الأحد، 5 يونيو 2011

هاجم رمزا . . تكسب أرضا









الله يحرقكو خربتو البلد

ديل الكلب عمره ما يتعدل أبدا

يا ولاد الكلب يا رمم


الجمل اللي فاتت دي وغيرها كتير ملخص تعليقات المواطنين المصريين في كافة المواقع الإجتماعية والصحفية . . حاجة غريبة قوي بتحصل يوميا وبجد خنقتني . . ومش إدعاء مثالية لا سمح الله بس عالأقل بحاول ألتزم الحيادية . . سؤال بيستفزني جدا في كل مرة بقرأ فيها أي خبر عن أي حادث – والحوادث كتير طبعا – ليه الناس بتصمم إنها تاخد جانب واحد من الصراع وتنحاز ليه ؟؟ . . يعني مثلا لو قرينا خبر حدوث مشاجرة أمام كنيسة , علي طول كل التعليقات شتيمة في السلفيين . . زي ما يكون المسيحيين مبيغلطوش . . وده بعيدا عن إن محدش من اللي بيعلقوا شاف حاجة بعينه أصلا . . بس ليه اللي بيعلق بينحاز ضد فريق معين ؟ . . ليه مبيفترضش خطأ الفريقين ؟ . . طب ليه مبيفترضش عدم حدوث خطأ أصلا ؟ . . ولا هو لازم يكون واحد شرير والتاني ملاك ؟ . . أصل ده مش فيلم عربي بنتفرج عليه يعني !!

حاجة تانية وبتوجه بالدعاء فيها علي كل رئيس تحرير لا يراعي ضميره لما يكتب عنوان يثير الفتنة الطائفية أو يثير حفيظة الناس ضد الشرطة . . ليه كده ؟

عايز أقوله إن فيه ناس مبتقراش الخبر . . والله فيه ناس بتكتب تعليق من مجرد قرايتها للعنوان . . زي بالظبط لما نقرأ خبر بيقول ليلي علوي تصل كوكب المريخ علي متن سفينة الفضاء أبوللو 20 . . وبعدين لما نقرأ الخبر نكتشف إنه قصة فيلم جديد بتعمله . . !!

حاجة تالته . . ليه لما ناس بتهاجم المجلس العسكري بإعتباره ذو سياسة متخلفة وشبه متواطئة . . الفريق التاني يتهمها بالخيانة والعمالة والوقيعة بين الشعب والجيش وكل الهبل ده . . وهم يردوا إنهم خونة وعملاء وإسلاميين بما إنهم متفقين مع الجيش . . رغم إن أصلا الكلام مش علي الجيش والجيش ملوش علاقة بالمجلس العسكري . . ورغم إن الإتنين نيتهم "ممكن" تكون سليمة بس برضو بيهاجموا بعض دفاعا عن فكرة كل واحد فيهم .

عايز أتكلم عن مثال حصل قريب . . موضوع قسم الأزبكية . . أيا كان اللي حصل لأني برضو مشفتش . . بس شفت اللي الناس بتكتبه . . وناس تانية محرضة بدون ذكر أسماء ربنا ياخدهم . . ليه الناس اللي نزلوا في الثورة بياخدو صف الفريق اللي ضد الشرطة أيا كان غلطان أو لأ ؟ . . وليه الناس اللي تعرف ظباط أو ضد الثورة تاخد صف الشرطة وتطلع التانيين غلطانين ؟ . . ليه منفترضش إن الإتنين غلطانين ؟ . . أو ليه ميبقاش مفيش حد غلطان ويبقي سوء تفاهم ؟ . . ليه يا يمين خالص يا شمال خالص ؟ . . ده حتي خير الأمور الوسط !!

