الأحد، 17 أبريل 2011

EGYPTian TAG











أول مرة أعمل تاج عن أي حاجة . . مش عارف ليه موضوع مبيشدنيش . . يمكن عشان معظمها بتبقي أسئلة شخصية ودي حاجة بفضل أبتعد عنها . .


التاج ممرر من المدونة الجميلة شيرين صاحبة مدونة حدوتة مصرية 


السؤال الأول : هل توقعت ثورة 25 يناير ؟


أبقي كداب لو قلت إني توقعتها بالشكل ده تحديدا . . بس بصراحة كنت حاسس إن فيه حاجة هتحصل في مدة أقصاها (فور إعلان نتيجة الإنتخابات الرئاسية القادمة) - بإعتبار ما كان :)




السؤال الثاني : وهل كنت من ثوار ميدان ( التحرير - الكنبة - الكمبيوتر - حدد الميدان الآخر الخاص بك ) ؟


ثوار الكنبة دول اللي كانوا بيشجعوا من قدام التليفزيون يعني ؟ :))


للأسف الشديد وحاجة مش قادر أتصالح مع نفسي فيها , ونظرا لإعتبارات معروفة ولظروف شغلي في العريش اللي خلتني معرفش أخرج من سينا أصلا , مروحتش غير بعد غزو بائعي البطاطا والترمس فملقتش نفس الروح الأولي اللي كنت بدور عليها . . معرفش إذا كان نقدي وهجومي علي - مجازا - زمايلي كضابط شرطة يعتبر ثورة أو لأ . . بس يكفيني إحساس الخوف اللي لقيته من ناس حواليا من حاجات بكتبها وبقولها إني أحس إني - إلي حد ما - شاركت . 


السؤال الثالث : ما لم تنجح الثورة في تحقيقه هو ؟ 


يعني أنا في رأيي المتواضع إن رغم تضامن كل فئات الشعب مع بعضها خلال أيام الثورة و رغم كل اللي عامة الشعب ساعدوا بيه المثقفين والناشطين عشان يوصلوا لمطالب الثورة . . إلا إنهم للأسف وعن غير قصد - لا يشفع لهم - مقدروش الجميل ده و مساعدوش الناس إنهم يفهموا المرحلة صح . . لا زال لحد النهاردة مفيش أي مجهودات لتوعية الناس بحقوقها و واجباتها ونظام الحكم الصحيح اللي المفروض يطالبوا بيه . . زي ما يكونوا كومبارسات مجاميع أدوا دورهم وقبضوا و روحوا . . للأسف الشديد الجهل هو الكارت اللي كان بيعتمد عليه النظام القديم في الإستمرار , واللي الحمدلله ولطف من عند ربنا رغم وجوده قامت الثورة . . فأنا شايف إن الثورة مقدرتش تصحح للنخب قيمة وقوة وتأثير جموع الشعب .


السؤال الرابع : أكتر شئ فرحك في الثورة هو ؟


من غير كلام كتير . . مكانة المواطن المصري خارج مصر وخارج حتي العالم العربي اللي رجعت أحسن من الأول وهتزيد إن شاء الله .

السؤال الخامس : الشخصية اللي أعجبتك خلال الثورة ؟ 

كل واحد أعرفه كنت فاكره سلبي ومكنتش أتخيل إنه هيخرج من بيته وإكتشفت عكس كده الحمدلله .

السؤال السادس : الشخصية التي إحتقرتها خلال الثورة ؟

برضو كل واحد أعرفه كنت فاكره بني آدم وعنده إرادة و نخوة و طلع مجرد عبد جاهل وندمت إني عرفته . . 
بس إنطبقت عليهم مقولة للدكتور مصطفي محمود عجبتني قوي . . ( الأحرار يبكون شهدائهم  والعبيد يبكون جلاديهم )

السؤال السابع : أطرف ما سمعته خلال الثورة ؟ 

مصدقتش قد إيه الشعب ده دمه خفيف بداية من ( إرجع يا ريس إحنا كنا بنهزر معاك ) و حتي (مرة شعب راح لرئيس مخلوع قاله : عندك فلوس ؟ . . قاله : لأ . . وهو عنده جوه !! )


السؤال الثامن : القناة التي تابعت من خلالها أحداث الثورة ؟

الجزيرة , بي بي سي عربي , أون تي في , الحياة 

السؤال التاسع : الجريدة التي كنت تقرأها لتتابع أحداث الثورة ؟ 

المصري اليوم والدستور الأصلي

السؤال العاشر : الكاتب المفضل خلال الثورة ؟

بلال فضل وإبراهيم عيسي 

السؤال الحادي عشر : المذيع ( المذيعة ) المفضل خلال الثورة ؟ 

لو التفضيل لإعتبارات تانية خالص ففيه مذيعات كتير :))

السؤال الثاني عشر : كلمة تقولها لشهداء وجرحي 25 يناير ؟ 

يا بختكو

السؤال الثالث عشر : متقولش إيه إدتنا مصر , قول هتدي إيه لمصر . . عندك حاجة تديها لمصر ؟ 

عندي شغلي وتعليمي ومبادئي وتصرفاتي  اللي عمري ما هوظفهم في حاجة تسئ لمصر 

السؤال الرابع عشر : من سترشح لرئاسة الجمهورية ولماذا ؟

قد إيه جوايا قهر إني مش قادر أشارك في أي إنتخابات بحكم الوظيفة , بس لو هرشح أعتقد إن أحسنهم البرادعي . . عدو عدوي يبقي صديقي .

