الثلاثاء، 28 ديسمبر 2010

إســـــــترجـل


بعيدا عن (البريل) ومشتقاته من المنظفات . .




السادة مدعي الرجوله الأفاضل . . برجاء الإنتباه . . محدثكم منشق عنكم , منشق عن جهلكم وضحل نظرتكم , هارب من ضعف تفكيركم وثقل تطوركم , متمرد علي كافة الأكليشيهات المفروضه علي ذوي الشوارب وحليقيها , متنازل عن نزعة سخيفه إحترفتم أدائها ببراعه وتأثر بها – صدقتم أم لم تصدقوا - معدومو العقل ليس أكثر . .
الموضوع الأكثر جدلا بين أوساط الشباب . .
(( مشهد يومي ))


_ شفت اللي حصل ؟
_ إيه ؟
_ مش (أحمد) ساب (نها)
_ إيه ؟ . . ليه بس كده ؟
_ إنت فاهم بقي . .
_ أنا اللي أعرفه إنهم بيحبوا بعض . . وبعدين ما إنت عارف إنه مينفعش يسيبها . .
_ ده هو ده السبب اللي خلاه يسيبها
_ بجد ؟ . . ده كده يبقي عيل زباله قوي . .
_ يا عم فكك

((مشهد غير يومي ))


