السبت، 26 فبراير، 2011

إلي شعب مصر ( العظيم )

 مش هنطق بكلمة . . 


يوم 24 فبراير كنت على الهواء فى اذاعة راديو هيتس المصرية اتحدث الى الجمهور كضيف للحلقة عن مشاريعنا الوطنية القادمة و احلامنا و كنت متحمسا عندما ايقنت ما يجب فعله من اجل مستقبل مشرق و هو ربط جميع النشاطات على اساسا واحدا و هى الاخلاق . انا مؤمن ان التغيير لم يكن فى شخصا واحدا فقط ان يرحل و لكن فى انفسنا و فى اخلاقنا و فى طريقة تعبيرنا و فى احترامنا لاراء الاخريين و فى معاملتنا للاخريين . اشياء كثيرة فُسدت مع النظام الفاسد و انتشرت الى ان وصلت الى كل فرد منا .
انتهيت من الحلقة و كنت فى حالة من الصمت و انا اقود سيارتى متجها الى منزلى فى المعادى لكى انام حيث اننى كنت مسيقظا من الليلة الماضية حيث اننى لست متعودا على الاستيقاظ المبكر و نظرا ان الحلقة كانت من الساعة ال8 حتى ال10 . ذهبت الى النوم و بعدها سمعت الزمامير فى شارع الجزائر كثيرة فقلت لنفسى "اهو رجعنا للفوضى تانى و حالة الهرج و المرج و عدم احترام الطريق" و بعد قليل سمعت صياح الناس . قلت "و ادى الاخلاق الى بنتكلم عليها و بنقول نحترم بعض فى الشارع " . فتحت الشباك و رايت الدخان الكثيف فجريت و ارتديت ملابسى و ذهبت الى ميدان الجزائر و  انا فى فى طريقى اسمع السب و اللعنة على ظباط الشرطة و الداخلية و انهم يجب ان يقتلوا جميعا و قابلت بعض رجالة المنطقة فحكوا لى قصة و قابلت اخريين فحكوا لى قصة اخرى و البعض قصة ثالثة و كنت تائها حتى وصلت الى السيارة المحروقة. وجدت الناس ملتفيين حول شخصا يصرخ و يقول من النهردة مفيش حكومة ..انا الحكومة .. انا حسنى مبارك .. انا احسن منه .. انا حرقت العربية. يلا بينا نطلع على قسم صقر قريش
فكعادتى ادخل وسط الزحام و لا اقف استمع و اردد خلف احدا الهتافات و لكن ادخل الى مصدر هذا الصوت و اتحدث الى من يصرخ بالعقل و كنت احمل مسدسى (بطلقات الصوت) للتهويش فقط و كنت اضعه خلفى و ارتدى البالطو فوقه كى لا يراه احدا . فعندما بدات اتحدث معه سكت الجميع ...ظانيين انى ظابط من الجيش او امن الدولة و هذا ما علمته لاحقا عندما اتى الى بعض الاصدقاء يحذرونى بان اذهب الان لانهم استمعوا الى البعض يقولون انى ظابط و سينتقموا منى !! و انا لا احمل اى توقع لسوء النية نظرا اننى فى منطقتى و رجالتى سيحموننى و بالفعل لم اذهب مع اصرارهم حينما استمعوا ان هناك النية للهجوم على فى اى ثانية .
اخذت السواق الذى يدعو الى حرق القسم و تنظيم المسيرة و جلسنا على جنب فى مطعم تايك اوى فى الميدان و قمت بدعوته ليشرب الماء و يهدا و يحكى لى ما حدث .. و طبعا كانت حكايته مثل واحدة من القصص التى استمعت اليها من قبل مع بعض الاختلافات فى التفاصيل انه اضاف ان الظابط كان معه عساكر و امناء شرطة!!!! مما جعلنى احتار .. اليكم السيناريوهات التى استمعت اليها و اؤكد انى لم اراها

الظابط كان معاه 2 اصحابه و بيسكروا و محششين ... فكسروا على السواق الغلبان الى بياكل عيش و نزلوا ضربوه و لما اتلم عليه الناس و السواقين راح جاب المسدس من العربية و ضرب السواق بالرصاصة فى رقبته فاتلموا عليه الناس و اصحابه جريوا و هو اتضرب و قلعوه هدومه و رموه جوه العربية و اخدوا ازازة الخمرة دلقوها عليه و حرقوه هو و عربيته الدودج رام 

الظابط كان معاه ولاده و امه و كان بينزل امه و الولاد فاتخانق معاه السواقيين و ضربوه

الظابط كان معاه اخوه الصغير و اتخانقوا مع السواقيين و اخوه جرى و امه رجعت و لحقته

رغى رغى رغى سيناريوهات اشاعات كذب و حقائق و لما تيجى تسال اى حد انتا شوفت بعينيك يرد يقولك "بيقولك" .. و اصبحت كل المصادر قناة بيقولك الى بتنبع من الفتى الشعبى و كل واحد يزود حته من عنده و يحبكها و يجملها و يضيف حاجة لحد ما توصل للمواطن فى الطبخة الشعبية مع تحيات مطعم بيقولك و اولاده .
بعد ما سمعت و اكلت طبخة (بيقولك) بصيت لاقيت السواقيين و معاهم البلطجية و قلبوا البوكس و الناس كلها بتقول الله اكبر و قعدوا يكسروا فيه و يطنطوا عليه و بعد كده حرقوه
بعدها سمعت الناس بتقول يلا بينا نروح نحرق قسم صقر قريش .. ساعتها وقفت ازعق و اقول يا جدعان الناس الى فى القسم مالهمش دعوة و الجيش هناك مش حيسيبكم تحرقوا حاجة كفاية تخلف و خليكوا هنا .. للاسف كنت زى الى بيدن فى مالطة و تحس ان الناس فى حالة اللا وعى على  ايه الى ممكن يجرالهم لو حاولوا يحرقوا القسم