وعايز كمان أتكلم عن مثال بعيد . . خالد سعيد . . والله العظيم أنا متأكد إن 80 % من الناس اللي حاطة صورته علي مدوناتهم وأكونتاتهم وبروفايلاتهم ولا يعرفوا عنه حاجة . . ولا حتي يعرفوا تفاصيل الموضوع بالكامل . . وأنا مش جاي النهاردة أقول إني عرفتلكو السر الكبير . . بس أنا بشوف بعيني ظباط أو ناس من الشرطة أو حتي ناس مش ثورية أو ناس ضد الثورة بتهاجم الرمز اللي الفريق التاني عمله وبتقول . . آدي تقرير الطب الشرعي . . وآدي شهادة الجيش إنه مفصول . . وآدي لفافة البانجو . . وآدي شهيد البانجو ورمز الثورة . . وطبعا الفريق التاني عايز يحتفل كل شهر بذكري وفاة شهيد الثورة ويخلد إسمه في التاريخ بما إنه سبب الثورة وليل ونهار يشتم في الشرطة وفي النيابة وفي الطب الشرعي وفي القضاء بتاع النظام الفاسد . .

طب أنا نفسي أسأل سؤال . .ليه ما نفترضش إن زي ما ممكن يكون إتضرب وإتعجن من المخبرين . . ممكن برضو وفي نفس ذات الوقت "وسبحان الله" يكون كان معاه لفافة بانجو وبلعها و واد فاشل . . يعني ليه يا كده يا كده ؟ . . ليه مينفعش الإتنين مع بعض ؟؟؟

يا سيدي الواد إتضرب فعلا ومات وهجبلك حقك وهحبس المخبرين والظابط ومعترف بالتعذيب اللي حصل . . بس لو الواد طلع معاه بانجو فعلا ليه مش عايز تصدقني ؟؟ . . ليه مدام إتضرب يبقي ملاك ؟ . . ده إنت غريب قوي !!

طب أنا عن نفسي ولا يفرق معايا إذا كان هو رمز الثورة أو سببها . . كل اللي يهمني إن الثورة حصلت فعلا مش أكتر إن شاالله يكون سببها أمريكا وعملائها زي ما ناس تانية بتقول . . برضو كل اللي يهمني إنها حصلت وبدعي ربنا تكمل . . وميزعلنيش والله ولا يحسسني إني فقدت إتزاني وما أؤمن بيه إنه - إفتراضا - يطلع مش ملاك . . 

 يعني مش عشان واحد مع الثورة يبقي يدافع عن خالد سعيد – كمثال يعني – ومش عشان واحد ضد الثورة يبقي يهاجم خالد سعيد . . ولا هو الشعب ده هيفضل طول عمره يحب الرموز و يمجد فيها - ويشتم فيها - أيا كانت هي مين . . علي إعتبار إن مبارك كان رمز بقي . .

ليه بنتلكّك لبعض ؟ . . ليه بننحاز ضد بعض ؟ . . ليه مبنسمعش للآخر ؟ . . ليه بنتلهف علي إصدار الإتهامات ؟ . . ليه مبنحكّمش عقولنا ونهدي ؟ . . ليه بنجتهد عشان نكره بعض ؟

يا رب إهديني وإهدي الجميع . .




16 التعليقات:

Unknown يقول...

للأسف أنا كمان بسأل نفسي الأسئله دي أنا مبقتش أقرى التعليقات بتاعة أي خبر و مباقتش أعلق عند أي مدونه كاتبه رأي متحيز ضد حد, و كمان مباقتش بعلق عند أصحابي على الفيس لما ساعات بيكتبوا كلام مستفز بيعبر عن رأيهم و أنا رافضاه لأني عارفه لو قلت رأيي هتهاجم و يمكن نخسر بعض...حتى معندناش ثقافة احترام الرأي الآخر عشان كده ببعد عن أي حوارات و لأن الآراء بتختلف حتى لو لنفس الشخص في اللفتره الملخبطه دي.
تعرف لما قريت خبر قتل (داغر) كان أول تعليق "عشان تفرحوا بنكسة 25 يناير"...! تخيل كأن الثوره ليها علاقه بأي قضية قتل.
بجد حاجه تحزن...بس معلش الصبر و خليك على موقفك
مش عايزه أنتكلم عن موضوع خالد سعيد عشان ماعرفش و ما شوفتش بس طالما مات من التعذيب حتى لو معاه بانجو بردو هتبقى جريمة و أنا مش هنسى اني من ساعة حكايته و قلبي واجعني على البلد مع ان في قبله كتير و بعده بس حكايته هزتني أوي .
موضوع مهم و طرحك رائع كالعاده
تحياتي ليك

القدر و انا يقول...