تفتكر هم سابوا بعض ليه ؟؟
أكيد غلطت معاه
طب وفيها إيه ؟
يعني إيه فيها إيه ؟ . . إزاي يقبل علي نفسه حاجه زي دي !!
الله !! . . طب ما هو اللي غلط معاها مش حد غريب . . !!
برضو يا بني إزاي ؟ . . هو مش راجل ولا إيه ؟
يعني يضيع حبهم لبعض وسنين عمرهم عشان حاجه هو اللي غلطان فيها . . وعشان هي اللي شالت الغلط ده . . يسيبها . . وبعدين ده كده فضحها مش سابها بس !!
يا عم فيه إيه ؟ . . إنت ترضي تتجوز واحدة مش بنت . .؟؟
يا عم بلاش هبل , إيه علاقة القصه دي بالجواز ؟
نعم ؟؟
إفهمني بس ومتستعجلش . . تخيل نفسك رحت تتجوز واحدة شايف إنها محترمة وبنت ناس . . وبعدين يوم الدخلة إكتشفت زي ما إنت بتقول كده . . هتعمل إيه ؟
هطلقها طبعا . .
طب هتطلقها ليه ؟
عشان مش بنت . . مرضاش علي نفسي حاجه زي دي .
يعني إيه مش (بنت) أصلا ؟ . . أمال ولد !! . . إنت بتقول كلمة إنت حافظها وخلاص . .
. . . .
بص يا بني . . أصلا الموضوع مبيتحسبش كده . . هنفترض مع بعض إن فيه واحدة كانت بتحب واحد , والبنت دي قمة في الأخلاق وبنت ناس وكل الكلام الجميل ده , هو بقي عيل سيس وزبالة . . أو إنسان إبن ناس برضو . . وغلط معاها . . هل معني كده إن هي وحشه ؟ . . طب لو هي وحشه هو كمان ليه مش وحش؟ . . عشان هو مينفعش نقول عليه مش (بنت) ؟؟ . . عشان هو تكوينه الفيزيائي مختلف ؟؟
هو راجل . . عادي . . مخسرش حاجه .
طب وهي خسرت إيه ؟؟ . . مين اللي قال إنها خسرت حاجه غير عقليته وعقلية غيره المتخلفه
يا عم منظره هيبقي زباله قدام الناس
طب بص . . تخيل إنك حرامي . . ورحت سرقت شقه . . هل تعتقد إن ربنا هيعاقبك ؟؟ . . طبعا هتقول آه . . وأنا معاك . . بس اللي أنا متأكد منه بقي إن ربنا عمره ما بيعاقب حد من غلطة مرة . . . الحرامي اللي بيتمسك ده مبتبقاش سرقته الأولي أبدا . . ربنا بيديله فرصه وإتنين وتلاته علشان يتوب . . هو بقي ما تابش . . فا ربنا فضحه . . بالظبط زي البنت . . طبعا فيه بنات كتير سمعتهم زي الزفت أو معروف عنهم إنهم مش (بنات) . . تفتكر إن هم ساعة ما إتفضحوا كانت دي أول مرة يغلطوا . . مستحيل .
يعني إيه ؟ . . يعني أدور علي واحدة غلطت مرة واحدة بس ؟؟
إيه يا عم الغباء ده ؟ . . بص حواليك . . فيه ألف بنت محترمه وبنت ناس وماشية بصه في الأرض . . هل معني كده إنها محترمه . . فيه ألف بنت متحررة وماشية واثقه في نفسها . . هل معني كده إنها فاجرة . . ممكن البنت اللي إنت واخدها عشان (منقبه) مثلا دي تكون غلطت مع إبن الجيران وهي صغيرة . . مش غلط غلط يعني . . بس حاجه خفيفه كده . . هل إنت لو عرفت عن واحده إنها عملت كده قبل ما تخطبها بفترة هل هتخطبها . . لأ . . طب واللي عملت زمان ومحدش عرف , هتعرف إنت إزاي ؟؟ . . ما هي مش كل حاجه بتتعرف . . يعني متقولش أنا هجيب واحدة مبتخرجش مالبيت عشان تبقي خام . . متضمنش برضو . . محدش مغسل وضامن جنة . .
يعني إيه ؟ . . يعني أتجوز وألبس في الحيط ؟
إممم , طب هسألك سؤال . . لو إنت جيت تخطب وفي فترة الخطوبة البنت قالتلك أنا مش ( بنت ) . . هتعمل إيه ؟
هسيبها طبعا
طب ولو هي كانت مش (بنت) وكانت عاملة عمليه وبقت (بنت) . . وطبعا مش هتقولك . . هتعرف إزاي ؟
. . . . .
بص . . أولا . . ربنا سبحانه وتعالي بيقول : (( الْخَبِيثَاتُ لِلْخَبِيثِينَ وَالْخَبِيثُونَ لِلْخَبِيثَاتِ وَالطَّيِّبَاتُ لِلطَّيِّبِينَ وَالطَّيِّبُونَ لِلطَّيِّبَاتِ )) . . يعني إنت لو كويس هتاخد واحدة كويسه . . ولو مش كويس هتاخد واحدة زيك برضو , والبني آدم الكويس ده بقي مش معني كده إنه مغلطش . . كلنا بنغلط , بس هو غلط وتاب , أو بيغلط وبيتوب , فا ربنا بيغفرله , يعني لو واحدة غلطت مع واحد وتابت دي متبقاش وحشه , تبقي كويسه برضو . . بس بتغلط زي ما أي حد بيغلط
أنا مش فاهم برضو يعني أتجوز واحدة مش (بنت) إزاي بس ؟
بص يابني . . مبدئيا . . الرسول (صلي الله عليه وسلم) قال : ((من ستر مسلما ستره الله في الدنيا والآخره)) (الترمذي) . . معايا ولا لأ ؟