جريت على عربيتى و روحت من الناحية التانية على صقر قريش و سبقتهم بالعربية و الناس متجهة على القسم و الشر و الغضب ماليهم قمت وقت قدامهم و طلبت منهم و انا كنت بتوسل اليهم ساعتها ما يقربوش ناحية القسم لان مالهاش لازمة و مش حنوصل لحاجة و بعضهم اقتنع و لكن اصروا يروحوا و يخشوا يقولوا سلمية .. طلبت منهم انهم يفوضونى اننى اتكلم عنهم مع ظابط الجيش و حفهمه الى حصل و وافقونى اول ما قربنا بنظام فجأة بدأ الهرج و المرج و ابتدوا يجروا على القسم تانى قمت عملت انا و الرجالة الى معايا درع بشرى عشان ما يعدوش علشان كنا خايفيين عليهم ... انا عارف ان الجيش عمره ما يضرب طلقة على شعبه لان وظيفته انه يحمينا بس برضه الجيش مش حيتهاون مع الفوضى و الحرق و التدمير ... فضلنا عاملين الدرع البشرى و نزقهم بعيد و لحد ما هديوا و الجيش تعامل بحكمة معاهم بصراحة و بعدين اقنعتهم ان القعدة قدام القسم مالهاش لازمة و تعالوا نرجع الميدان و نطالب بحق السواق بطريقة سلمية و نعتصم علشان الاعلام يوصل الرسالة لان هى الطريقة الوحيدة الى ممكن تعبر بيها عن غضبك ...الحمد لله اهل السواق وافقونى و الناس طلعوا على الميدان و ابتديت اعمل معاهم خطة الاعتصام انها حتبقى سلمية و جوة الميدان علشان ما نعطلش المرور على سكان المعادى و علشان حالة الذعر عندالاهالى الى فى البيوت لازم نحافظ على  و النظام و الادب العام .
ماشى معاهم و الهتاف شغال و انا اقول أههه و هما يرددوا ورايا و كل ما يحاول حد يقول حنروح نهد القسم اقول سلمية و هما بردوا يرددوا سلمية لحد ما وصلنا الميدان تانى ...
لاقيت ساعتها عربيات ميكروباص كتيرة و عليها ناس كتيرة بسنج و مطاوى و شوم و الشر فى عينيهم و عايزين الظابط و اهله باى ثمن ..طبعا اكتشفت الحقيقة المرة انه ابن ظابط مشهور فى المعادى و ان السواقيين كلهم عارفيين بيته فلقيت البلطجية و الناس وراهم شايليين سيوف و سنج و شوم و متجهيين على البيت الى جنب ميدان الجزائر .
حاولنا نمنعم و نتكلم معاهم بالادب و كنت بواجه مشاكل كتيرة ...اولها انى واقف قدام 50 بلطجى ده غير ال100-150 شخص معاهم و ده غير الى مالوش فى حاجة و داخل و السلام
المشكلة التانية انى كنت لوحدى و مش لاقى فى الزحمة اى حد من رجالة المنطقة و مش معايا غير 5 -6 و رجالة المنطقة كلهم فى الشغل او برا المعادى و كمان مش معانا سلاح ندافع عن البيت و كمان مفيش حد ساعتها لا من الجيش او الشرطة يدافع عنهم ... قعدت ازعق و اقول يا رجالة اهل الظابط مالهمش ذنب .. حرام عليكم .. و الجيران مالهاش ذنب .. و كاننى بكلم نفسى ... قام واحد منهم حد السكينة على رقبتى و قلى شكلك قريبه كده و شكلك ظابط اساسا قمت ماسك فيه انا و الرجالة و قولتلوا انا مازن سعيد مخرج سينما و كليبات و حتى لو ظابط ايه مشكلتك ؟؟؟؟؟ لو انا ظابط و ظابط غيرى غلط يبقى كلنا كده .. ابوس ايدك الاهالى الى فوق مالهاش ذنب ... كنا حنبتدى نضرب فى بعض قام الرجالة شدونى و حد من الحراس طمنى قالى مفيش حد فوق متخفش ...البوابيين فضلوا يقنوعهم انهم مش فوق و راحوا مستشفى النخيل
طلبت منهم و كانت كل الفوضى حوالينا اننا نمشى من تحت البيت .. الاهالى مالهاش ذنب فى الرعب و الاطفال ممكن يجرالهم حاجة و ممكن الناس ترمى نفسها من البلكونة ... المنظر كان مخيف و كانت زى الوكالة من غير بواب و اهل المنطقة مرعبوين من المناظر السكاكين و الشخييت و الهتافات و انزل انزل انزل و حنموتكم النهاردة و التهديد المستمر .. و ملحوظة مهمة ان شوية من الشباب الى كانت واقفة ابتدوا يعاكسوا السيدات و الامهات و البنات الخايقيين و بيبوصوا من فوق .. واحد بقولها انا طالعلك يا موزة حضرى الاكل و التانى ماسكلها سيف و بيقولها نزلى السبت عشان اتشعبت و اطلعلك يا قمر و حتى ما سابوش الست العجوزة فى حالها الى واضح انها كانت لوحدها و مرعوبة منهم و بتبكى و هى بتتهان من عيل صايع ضاربله برشام ...
بعدكده وصلت وحدات الجيش فى الوقت المناسب و فجأة الى عامل فيها دكر و السبع رجالة و الى كان عامل فيها روميو و بيعاكس و حيطلع للست العجوزة كلهم اتلموا و هتفوا الجيش و الشعب أيد واحدة و سلمية سلمية و فضلوا قاعديين قدام البيت ... الى اخدت بالى منه انهم مش عارفيين هما بيعملوا كده ليه بس ماشيين ورا طبخة بيقولك الى محدش اصلا متاكد اذا كانت صح او لا