اول مرة اتشرف بالدخول لمدونتك
اولالكل من سطر حرفا ابادله حبا وتقديرا وعرفانا ..شكرا لك
شكرا لكلماتك المؤثرة ومواساتك لى .... لا اراكم الله مكروها لعزيز لديكم وانا لله وانا اليه راجعون

ثانيا من الاخر ليه يا اما يمين يا اما شمال
فعلا ينقصنا الاعتدال
انا حاسة اننا امام عماره وقعت لان تحتها رطوبة وعفانة جامدة جدا وبدل ما نقوم ننضف ونشيل الهدد ونبدا البنا قاعدين نلف وندور حوالين الهدد .. نحكى ونعيد ونزيد وناسيين اننا لازم نبنى غلشان نلاقى اللى يحمينا من العواصف
فعلا لك الله يا مصر

فتوح أبو المفاتيح يقول...

حلو الكلام
حلو جدا الكلام
^_^
وصح عندك حق
بس الناس في مصر بتستسهل التفكير
وعاطفية منحازة
ببساطة

FAW يقول...

شيرين

بلاش داغر

واحد صاحبي شقتهم إتسرقت راح منزّل ستاتس عالفيس عشر سطور شتيمة في الثورة وكأن قبل الثورة كنا المدينة الفاضلة ولما دخلت أتكلم معاه بمنتهي الهدوء والله , قعد يتّريق عليا :)

بدون نقاش إحنا كلنا ضد أي تعذيب بس أنا بتكلم علي الناس اللي بتتحيز لرأيها عن جهل بالتفاصيل أصلا

متشكر جدا لمتابعتك وذوقك

تحياتي . .

FAW يقول...

القدر وأنا

العفو ده واجب علي أي حد

تشبيه حضرتك واقعي والله . .

ولما بنبدأ أي بناء تحسي إن الأسمنت مش لاحق ينشف من كتر اللعب فيه :)

تحياتي . .

FAW يقول...

فتوح أبو المفاتيح

أهي العواطف اللي بتقلب بعمي دي اللي هتودّينا في داهية

نورت المدونة وتنور دايما

reemaas يقول...

احلى ما فى موضوع قسم الازبكيه اذا كان فيه حاجة حلوة يعنى هم شهود العيان اللى اقروا بالاجماع ان الغلط غلط السواقيين واللى اعترفوا ان الناس هى اللى ضربت السواق بسبب تعديده على الظابط وابسط تحقيق هيجيب حق الظابط هيعرف الناس ان الظباط مش هيفضلوا كبش فدا كتير


نيجى بقى للسؤال

مش متعلق بالثورة السؤال ده دى طباع ناس يامصطفى

اديك مثال امبارح الناس مسكت حسن شحاته شتايم وارحل ومش عاوزينك وحاجات فظيعه

لو انتصر بقى كان اتعملوا اييييييييه

هو كده الناس مالهاش الا اللى قدامها

فى ناس بتقول اللى ياخد الثورة جابتنا لورا
ليييه
مالوش الا فهمه ومابيحاولش يدور على فهم تانى

FAW يقول...

reema

والله أنا مستني التحقيقات ومش قادر أحط تصور عشان مبقتش أستبعد أي حاجة


وطباع الناس أنا نفسي إنها تتغير . .

دي إسمها وطوّ وغباوة , وساعات إستعباط لأغراض دنيئة

نورتي . .

ميرام يقول...