السؤال الخامس عشر : لو أصبحت رئيسا لمصر ما هي أول ثلاث قرارات لك ؟

لو أصبحت رئيس هيبقي كمان 14 سنة عالأقل - آل يعني - بس لو فرضنا إنه دلوقتي . . 1- تطبيق أي تجربة ناجحة في التعليم لخطورة الإنتظار حتي إنجاح تجربة محلية . . 2- توفير السكن لجميع أفراد الشعب بأي طريقة ولو بتسهيلات - مشروعة - لرجال الأعمال مقابل توفيره . . 3- البدء الفوري في مشروع إستغلال الطاقة الشمسية المهدرة في دولة هي الأولي عالميا في جدوي إستخدامها 

السؤال السادس عشر : لو أعطوك نصيبك من المليارات المسروقة , ماذا تتوقع أن يكون نصيبك منها وماذا ستفعل بهذا المال ؟ 

الحقيقة أنا مش عايز نصيبي من المليارات المسروقة ومش شايف أصلا إننا هناخد حاجة . . الفلوس دي المفروض أول حاجة توجه لتسديد الديون الداخلية - عشان مش عايزين حكومة مكسور عينها - ثم الديون الخارجية عشان إحنا مش أقل من دول تانية كتير هي اللي بتداين . . رغم إن الديون أكتر بكتير بس أنا شايف إن دي أولوية هتوفر حتي جزء كبير من الميزانية بيروح لفوايد الديون ممكن يفيدنا في أي مشاريع هتؤدي علي المدي الطويل لتحسين مستوي المعيشة . 


8 التعليقات:

Emtiaz Zourob يقول...

والله انا سعيدة بفكرة التاج هذا ، عن جد بيعرفنا أكثر وأكثر على أحلام ومشاعر وأفكار المدونيين المصريين كشباب فيما بعد الثورة ..
كل ما اقرأ التاج على صفحة مدونة القايها مختلفة خالص عن الثانية .. بجد ربنا معاكم يارب ..
اعجبتني يا مصطفى مقولة مصطفى محمود .. "الأحرار يبكون شهدائهم والعبيد يبكون جلاديهم " اول مرة اسمعها ..
وماتزعلش انك كنت من ثوار الكنبة .. فاحنا كمان كنا من ثوار الكنبة بسبب الحصار ..
بالتوفيق دايما..

Unknown يقول...

مصطفى شكراً ليك أنا مررتلك التاج ده مخصوص عشان أنا شايفه ان كان ليك دور بكتاباتك و نقدك و انت في موقع حساس جداً و كونك كشفت عن مهنتك في الفتره دي جرأه مش كتير يعملوها.
إجاباتك أسعدتني جداً خصوصاً أكتر شئ ضايقك في الثوره و أكتر ناس إحتقرتهم عندك حق.
تحياتي ليك و ربنا يوفقك في حياتك


تعالى هنا إيه حكاية المذيعات دي؟!
:)

FAW يقول...

وجع البنفسج أو إمتياز

شرفتيني و شكرا علي متابعتك وأعذريني لو كنت كتير بقرأ مدونتك ومش بعلق
بس للأسف الشديد ساعات بتكسف من جهلي ببعض القضايا الفلسطينية فبفضل الإلتزام بالصمت

نورتي

FAW يقول...

شيرين
شكرا علي ثقتك ورأيك اللي بحترمه دايما

والله هي لبني عسل بس . . بس لو كانت أصغر بكام سنة :))

reemaas يقول...

اول حد حبيت اعرف رائيه يا مصطفى بحكم بوظيفتك

وعجبنى جدا برنامجك الانتخابى لما هتبقى ريس ان شاء الله

FAW يقول...

reemaas

ده شرف ليا يا فندم حضورك :)

وأعذريني بالنسبة للمدونة التانية التعليقات معصلجة شوية معرفتش أرد عليكي . .
مراحل الكآبه هتتباعد كتير بعد كده متقلقيش :) . . وهحاول أنشر أسرع من كده حاضر .

نورتي

غير معرف يقول...

اجابات موفقة :))

FAW يقول...

blue

شكرا :))