رجعنا الميدان و قعدنا لاقيت الميدان عبارة عن ساحة .. كل سواق لامم ناس كتيرة مش فاهمة ايه الى بيحصل و بينشروا الطبخة بتاعت بيقولك و ابتدى الكلام تانى ان هما مش عايزيين الشرطة و كلهم لازم يعدموا فى ميدان عام علشان البلد تنظف و ان حق السواق ده مش حيروح هدر و انهم بايتيين هنا و مش حيمشوا الا ما يخدوا حقهم ... الطريف فى الموضوع انى سالت واحد منهم طب انتوا يا رجالة ايه مطالبكم .. قالى اننا نجيب الظابط و يتعدم هنا قدامنا .. قولتلوا فى مؤسسات فى الدولة حتقوم بدورها فى التحقيق و فى عدالة فى المجتمع و فى قضاء يصدر الحكم .. قالى باللفظ "يابا احنا شبعنا من كلام الكراريس الى بيدهولكوا فى المدرسة.. انتوا فاكريين يا بتوع بابى و مامى انكوا انتوا الصح .. احنا حناخد حقنا حناخده و النهاردة
و الطريف كمان انى كنت بتمشى فى ميدان الجزائر و لقيت ناس ملمومة حوالين سواقيين اساسا ماكنوش موجوديين ساعة الحادثة  و بحكوا ايه الى حصل و هو اصلا ماكنش موجود و بيتكلم على اساس طبخة بيقولك
و سمعت كلام غريب جدا و كره بينشروه ضد الداخلية و مطالبات انهم يلغوا الداخلية و انهم قادرين يحكموا نفسهم !!! على اساس اننا المفروض نرجع للملشيات المسلحة و كل عصابة او تجار مخدرات يحكموا و يحموا منطقتهم .. و الله العظيم ده الى كان بيتقال و ده كان ردى عليهم .. و احترم واحد من جيرانى .. كان واقف و قلهم يعنى انا فى كلية الشرطة و فى سنة تالتة يبقى انا خلاص فاسد و عميل و لازم اتحاكم .. ردوا عليه و قالولوا ايوا و انتوا كلكم لازم تشوفولكوا شغلانة تانية من هنا و رايح علشان مش حنسبكم تشتغلوا. ابتديت لهجة الحوار تحتد بينهم و انا بحييه على شجاعته لانه ماخفش ....ببساطة علشان لو اى ظابط اتشاف فى الوقت ده كان اتقتل فى ساعتها و مالوش دية . المشكلة التانية لما لقيتهم بيشدوا البوكس المحروق فقلت لنفسى و الله تمام الناس بتنظف و بتوسع الطريق ... لقيت العكس .. لقيتهم بيقفلوا الطريق تماما و مش عايزيين يعدوا حد و كانت ساعتها الساعة 8 باليل و الناس راجعة بيوتها .. فطلبت من واحد منهم بكل ادب انه بلاش كده علشان اهالى المنطقة مالهمش ذنب انكم تعطلوهم ... و افرض فى واحد عيان لازم يروح الدكتور و افرض فى واحدة حامل لازم تروح المستشفى و افرض ان فى ناس لازم يروحوا بيتهم ... هما ذنبهم ايه .. اتبلطج عليا و قلى مش شغلك .. دم اخونا لازم ناخد حقه .. قلتله و اهالى المنطقة دوول جزم مثلا و لا حيوانات .. مش بشر زينا و مصريين و ليهم حقوق انهم يرجعوا البيت؟؟؟طب تعالوا نكمل الاعتصام بس نسيب حارة واحدة للطريق ... هددنى و قالى يا كابتن امشى من هنا احسنلك و سيبنا نقفل الدنيا علشان يسمعونا !! قولتلوا هما مين الى عايزهم يسمعوك .. ما عرفش يرد عليا و سابنى و مشى ... بكلمه قام مشى برده و مفيش حتى احترام ليا و انا بتناقش معاه ...فضلت اقف مع كل واحد فى الميدان و اقنعت واحد واحد ان اهالى المنطقة مالهاش ذنب و ان لازم الطريق يتفتح و فعلا نجحت انا و الرجالة اننا نقنع الاغلبية الى شدوا البوكس و التكتك من كل النواحى و فتحنا الطريق  

كلمتنى زميلتى و هى من فريق الاعداد فى برنامج مصر النهاردة و هى علشان عارفة انى ساكن ناحية ميدان الجزائر فكانت عايزة منى اطلع على الهوا و اتكلم مع تامر امين و احكى بكل حرية الى حصل فانا اتحمست جدا و رحت للناس و بشرتهم ان كلامهم حيوصل للمصريين من خلال المكالمة بس يحكولى مرة تانية بجد ايه الى حصل ... طبعا كان عدى 4 ساعات على اخر مرة سمعت فيها ايه الى حصل فكانت قصص جديدة و ملخصها ان هذا الظابط متوحش و قليل الادب و ان والده ظالم .. فضلت ساكت و الناس كلها ملمومة حواليا و بصيتلهم كلهم و قلتلهم "بامانة هو ده الى حصل .. قعدوا كلهم يحلفوا و يقولوا اهه و الله العظيم " سكت تانى و قولتلهم يا جماعة انا حتكلم على التلفزيون المصرى و حقولهم كلامكم و لو انتوا ظالمين الظابط ,ربنا حيحاسبكم و حيحاسبنى على شهادة الزور .. لو سمحتم عايز حد من الى كان موجود .." قالولى كلنا كنا موجوديين يا بيه و الظابط ده لازم يتقتل " قلتلهم خلاص ماشى... ربنا اعلم ....
انا ما شفتش الخناقة و سمعت 50 قصة مختلفة و معظمهم بيغلطوا الظابط و خايف اظلمه و سألت الله ان يوجهنى الى الطريق الصحيح علشان عمرى ما حسامح نفسى لو ظلمت الظابط او ظلمت السواق .. و بقيت مش عارف اعمل ايه 