معاك في كل حرف بتقوله
ومطابق للي عايزة أقوله من كلامي
طيب انت سمعت عن حادثة الأزبكية
(: انا شفت موضوع سواق التوكتوك قدامي
(:
وبجد بقيت بقول مصر ضاعت طول مالناس بالجهل وعدم الحيادية دي
يعني هما عايزين ظابط الشرطة يعمل ايه ؟!!
سؤال بريء (:
يقول للمجرم كخ عيب(:
حاجات كتير قوي ومفاهيم أكتر غلط
احنا اه شعب اهبل وعاطفي وتقوله يمين يروح يمين وتقوله شمال يروح شمال
تزعقله يكش تسيبه براحته يهيص
بس بجد الي مضايقني اني شايفه لهجات تحريض فتنة وتعصب كتير قووي
ادخل اقرأ نوارة أخر بوستاتها .. وابتسم !
نعم ..!؟؟
ها ؟؟؟ اسقاط مين وتجميد ايه ؟؟! الداخليه ؟؟؟
طب ليه ؟؟ عشان سواق توكتوك وسواق ميكروباص ؟
!!!!!!!!!
وشوف الفيديوهات شوية كمان سواق التوكتوك الملاك هيبقى خالد سعيد 2

بجد ربنا يستر على مصر :(

المهم بعيدا عن كل دا
مش غريب انك ظابط بتكتب وترسم ويمكن مش بعيد تطلع بتغني ؟!
(:
("
تحياتي

FAW يقول...

ميرام

نورتي المدونة وإسمحيلي الأول أبدي إعجابي الشديد بمدونتك

ربنا يرحمنا من طبخة "بيقولك" علي رأي واحد

فعلا عاطفية وتسرع الناس هي السبب في وجود و ظهور واحدة زي نوارة . . أنا متابعها عشان بس أعرف الفكر المضاد . . ربنا يهديها أو ياخدها

هحكيلك أنا علي حاجة . .
واحد صاحبي ظابط ماشي بعربيته ولابس ميري , سواق ميكروباص خبط فيه من ورا , نزل من العربية ولسه بيبص علي إكصدام عربيته , لقي السواق بيزعق و يشتم . . لسه هيرد عليه . . لقي الناس اللي راكبه الميكروباص وناس في عربيات تانية بتزعق و تشتم فيه برضو . . راح راكب عربيته وماشي . .

بالنسبة لملحوظتك
هي غريبة . . بس لو إنتي عايزاها تبقي غريبة
ويا ريت بعرف أغنّي . . بس كنت هغني لمراتي مش للـ"جيل"

تحياتي . .

ميرام يقول...

(:
شكرا يافندم ده بس من ذوقك
(:
أصل أنا صحابي بيتهموني بعدم الحيادية لما اتكلم كدا عشان اخويا ظابط وقرايبي ظباط
بس بجد أنا في منتهى الحيادية ولما بتحصل قدامي حاجة غلط بقول
(:
بمناسبة القصة
كنت راكبة تاكسي رايحة الجامعه المهم الشارع كان واقف وسواق ميكروباص بيزعق لظابط والظابط بيقولو انت تحترم نفسك انا قلتلك يااسطى .. تقولي ياباشا (: (: (:
انا مغلطتش فيك بقولك ماتركنش كداا
بس طبعا الكلام من الطرفين بانفعال شديد
سواق التاكسي المبجل المحترم (: ركن موازي للميكروباص وطلع موبيله من عينة(أبو كامارتين ) (:
وبيصور !
وهو بيشتم شوف ولاد ال.... لسه بيزعقوو مش هيتغيرو ....!!!!!
قلتله حضرتك شفت الي حصل !؟ حضرتك تعرف مين غلطان ؟؟! وتعمدت أعلي صوتي عشان يتسجل ؟(:
قالي لااا بس باشا على نفسو مش علينااا(: (:

الظابط شافه ياعيني كان ملازم أول صغنون اتجنن أكتر مهو هيلاقيها منينن قالو انت بتصووووور اييييييييه (: قام السواق مشي وهو حاسس بالاهانه ههههه

هههههههه
أقنعتني ّ! غريبة لو هشوفها غريبة
أصل انا برضو بيقولولي غريبه انك بتكتبي رغم انها مش غريبه ولا حاجة
بس يعني الظباط الي اعرفهم اخرهم كان رجل المستحيل أدهم صبري (:

تحياتي

FAW يقول...

