك , فعلا بخوف
أول معايدة
أول هدية رغم البساطة تسوي الألوف

تاني أعيشهم , نفسي أعيدهم , همّ بتمامهم
مش قبلهم ولا بعدهم بعد النهاية
لأ في عزّهم
قبل كلام اللوّامين
قبل السنين , أيام ما كنا قريّبين

أيام أول مشاركة في حلم من غير شروط
أول ساعات في ثواني معاك تفوت
أول مناهدة علشان بحبك
أول فهم رغم السكوت

تاني أعيشهم , لسه لامسهم , لاغير عايزهم
مش مهم إيه بعدهم , ولا يفيدني إيه منهم
بس الأكيد محتاجلهم
أيام مكنتش بحسب للي فات
أيام حنين
قبل الأنين
قبل السنين
أيام ما كنا متأكدين








20 التعليقات:

وجع البنفسج يقول...

مافي اجمل من ذكريات أول حالة ..

كلماتك جميلة قوي يا مصطفى ..

عن جد استمتعت بالقراءة ..

طاب مساؤك .

FAW يقول...

:)

فعلا , أجمل الأحاسيس الواحد نفسه يكرر فيها للأبد :)

شكرا لذوقك

نورتيني جدا . .

ابراهيم رزق يقول...

الاول دائما يحفر فى الذاكرة


اول مدرسة
اول عمل
اول حب

انها بكارة الاشياء
و البكارة دائما بريئة و نقية لم تلوث

تحياتى لفكرك

Noha Saleh يقول...

دايما اول حاجة بتحصل فى حياة الانسان بيكون لها ذكرى جميلة
حلوة الكلمات

reemaas يقول...

بحب انا اول حاجة فى كل حاجة
اد ايه بتبقى برئيةوصادقة

جميله يادرش

ميرام يقول...

جميـــــــــــلة (:

P A S H A يقول...

إحساسك فيها عالي قوي
‏:)
حلوة بجد

FAW يقول...

إبراهيم رزق

عندك حق :)

شكرا . .

نورتني

FAW يقول...

noha sale7

هي سواء حلوة أو وحشة , مبتتنسيش خالص
للأسف

تحياتي . .

FAW يقول...

reemaas

أكيد . . الإحساس بحاجة لأول مرة وقبل التعود عليها , بيبقي فريد من نوعه


الله يخليكي :)

نورتي

FAW يقول...

ميرام

إنتي أجمل :)

FAW يقول...

p a s h a

شكرا :)

نورت

محمد ملوك يقول...

بالتوفيق والسداد
تحيتي ومودتي

BluE يقول...

حلوة بجد ...:)

FAW يقول...

محمد ملوك

شكرا ونورتني :)

FAW يقول...

blue

متشكر لذوقك . .

Sarah .. يقول...

كل حاجة فى بدايتها تأثيرها مش بيروح بمرور الوقت .. يمكن عشان بتبقى من القلب أوى
..
احساسها حلو أوى .. :)

FAW يقول...

sarah

فعلا معاكي حق

نورتيني ومتشكر لذوقك :)

زهرة يقول...

مصطفى

جميله جدا جدا ..

محسوسه وواصله اوى .. فكرتنى انا كمان باول كل حاجة حلوة فى حياتى

بيبقى ليها طعم مختلف وجميل

تحياتى :))

FAW يقول...

زهرة

منوراني جدا , فينك من زمان

ميرسي جدا علي ذوقك ومبسوط إنها عجبتك

تحياتي ليكي