قعدت لوحدى فى الميدان و بتفرج على الناس و هى بتنفث غلها و بعدها وصل زملائى فى الشغل شريف سامى و محمد السباعى و زميليتين لينا كمان علشان نصور الحدث و نعمل لقائات و كنت ناوى اهديها لجميع القنوات هدية من زميل لزملائه الاعلامين علشان نبدا التعاون مع بعض ...طلعوا الكاميرات و ابتدوا التصوير و انا واقف بتكلم مع واحد من السواقيين لقيت فجأة واحد   بيعتدى على المصور شريف سامى و بيقولوا انتا مين و بتعمل هنا و مين الى جايبك .. جريت عليه و طبعا كالعادة اى حد بيجرى تلاقى 50 بيجروا وراه .. دخلت على الراجل و حشت بينهم لانوا كان عايز ياخد الكاميرا منه و لامم الناس حواليه هو و محمد و البنات ... قلتله الناس دى معايا و انا المخرج مازن سعيد و ساكن هنا اى خدمات ؟؟ قالى الناس دى مع مين ؟؟قولتلوا معايا و دول زمايلى فى الشغل و بنغطى ليكم الحدث علشان نوصل صوتكم و دى امانتنا قدام بلدنا و مهنتنا... قالى ورينى بطاقتك .. طلعتاهالوا و بعديها مسك فى محمد و قالوا انتا بقى ورينى بطاقتك .. قلتلوا يا ريس مش قولتلك الناس دى ضيوفى و معايا و انا من المنطقة؟!!! ورينى انتا بطاقتك قالى مش حوريك حاجة !!! انا ساكن هنا و مش متأكد منكم !!!1
صوتوا كان عالى و كان قاصد يعلى صوتوا علشان كل الناس تتلم علينا و فعلا حصل كده .. 1000 واحد منهم مسلحيين و عيال بسنج و مطاوى و مولوتوف محاصريننى انا و اصحابى (فى منطقتى) و انا الى كنت واقف معاهم من اول ما ابتدوا لحد لحظتها و فجاة بدأت الفوضى .. البنات جريت على العربية و الناس كلها بتجرى وراهم و و رانا وقفنا عند العربية .. 
عايزكم تتخيلوا اخواتكم و هما واقفيين متحاصريين من 1000 واحد مسلح و حيموتونا علشان واحد زعق معانا و قام قايل "دول اخوات الظابط"!!! عايزكم للحظة كده تتخيلوا الاصوات كده و هي بتقول حنموتكم يا "عملاء+ يهود+ اجانب+ قرايب الظابط" !! فى ثانية اتطبخت "طبخة بيقولك" بس المرة دى كانت تيك اواى !!! فى ثانية الف واحد بيجروا ورا اى صوت و اى تهمة بتلبس وش .. فى ثانية ... جالى انهيار عصبى و البنات جوا و قعدت ازعق و اقولهم يا جماعة الناس دى معايا و لكن للاسف اول مرة اشوف بعينى العمى و التخلف و الفوضى و ان ممكن اى واحد فى اى حتة يعمل اى مصيبة و يظلم حد لو صوته عالى بس ...صرخت فيهم و بقولهم طب البنات دى ذنبها ايه خلوهم يمشوا .. و البنات جوا مرعوبين و بيصوتوا و البنت سايقة و عايزة تطلع و لكن الناكانوا حاضنيين العربية و عايزيين يكسروها علشان ياخدواالكاميرات و اكيد حاجات تانية فى ظل الفوضى الى حاصلة ....لقيت واحد حطط المطواة ورايا و بيقولى لو مشيوا من هنا حغزك ... بصيتله و قولتله عيب عليكم دا انتوا رجالة المفروض و متضيعوش دم السواق هدر علشان دول بنات و حط اختك مكانهم .. فتحوا ليهم الطريق بالعافية و مسكوا فى محمد و شريف و واحد صاحبنا اجنبى انا مش فاكر اسمه بصراحة رجالتى وصلت جوا الزحمة و اهل المنطقى الى عارفينى كويس ظهروا و حميناهم و عملنا درع بشرى و اتزنقوا عندصيدلية العزبى و و قفنا تحت و برضه محاصريين ب1000 واحد بيقولوا حيموتونا علشان الراجل الى اتخانق معانا ماشى يقول دول قرايب الظابط او صحفيين اسرائليين !!! 
و لقينا العدد بيزيد و بنت و السلحة بتزيد و مفيش جيش و لا شرطة و لا حد يحمينا غير ربنا .. قريت الشهادة و  دخلت وسط الزحمة و ابتديت ازق جامد فيهم و ازعق حرام عليكم انا من هنا و الناس دى معانا ايييييه معاندكمش دم فوقوا بقا ..الناس الى اعتديتوا عليهم دول اصحابى انا و انا مخرج و اسمى مازن سعيد و واقف جنبكم من الصبح ليه بتمشوا ورا الاشاعات ...وقفتى معاكم علشان احميحم من انكم تقعوا فى الغلط تقوموا تغلطوا فيا و فى ضيوفى و كمان معانا بنات ... فين الرجالة ؟؟؟ السواق لو مات زمانه بيتفرج عليكم دلوقتى و مكسوف منكم .. سبتوا المظاهرة و الحق و الاعتصام و جريتوا ورا الاشاعات و الفوضى و الزحمة !!!

رجعت وقفت مع محمدو شريف سامى و خبتهم فى حته جنب البيت و مش فى بيتى علشان كانوا برضوا بكل غباء ماشيين ورانا علشان غباوة و خلاص و سابواالميدان و شوية منهم ماشيين ورانا و عامليين فيها اذكياء .. بس على ميين توهت امهم لحدلقينا مكان بعيدو امين و جنب البيت علشان لو حصل حاجة يستخبوا عندى و ربنا يسترها عليا و على اهلى ساعتها و يتكرر نفس المأساة بتاعت الظابط .. ..