أكتبي ما تشغليش بالك بحد . .

وماله بس رجل المستحيل ؟
ياريت الظباط تبقي نصه :)

نورتي . .

Emtiaz Zourob يقول...

انا عن نفسي بدأت اشك في كل حاجة ، إلا في نفسي طبعا !!!

الواحد مش عارف مين الصح ومين الغلط ، مين الصالح ومين الطالح .. مين الجاني ومين الضحية ..
مين ومين ومين .. عن جد راسي بتجعني وحاسة انها بدها تنفجر من كثر التفكير .
خالد سعيد مات ، واكيد هو بشر زيي وزيك وزي ناس كثير ، يعني مش ملاك ، ليش مثلا مش ممكن يكون معاه لفة بانجو ، مع انه نص الشعب المصري بيحشش يعني !! " دي مش شتيمة ع فكرة " بس هيك الاحصائيات لو اعتبرنا الحشيش والبانجو مخدرات يعني ..
خالد سعيد اتظلم واتقتل ولازم يتحاكم قتلته مش علشان هو ملاك ولا علشان شيطان ، علشان هو انسان وتم قتله ، زي السيد بلال وغيره وغيره ، يعني ليه مثلا ما عملوش صفحة كلنا السيد بلال ، طيب ماهذا على الاقل معروف انه انسان متدين صالح وتم قتله بالتعذيب داخل السجن .. ومافيش شكوك حول قتله لا ببانجو ولا خلافه ..

::::::::::

القصص كثيرة وزي ما انت قلت ،، ماكناش ملائكة قبل الثورة ولا راح نبقى ملائكة بعد الثورة ..

::::::::::

دمت بخير وربنا يعدي هالايام على خير

FAW يقول...

وجع البنفسج

أثرتي نقطة كويسة فعلا كنت قريت مقال لواحد مش فارك إسمه إتكلم عنها

وهي إن الطبقة المتوسطة لما بتدافع عن قضية - وهي أصلا الطبقة اللي صوتها عالي - بتدافع عن قضية تخصها

يعني لما واحد يتعذب منها هيبقي الإهتمام بيه أكتر من واحد من طبقة فقيرة حتي لو كان متدين
ودي أنا بعتبرها نقيصة

بيقولوا أصله واد إبن ناس . . وهم جواهم مش قصدهم إنه محترم أخلاقيا قد ما قصدهم مستواه المادي والإجتماعي مرتفع إلي حد ما . . طب مش دي عنصرية برضو ولا أنا ببالغ ؟

نورتي . .

nesma hatem يقول...

العنوان عاجبنى أوى :)

الموضوع فى وقته جدا ... احنا أكتر حاجة محتاجنها دلوقتى اننا نبص للموضوع من الناحيتين
وبما أنك أتكلمت عن موضوع خالد سعيد
بصراحة بقى انا مستفزنى جدا فكرت أنه بقى رمز الثورة لمجرد أنه أتضرب يعنى لو على الضرب المعتقلات مليانة
ولو على التلفيق برضوا الأقسام مليانة ، ومش أستهانة بيه ولا باللى حصله بس هى وجهة نظر فى عدم أحتكار رمز الثورة لواحد بس مع أننا لو دورنا هنلاقى زيه كتيير

بقيت حاسه ان الناس معظمهم لازم يبقى بياخدوا حق حد أو بيكرهوا حد علشان عمل حاجة مش عاجباهم حتى ولو مكنتش فيهم علشان يوافقوا على الثورة
أو حتى على أن فيه ظلم

FAW يقول...

nesma

مبسوط إنه عجبك :)

فعلا الظلم كتير والتعذيب بالهبل

وضروري فعلا إن يبقي فيه قضية بيتركز عليها علي حسب تفاصيلها . . بس المهم بقي معايير التركيز ده إيه . . وأسلوب مناقشة التركيز ده إيه

منورة . .