الأربعاء، 22 يونيو 2011

مش كنت تقول . .







يا أخي مش كنت تقول وإنت كل يوم عمال تسألني عن كل حاجة وأنا بزهق منك


يا أخي مش كنت تقول وإنت بتحكيلي عن إبنك والطفل اللي جاي في السكة وأنا لسه


 معرفش حاجة عن مشاعر الأبوة


يا أخي مش كنت تقول وإنت بتحكيلي عن المدير لما إداك مكافئة وكنت في قمة سعادتك


 وأنا مش في دماغي


يا أخي مش كنت تقول وإنت بتحكيلي عن القرض اللي عايز تاخده عشان تكمل أقساط


 شقتك وأنا مش مهتم


يا أخي مش كنت تقول لما قلتلي أقعد معايا شوية وأنا إستعجلت ومشيت


يا أخي مش كنت تقول وإنت بتسلفني شنطتك إني مش هرجعهالك تاني


يا أخي مش كنت تقول وإنت بتعزمني علي جيلي إنها آخر مرة هتعزمني


يا أخي مش كنت تقول وإنت نازل بالليل إنها آخر مرة هشوفك


يا أخي مش كنت تقول وإنت فاتح باب أوضتك إني مش هشوفه مفتوح تاني


يا أخي مش كنت تقول إني هضطر أعدّي من قدامه كل يوم وأنا عارف إنك مش جوه


يا أخي مش كنت تقول إنك ناوي تزعلنا وتوجع قلبنا عليك


يا أخي مش كنت تقول إنهم هيقتلوك غدر ومن غير تمن


كنت قلت حاجة يا أخي


كنت قلت حاجة




ربنا يرحمك يا محمد ويغفر لك



14 التعليقات:

Bent Men ElZman Da !! يقول...

:(((
ربنا يرحمه ويغفرله ويسكنه فسيح جناته ان شاء الله

reemaas يقول...

ربنا يرحمه يارب وجعت قلبى يا مصطفى هو الفراق اللى صعب ربنا يجمعنا معاه ومع كل الشهدا بالجنة

ميرام يقول...

البقاء لله
ربنا يتغمده برحمته ويسكنه فسيح جناته
ويلهم اهله الصبر

موناليزا يقول...

البقاء لله
ربنا يرحمه ويغفر له

nesma hatem يقول...

:((
ربنا يرحمه ويغفرله ويصبركوا وأهله يااااارب

FAW يقول...

شكرا للجميع

ونعم بالله . . آمين

faroukfahmy يقول...

مصطفى
مش كنت تقول انك هنا يا أخى وانا عمال ادور عليك كلما رأيت اسم fawواخيرا لقيت ك انت اللى كنت بدور عليك وانت اللى قلبى هدانى اليك
اسلوبك جذاب ومحبب
الله يرحمك يا محمد ويغفر لك
لم اترك مدونتك قبل ان اتقدم بطلب اشتراك لكى انضم الى متابعيك
الفاروق

ابراهيم رزق يقول...

ربنا يرحمه و يسكنه فسيح جناته
و يصبر محبيه

تحياتى

غير معرف يقول...

الله يرحمه ويغفر له
...

Noha Saleh يقول...

البقاء لله
الله يرحمه ويجعل مثواه الجنة
ويصبر اهله

FAW يقول...

farouk

متشكر جدا لذوقك وأتشرف بمتابعتك

_______________________________


إبراهيم رزق


آمين إن شاء الله

_______________________________

blue

يا رب

FAW يقول...

noha saleh

ربنا يصبر أهله فعلا . .

شكرا

غير معرف يقول...

مررت على الكثير مما كتبت وهنا فقط لم أستطع أن أمر دون التعليق

نحتسبه عند الله شهيدًا، ونسأل الله أن يحمي مصر الحبيبة

دمتّ بسلام

FAW يقول...

أحمد شريف

شكرا وآمين يارب العالمين

وزيارتك شرفتني بـ أو بدون تعليق

تحياتي