فى الوقت الى كنت بتمشى فيه مع محمد و شريف سامى ...كلمونى فريق الاعداد من برنامجمصر النهاردة .. صوتى كان رايح من الى الزعيق و جسمى كله متنشن من الى حصل و اعصابى ضايعة .... اعتذرت للى كلمنى على التليفون و قولتلوا انا اسف مش حقدر اتكلم .. كنت بقولها و الحزن فيا عشان حاجات كتيرة .. اولها انى الحمد لله عمرى ما بخاف و لا بخاف اعبر عن رايى و لا بيهمنى حد ..تانى حاجة و بكل صراحة بقولها انى حزين على الظابط لان من الواضح ان الى حصل معانا ده من فوضى و غباء و قلة ادب هو نفس الى حصل مع الظابط ... واضح ان العمى الى الناس فيها و الكبت القديم الى بيطلع بلا وعي و الجوع و الشهوة وراء "طبخة بيقولك" الى قرفونا بيها كل اعلامى زائف او مضلل للحقيقة و كل واحد ليه طار و عايز يخلصه من حد يقوم يعمله "طبخة بيقولك" و يلم ناس و يهجم و تتطور الطبخة الى جريمة و بعدين لما تيجى تحاسب حد يقولك ما هو بيقولك
المهم رفضت المكالمة فى الاول عشان المدبحة الى كانت حتحصلنا و لو طلع اسمى على التلفزيون الناس حتعرفنى و انا لو اتكلمت حقول الى حصل بالظبط .. فكان خوفى على اهلى و بيتى من اى حد يكلم واحد من الى فى الميدان و يقوله ده مازن سعيد بيشتمكم و بيقول انه واقف فى الميدان و ساعتها حلاقى 100 واحد فى شوارع حواليين بيتى بيدوروا عليا علشان لما المعلومة حتوصلهم حتكون اطبخت صح ... طبخة بيقولك مازن....عميل ...شرطة .. امن دولة...اسرائيلى ... قريب الظابط ... ...صحفى من الموساد ....الخ الخ الخ و اكون انا ساعتها و بيتى و اهلى فى الضياع ...ففضلت الصمت و اعتذرت للى كان بيكلمنى فى البرنامج ... كلمتنى زميلتى المعدة للبرنامج علشان تستفسر ليه انا غيرت رايى ...حكيتلها بتلخيص فهمتنى .. و بس قالتلى انتا حتخاف و لاايه يا مازن ...ساعتها فكرت و قلت هو مين صحيح فى اللحظة دى حيتكلم على الهوا غيرى .. طلبت منها انهم ما يقلوش اسمى علشان اتكلم براحتى و طلعت و اتكلمت و  استنجدت بان يكون فى عنصر امنى موجود ..الناس دى حاسة انها اتظلمت و من حقها تعبر عن غضبها و لكن الفوضى الخلاقة حتودينا كلنا فى داهية .. اهل المعادى قاعديين فى بيوتهم مرعوبين من الى بيحصل علشان ممكن يحصل فلتان فى اى ثانية زى ما حصل معانا .. استنجدت بالجيش انهم يجوا يحمونا من اى خراب و يحموا السواقيين و البلطجية و يسيبوهم بس ما يموتوش حد .. عمرى ما كنت اصدق انى امشى خايف تحت بيتى و فى منطقتى !! و مش من حد .. خايف من الغباوة و الهبل و الجرى ورا اى زيطة و الحكم السريع و التنفيذ
قفلت المكالمة و حسيت انى عملت الى عليا و ربنا هو الى حيحمنا كلنا من اى شر علشان قمت بواجبى كمصرى و اعلامى و واحد من سكان المنطقة
وصلت زملائى بمساعدةصديقى وليد سليمان التى لبى الاستنجاد و جيه على طول و ساعدنى ان اخرج زملائى برا المعادى هما و البنات سالمين و بعدها ....
ما كنش ينفع افضل خايف .. لان لو كان فى خوف فهو كان على زملائى و اهلى علشان مفيش اى امن ولا حد كبير تتكلم معاه .. لكن انا و وليد بقينا لوحدنا فا مش فارقة معانا و ماكنش ينفع ارجع بيتنا و انام و كان لازم اكسر حاجز الخوف و ارجع اواجههمواحد واحد و اعاتبهم على الى عاملوه .. سبحان الله .. رجعت لقيت معظماهل المعادى هما الى واقفيين م ان عدد السواقيين بيصفف واحد ورا التانى و بيقل و عددنا كان اكتر منهم و حسيت ساعتها بالامان علشان الرجالة الى استجابت للكلام الى فى البرنامج و الى يضحك ,ان معظم اصحابى كانوا عارفيين صوتى  و كانوا متاكدين انوا انا و بيقولولى ازيك يا محمد .. استغربت قولتلهم ايه محمد دى و انا بضحك قالولى ما هما كتبوا محمد على الشاشة ..ففهمت و احترمت الى عاملوه فى البرنامج علشان يحافظوا علينا
وقفنا كلنا ساهرانين لحد ما الجيش وصل بكل قواته المدرعة ايضا استجابة لما قيل فى التلفزيون و فرحتى كانت لا تسعانى .. حقولها مرة واحدة و من قلبى حسيت انا و الرجالة الى كانوا جنبى طول اليوم ان احنا كنا زى الجنود فى المعركة .. و ما تنازلناش عنها لحد ما جاتلنا قوات الدعم .. معركة ضد الفوضى و ليس الناس .. دول فى الاخر غلابة و مش فاهميين حاجة بيرددوا ورا اى صوت و خلاص ... بيخونوا اى حد و خلاص .. بيصدقوا اى كلام و السلام .. الفقر و الامية و النظام القديم هو الى وصلهم لكده
انا مش ححط ملخص لكل الى كتبته ... انا حسيبكم تقروها مرة و اتنين ...و تلاتة.. انا حطيت شهادتى على الى حصل بس حقولكوا مفاجاة ... انى وانا بكتب النوت كلمنى واحد صاحبى كان مع الظابط فى المستشفى و معاه اخو الظابط و اخو الظابط ولد صغير و حكى الحكاية الحقيقية... ان الظابط كان معاه امه و اخوه و ان سواق الميكروباص كسر عليه و كل السواقيين فى المعادى عارفيين عربيته علشان مميزة "دودج" بتاعت ابن الظابط الكبير فى المعادى فلمااتخانقوا معاه تعدوا عليه و حاولوا ياخدوا منه الطبنجة و هما ماسكيينه الطلقة طلعت فى رقبة السواق ...فسحلوا الظابط فى الشارع و قلعوه هدومه و كان معاه امه و اخوه و بعد ما خلصوا عليه كانوا عايزيين يرموه جوا العربية و يحرقوه فيها لولا امه الى كانت منهارة و اترميت عليه و بتحميه و هى بتبكى على ابنها و بتقولهم احرقوا العربية بس ابنى لا و لولا ولادالحلا الى لحقوه ...
عامة انا قولتلكوا كل القق الى سمعتها من كل الاطراف .... و القصص الحاجات الى حصلت معايا بالحرف و انا اقسم بالله ان كل كلمة كتبتها قد حدثت بالفعل و كنت مختصرا ...ساترككم لضمائركم لكى تحكموا بانفسكم و تبطلوا تاكلوا من "طبخة بيقولك" الشهيرة الى حتهد بلدنا 
و انا اعلم ان الله جعلنى امر بنفس الموقف و فى نفس المكان فى الميدان (ملحوظة :ما حدث معى اناو زملائى كان فىنفس الموقع الذى ضرب فيه الظابط بالظبط) و انا اعتقد انها علامة من عند الله لكى يجعلنى ان امر بنفس الموقف كى اكون محايدا و اصف لكم ما حدث و الله وحده سيحاسبنى على ما اقوله .. و الله على ما اقول شهيدا 

بكل شرف اشكر القوات المسلحة و الظباط و الجنود علشان حاجات كتيرة قوى ... اول حاجة الهيبة العظيمة للجيش التى لا تنكسر و لن تذهب .. العقلانية فى استخدام السلاح و القوة ... الصبر فى التعامل مع الجمهور .. الشعور بالامان الذى ينشروه بداخلنا
و اشكر المجلس الاعلى للقوات المسلحة على ما يفعلوه الان و ان التاريخ لن ينساهم و اشكر كل مصرى نزل ميدان الجزائر علشان يقف جنبنا اننا نمشيهم بسلام و بالحوار و اشكرك انت يا من قرات هذه المقالة الطويلة و لكننى حاولت انى اختصر على قد ما اقدر بصراحة
ربنا يسترها علينا كلنا
مازن سعيد

16 التعليقات:

Tears يقول...

يا ترى برضه السواق بتاع الميكروباص اللى الفضائية المصرية جابته امبارح فى المستشفى واخد رصاصة فى عنقه و حكى اللى حصله كان برضة اشاعات؟

و ياترى اللواء اركان حرب مدير مستشفى القوات المسلحة اللى بيتعالج فيها السواق كل ما ذكر كان اشاعات و السواق مفترى و هو اللى ضرب نفسه بالنار و ركاب المكروباص اللى شهدوا كلهم كدابين؟

مافيش فايده فى الشرطة على فكرة انا كنت بقول بعضهم كويسيين و فيه نسبة بسيطة ندور عليها بس انا ايقنت ان مافيش بعد ما شفتهم مع وائل الابراشى بيقولوا قدامى ان اللى قتل الناس فى المظاهرات عناصر من هولندا!!

محمود وجدى هو حبيب العادلى و كل ضابط بقى مشروع حبيب عدلى صغير الا قله بتقاوم بس تدريجيا بتتحول

دى هى الشرطة و ده تسجيل بعد الثورة

http://www.youtube.com/watch?v=yxziuBBUA84

طالبوا مبارك بالاصلاح سنين لغاية ما فهموا ان الفاسد لا يمكن يصلح و لازم يتغير جذريا...كله لازم يتغير من اول القبول و الدارسة فى الكلية و مش متوقعه اى حاجة كويسة لان اصلا اللى قبل على نفسه يدفع رشوة عشان يدخل كليةمتصور يطلع ايه؟ بيحترم القانون؟

اللى شايف نفسه كويس يحاول ينجو قبل ما يبقى بيكلم زيهم لان بعدها ح يبقى بيتصرف زيهم و يبقوا كسبوا فرد جديد فى العصابة

FAW يقول...

متشكر علي ذوقك
والكلام ده مش موجه ليكي أصلا
الكلام موجه لناس عايزة تحل المشكلة
أقسملك بالله إني مستعد أقعد في بيتنا لو طالبتوا بده و الوزير إنصاع لده . .
أنا مش ضد إرادة الشعب
ومش بقول إن نار الشرطه ولا جنة الحرية
بس فعلا لو عايزين ناس تانيه نمشي كلنا و دخلوا ناس تانيه الكليه أو لبسوهم شرطه علي طول و أقسم بالله ما عندنا مانع ده لو إنتوا شايفين إن مفيش فايدة في الشرطه
محمود وجدي هو حبيب العادلي و قلنا كده زيكوا بس إنتوا الظاهر طرش ومبتسمعوش غير نفسكوا
وائل الإبراشي عايز يسمع نفسه
تامر أمين منافق وكان بيتملق حسني مبارك و ما صدق رجع يشتغل فا يبنافق الشعب ضد أي حد
نوارة نجم إنسانه غير سوية و عدوانيه
وحضرتك إنسانة غير منطقية ومش فاهمه حاجه
سواقين الميكروباصات اللي كل الناس بتشتم فيهم فجأه بقوا ضحايا
البرشام اللي بياكلوه بقيتوا بتصدقوه لما يتكلم دلوقتي
الشهود كلهم من الموقف و معارفهم اللي علي فكرة إحتلوا ميدان الجزاير و عملوه موقف في ظل الفوضي اللي إنتوا مش عايزينها تخلص


لو إنتي عايزانا ننجو بنفسنا علشان نهرب من الفساد مش هيحصل , مش هنقدم إستقالتنا و مش هنمشي , والله قدرتوا تحلو الوزارة و تجيبوا ناس تانيه خير و بركه , غير كده إحنا عارفين واجبنا و مش مستنيين حد يعرفنا , وأنا لما بحمي بحمي أهلي مش شوية أنصاف عقول أنانيين كل اللي بيتكلموا فيه أمور تافهه

هل متعة الشماته في الظابط عشان بقيتوا بتوقفوه في الكمين تستاهل عدم الأمان ؟؟؟
هل الكلام علي حاجات تافهه زي تناكة الظباط و نظارات شمس الظباط تستاهل عدم الأمان ؟؟؟


هنفترض جدلا إن الظابط غلطان و إبن ستين كلب . .
الناس اللي ضربته و حرقت عربيته و حاولت تحرق القسم و حاولت تقتحم شقته و تضرب أهله . . فين الناس دي ؟؟ . . متحبسوش ليه ؟؟ . . فين العدل يا طالبي العدل و المساواة ؟؟؟

لو الظابط كان قبل 25 يناير بيستخدم سلطته فده لأنه كمواطن مكنش واخد حقه . . بعد الثورة هياخد حقه كمواطن فا مش هيستخدم سلطته . . بس إنتوا مش عايزين تدواا فرصه للتغيير غير لنفسكوا بس . . شوية منافقين و مدعين مجد و مثالية

هل إنتوا مثاليين لا سمح الله ؟؟
هل إحنا عايشين في المدينه الفاضله ولا حاجه ؟؟؟


الراجل بيقول حاولا يوللعوا في الظابط مع عربيته و أمه رمت نفسها عليه عشان تحميه ؟؟؟

هي دي الآدميه حتي لو غلطان ؟؟
هم دول المصريين حتي لو غلطان ؟؟

هل الموقف ده لو كان حصل ما بين إتنين سواقين مع العلم إن الناس كلها دلوقتي معاها سلاح . . هل كان حد هياخد باله ؟؟ . . كانوا هيقولوا إتنين بلطجيه و في ستين داهيه ؟؟
إنما سمعتوا كلمة ظابط !! . . يا نهار إسود . . نقيم عليه الحد . . نهدر دمه . .
أنا شاكك إنك تكوني قريتي حاجه أصلا !!
إنتي زيك زي كل الأبواق اللي عايزة تتسمع و خلاص . .


في يوم من الأيام هتتعرضي لموقف و هتحتاجي لظابط يساعدك أو ينقذك . . وساعتها . . برضو هينقذك . . رغم كل اللي بتقولوه ده إحنا برضو مش هننسي إحنا شغالين ليه , ومش هنسمع كلام الغير عاقلين منكوا , بذمتك إنتي خايفه علي إخواتك لما تقعدي تشككي في الشرطه ؟؟
إنتي عارفه يعني إيه أمن ؟؟
إنتي أصلا مش عايشه في مصر عشان كده بتتكلي بثقه

لما يحصلك حاجه إبقي روحي إستنجدي بسواثين الميكروباصات . . عشان هم أطهر و أشرف من الظباط ومبيخطفوش البنات و يغتصبوها ليل نهار

و بالنسبه للجيش و لواء مش عارف إيه . . الجيش إمبارح ضرب الناس , وموت ناس قبل كده و دباباته داست علي ناس قبليها . . بس بيعمل إيه ؟؟ . . بيقدم إعتذار و بيطبطب . . مش عشان بيحترمكوا . . لأ . . عشان خايف منكوا . . هو ده الجيش اللي أحترمه وأقلده !!!

كل تعاملات الجيش من أول التحيه لأرواح الشهداء لغاية الإعتذار كانت من منطلق الخوف . . ولا يهمهم أصلا مطالب الشعب و حرية الشعب .
والمصيبه الكبري إن إنتوا فاهمين ده كويس . . بس رافضين تعترفوا بيه عشان تفضلوا خادعين نفسكوا . . وعشان تلاقوا حد تشككوا بيه نزاهة الشرطة
كل ثورة ليها كبش الفدا بتاعها , إنتوا قررتوا إنها تبقي الشرطه , مفيش مشاكل . . وإحنا بعون الله قدها
مش تهديد . . لأ . . وعد و ربنا يقدرنا .

FAW يقول...

وبالمناسبه إدخلي مدونة شريف القاضي هتلاقيني رديت علي الفيديو اللي إنتي حطاه
بس زي ما قلتلك . . إنتوا بتسمعوا نفسكوا بس
ربنا اللي هيجيب حقنا

FAW يقول...

و بعدين لو إنتي بتفهمي في الطب الفسي
هتعرفي إن الإنسان لما يكون مش في وعيه مبيعرفش يكدب . .
شوفي الفرق بين كلام الظابط و كلام سواق الميكروباص

شمعة تحترق يقول...

اكتشفت انك ضابط عندما قرأت ردك على اول تعليق رغم ان التعليق به نقاط موضوعيه و سرد لاحداث و لم يوجه اهانات او اتهامات لشخصك لكنك قمت برد عدوانى و اتهامات شخصية و تلك نفس عقلية الشرطة

اتمنى ان تترك التعليق و ردودك حتى يرى الجميع المشكلة و اضم صوتى لمن يطالبوا بالكشف النفسى على افراد الداخلية كما يحدث فى دول اوروبا

FAW يقول...

يا أستاذة شمعه . .
لو مصر كلها بتهاجمك هتردي بأسلوب أفظع من كده
وبعدين لو سمحتي لما تحكمي علي نقاش بين إتنين لازم تراعي خلفية النقاش السابقه اللي حضرتك متعرفيهاش
دي أول مبادئ مهارات الإتصال لو حضرتك تسمعي عنها

وجع البنفسج يقول...

مش عايزة ادخل في نقاش عقيم مع أحد .. لكن بصراحة يا مصطفى ،، انت عندك حق ، مش كل الضباط ناس وحشين يعني ..مش هم اللي كانوا محافظين على مصر ،، مش هم اللي كانوا أبطال في يوم من الايام ، كام مرة مات بطل منهم وهو بيحمي بنات بلده وهو بيدافع عن تراب مصر ، وهو بيحاول يقبض على المجرمين وتجار المخدرات ،كل هذا نسيوه؟؟، ومش كل شرطي هو حبيب العادلي .. انا على فكرة متابعة كل مواضيعك من اول واحدة لاخر واحدة وبصراحة مش عارفة ليش البعض بيهاجمك بهالصورة ؟؟ هل لانك شرطي .. هل اصبحت كلمة شرطة تهمة او عيب او حرام او حتى اصبحت شتيمة ؟؟ غريبة هالدنيا .. عموما يا مصطفى لا تهتم واكمل طريقك .. فكلنا معكم من أجل حبيبتنا مصر في الاول وفي الاخر .. وربنا يوحد كلمتكم ويوحد صفكم وترجعوا تمسكوا البلد وتحموها من المجرمين والفوضويين .. ولتبقى الشرطة في خدمة الشعب للأبد .
ربنا يحفظك ويحميك يارب ويبعد عنك الشر.

FAW يقول...

وجع البنفسج
حضرتك إنسانه محترمه وذوق متشكر جدا

FAW يقول...

( منقول )

القبض على ضابط اسرائيلى فى المعادى

يوم الخميس 24/2/2011 حوالى الساعة التاسعة والنصف مساءا عقب واقعة النقيب/ صلاح السجينى مع السادة سائقى الميكروباصات وأثناء سيرهم لقسم شرطة المعادى لتحطيمه قاموا باستيقاف سيارة يقودها شاب وطلبوا منه اثبات الشخصية ورخصة السيارة فلما سألهم عن سبب تجمعم أخبره أحدهم بالموضوع , فأخبرهم بأنه ليس معه اية مستندات ولكن أحدهم لاحظ وجود حافظة ذلك الشاب بجواره على المقعد الامامى فالتقتها وفتحها وكانت المفاجأة وجد كارنيه ضابط شرطة فصاح بأعلى صوته ( ده ظابط شرطة ) فعلا ضابط شرطة مصرى يعمل فى بنى سويف وأسمه نقيب / عمرو طارق كان فى طريق عودته لمنزل أسرته بالمعادى ولايعلم شىء عن موضوع صلاح السجينى وكان فى طريقه لأصطحاب والدته للمستشفى ولكن حظه وقع معهم فحاول الفرار بالسيارة ولكن محاولة فاشلة فقد تم القاء القبض عليه بمعرفة البلطجية من سائقى الميكروباسات واعتدوا عليه بالمطاوى قرن الغزال فى وجهه ويده وجسمه وكادوا يقتلوه ولكن انقذه من الموت بعض المارة حيث وضعوه فى سيارة وطلبوا من قائدها أخذه لأقرب قسم وبعدها قاموا بتحطيم سيارته وكسر التابلوه وسرقة سلاحه الميرى ثم قام بعضهم بالذهاب خلفه لقسم المعادى حيث الجيش والشرطة للأعتداء عليه مرة أخرى ولكن تم ألقاء القبض عليهم جميعا بمعرفة الجيش ... ثم أطلقوا سراحهم بعد ارجاع سلاح الضابط وتم نقل الضابط للمستشفى لاسعافه وتم تحرير محضر بالواقعة عقب صرف الجناة بمعرفة قواتنا المسلحة
وكأن ضابط الشرطة من تل أبيب
ســــــــــؤالى
ماذا لو أن ضباط الشرطة قرروا جميعا الأحتجاج بأدب وتقدموا جميعا باستقالة جماعية أو الأتفاق على عدم الذهاب للعمل لفترة
نطالب تطبيق العدالة ( محاسبة المخطىء) حتى لاتكون فتنة فأنا نفسى أفرح بالثورة مثل أى مصرى

طبعا دي غلطة الظباط برضو !!!

حسبي الله و نعم الوكيل في كل واحد بيسخن الناس علينا و هو إيديه في الميه الباردة و عمره ما نزل الشارع أصلا
حسبي الله و نعم الوكيل في كل مصري عار علي كلمة مصري

شيرين سامي يقول...

ايه كل ده؟!
بص باختصار مش كلنا بنكره الشرطه زي ما مش كل الظباط وحشين في ناس كتير بتحاول تهدي بس أعتقد زي ما قال بلال فضل الناس هتهدى لما نشوف حاجات ملموسه زي انهم يقبضوا على اللي كان سايق العربيه البيضا اللي فرمت الناس أو القناصه...مثلاً, بالنسبه لحادثة المعادي كلنا اختلفنا عليها بس أنا رأيي ان مكان الرصاصه بيدل انها طلعت في وضع جذب و شد للطبنجه مش مباشره و معتقدش في ظابط عاقل في الظروف دي يتصرف كده و قدام أخوه الصغير أعتقد السواقين خادتهم الحماسه و هما أصلاً بعاد جداً عن الميثاليه و أقرب للبلطجه و كلنا احتكينا بيهم أنا بترعب لما جوزي بيتخانق مع حد منهم, بس متتخنقش يا مصطفى لما حد يقول رأيه كل واحد حر و أكيد هتلاقي اللي معاك و اللي ضدك و كل واحد له أسلوبه حاول تحافظ ككاتب و صاحب بيت (المدونه) على هدوءك و أعتقد لاغنى عن الشرطه بس الناس محتاجه خطوات و وقت لبناء الثقه.
بالنسبه لتعليقك عندي موتني من الضحك أنا مش عارفه ليه الناس بتعلق من غير ماتكون تعبت نفسها و قرت طب ما أنا مش هزعل لو حد معلقش لأنه مقراش لأني أنا كمان ساعات ملاقيش الوقت أني أقرى عادي
تحياتي ليك و بكره أجمل ان شاء الله

reemaas يقول...

انا مش هعلق على الموضوع اللى نزلته يا مصطفى لانى تعبت من كتر ماقولت ان مش كل الشرطة وحش وان طريقه تعامل الناس معاها كده هتخليهم يتخنقوا من كتر الضغط ومن كتر مابنقولهم انتم مافيش فيكم فايدة دول بنى امين يعنى رد فعلهم زى رد فعلنا

انا بس هعلق على كلام تيرز اللى استشهدت بحادثه المعادى
الحادثه دى غيظانى جداااااااااااااا لان الظابط مش الوحيد اللى غلطان
الظابط والسواق والاعلام واخص بيه تامر بتاع مصر النهاردة والناس كلنا غلطانين فى حق بعض
الظابط لو روايه السواقين صحيحة يبقى غلطان
والسواق لو روايه الظابط صحيحة يبقى غلطان
وتامر والاعلام غلطان لانه طلع ادان الظابط فى حاجة لسه هيحكم فيها تحقيق واحنا كمان مدانين لما بنقول مافيش فايدة

بجد ده هيبقى مثال لحاجات كتيييييييييييرة لسه جايه لو فضلنا نتعامل باسلوب العداء ده

FAW يقول...

شيرين سامي

بغض النظر عن أي حاجة , وبأمانة شديدة , ومعرفش ليه , ويا ريت تسمحيلي . . أنا فعلا بعتبرك أخت

ومش عشان بس أختي إسمها شيرين

بالنسبة لرأيك أنا عارف إن أنا إنفعلت ويا ريت تقدري كم الضغط اللي عليا من ناس كتير مش عارف عايزين يوصلونا لإيه

أنا آسف علي إنفعالي ومش آسف علي اللي أنا قلته

بحترم جدا رأيك في حادثة المعادي مش عشان ظابط وبغض النظر عن كونه في صالح مين , بس عشان رأي يدل علي تفكير مش مجرد حكم عشوائي


معجب جدا بذكائك اللي مخيبش ظني :))

FAW يقول...

reemaas

تصدقي بالله أنا كنت بفكر في فكرة لمصالحة تيجي من الظباط للناس بعيد عن قيادات الوزارة بس رد فعل الناس علي حادثة المعادي , والإعلام وعلي رأسه تامر غير أمين أكدولي إن مفيش فايدة

هرد عندك علي موضوع الخطوات الملموسه اللي ذكرتها شيرين (بعد إذنها) عشان نسيت . .

إحنا كظباط مش مسئولين عن الكلام ده ومينفعش الناس تحملنا مسئولية ده , ده دور الوزارة كقيادات وجهاز . . هم فعلا مقصرين وأقسم بالله أنا لو أعرف الناس دي هبلغ عنها , بس مينفعش نقول مفيش صلح غير لما تحاكموهم , إنتوا كده بتحكموا علي بلد بالإنهيار .

بالنسبة للواقعه بغض النظر عن مين اللي غلطان . . أنا والله فكرت إن ممكن حبس الظابط يكون أنقذه من حكم عسكري مشدد , برضو دي مش قضيتنا . . الناس الهمج دي ليه هي كمان ماتتحاسبش ؟؟
لإمتي الناس كل ما تتخنق نفسيا تروح تحرقلها قسم ولا عربية شرطة ولا مبني محافظة حتي . . فين هيبة الدولة ؟؟
كده هتقلب غابة والله . . .

حسبي الله و نعم الوكيل في الإعلام المصري

reemaas يقول...

يامصطفى اسمحلى هكمل معاك حوار وهقولك المصالحة مش هتنفع فى ظل كمية الغل الموجودة فى النفوس بمعنى انت مش هتجيب الظباط وتجيب مثلا مجموعه من التحرير وتقول نتصالح لانهم رفضوا ده بالفعل فى الاجتماع الحاصل وقالك لا تصالح الا لما دم الشهدا يجى بغض النظر عن عدم اعتبارهم للى ماتوا من الظباط شهدا

انا شايفه ان اللى حاصل اسلوب طبطبه علشان الحال يمشى

ولو حابب نصيحتى اتعاملوا مع الناس بالحسنى بمعنى امسك اعصابك كشرطى جداااااااا مع التعاملات وقدى شغلك ولو اللى قدامك غلط امسك عليه غلطه وقاضيه

هديلك مثال لو ظابط المعادى مسك اعصابه واشتكى لسائق فى واقعه السب والقذف واخد جزاءه بوجود الشهود دى كلها اعتقد كان الناس فهمت ان اللى يغلط من الناحيتين هيتعاقب ماتضيعوش حقكم بايدكم وماتجوش على حق حد

لحد مع الناس الكبيره اللى غلطت فى قيادتكم تتحاسب وقتها النفوس هتهدى حبه

محب روفائيل يقول...

أولا : أحب أسلم عليك يا أستاذ مصطفى . لأنها أول مرة أدخل مدونتك دلوقتى .
ثانيا : ندخل فى القصة بقى ، يا راجل أنا صعب عليا مازن سعيد ده ، وأنا بقرا القصة بقول ربنا يكون فى عونه ،وهو واضح أنه أنسان محترم جدا .
أما بقى عن الناس وطبخة بيقولك والكلام ده ، فهتلاقيه فى كل حتة فى مصر للأسف !!
عندنا فى أسيوط مرة واحد عمل حادثة فى طريق مزدحم وكنا راكبين الميكروباص ، فالسواق وقف العربية ونزل هو وكام واحد يشوفوا ايه اللى حصل ، وهكذا عمل باقى السواقين ، والفعل متشابه جدا ، والأختصار بتاعه كله مع التيار!!
عموما تحياتى لحضرتك

FAW يقول...

محب روفائيل

أنا كمان والله صعب عليا , حاجة تجنن بجد و إحساس فظيع بالحصار وضياع الحق

حضرتك وأسيوط كلها نورتوا المدونة