تمام . .
طيب . . أنا مثلا لو جيت أتجوز وليلة الدخلة عرفت حاجه زي دي ممكن أطلقها . . (وأنا بقول ممكن) . . بس بسبب واحد . . إنها خدعتني ومكنتش أمينه معايا . . يعني كل حياتنا هتبقي كدب . . إنما لو هي إنسانه شجاعه وجت قالتلي في الأول . . هتجوزها برضو . .
إزاي يا عم ؟ . . طب والناس ؟ . . واللي غلط معاها هبص في وشه إزاي ؟ . . ومنظري قدام نفسي ؟
أولا زي ما قلتلك (من ستر مسلما ستره الله في الدنيا والآخره) . . أنا بقي كده بسترها . . أنا لو سبتها أبقي فضحتها . . حتي لو الناس معرفوش . . برضو انا كده هبقي فضحتها . . فضحتها قدام نفسها . . عرفتها قد إيه هي ماتسواش . .
ثانيا بالنسبة للناس والأخ اللي غلط معاها . .
إحنا إتفقنا إن (الطيبون للطيبات والخبيثون للخبيثات) . . يعني لو فيه بنت غلطت مع واحد لأول مرة وإتجوزوا برضو , يبقوا هم الإتنين (طيبون) وخلاص . . إنما لو سابها يبقي هو (خبيث) . . وفي الحاله دي محدش هيعرف لأنها أول مرة وربنا مش هيفضحهم . . (نظرية الحرامي)
إنما لو هي مش أول مرة ربنا هيفضحهم حتي لو كملوا مع بعض . . (خبيثون وخبيثات)
وطبعا الفضيحه هنا معناها إن (الناس) تعرف . .
يعني أنا لو خطبت واحدة بعد ما سألت عن أخلاقها كويس وعرفت إنها تمام - حتي لو هي مش (بنت) -  فكده ربنا سترها عشان هي (طيبه) , عشان دي أول مرة , فبالتالي الناس معرفتش , يعني أصلا مفيش (ناس) .
إنما لو سألت وعرفت من الناس إنها مش كويسه أو مش (بنت) , يبقي هي (خبيثه) , ودي مش أول مرة تغلط , فا ربنا فضحها .
يعني أنا لو إتجوزت واحدة سألت عليها كويس وطلعت كويسه وكل الشواهد بتقول كده وبعدين جت قالتلي أنا (غلطت) مرة . . برضو دي عروسه لقطه , لأنها (طيبه) . .
يعني من الآخر . . إتأكد تماما إن فيه من اللي إنت تعرفهم ناس متجوزين . . مراتتهم مكنوش (بنات) , بس عارفين ربنا كويس . .
بالنسبه بقي للأخ اللي غلط معاها . . لو هو (طيب) أصلا هيتجوزها فا أنا مليش دور هنا . .
إنما لو هو (خبيث) هيسيبها , ومش هيفضحها , لأنها (طيبه) يعني دي كانت أول مرة . . مفيش واحد بيفضح واحدة غلطت معاه إلا إذا كانت مش (طيبه) , ده لو هي حتي تصرفاتها مش محترمه بس من غير ما (تغلط) فعليا , برضو تبقي (خبيثه) وساعتها ربنا هيخليه يفضحها . . إنما لو (طيبه) ربنا هيستر عليها سواء منه أو غيره . . يستر عليها بقي من كل حاجه . . يعني مجرد نظرة الأخ ده ليا دي فضيحه ليها , ربنا مش هيخليها تحصل عشان هي (طيبه) .
يعني أصلا مينفعش تسألني إذا كنت أقبل علي نفسي إني أتجوز واحدة مش (بنت) . . لأن ساعتها أصلا إنت مش هتعرف . . وأنا متأكد زي ما أنا متأكد أن أنا مؤمن بالله .
طب وأعرف منين أصلا إنها (طيبه) ؟؟
زي ما قلتلك . . (الطيبون للطيبات والخبيثون للخبيثات) . . بس مش معني كده إنك تسيبها لغاية ما تيجي لغاية عندك . . لازم تسعي برضو . . إنت أصلا ممكن تتجوز واحدة (خبيثه) و إنت (طيب) , بس ده هيكون لأنك ماسعتش ولا إستعنت بالله , وساعتها أكيد الموضوع هيبوظ , بس بعد ما يحصلك مشاكل كتير . . لأنك محاولتش تجتهد وإستسلمت . . بعد كده لو إتعلمت من أخطائك ودورت علي البنت اللي لايقه عليك – ده بفرض إنك (طيب) – واللي هي من الآخر زي مالرسول (ص) قال في حديثه الشريف . . ( ذات الدين ) . . ساعتها هتبقي لقيت (الطيبه) . . اللي ممكن تكون غلطت . . بس (طيبه) . . أما بقي لو إنت (خبيث) هتتجوز (الخبيثه) اللي زيك , اللي هتفضحك وتفضح نفسها . .
وكلمة (الفضيحه) دي كلمه نسبيه . . يعني لو هي (مجرد) بتروح تقول لأهلها ده مبيصرفش عليا . . دي كده (فضيحه) . . وكلمة (الخبيثه) دي برضو نسبيه . . يعني لو هي (مجرد) مبتصليش . . دي كده (خبيثه) . .
ثالثا بقي بالنسبه لمنظرك قدام نفسك . . تخيل إن إنت اللي قلتلها أنا قبلك غلطت مع واحدة . . هي إحساسها إيه ؟ . . ومنظرها قدام نفسها إيه ؟ . . لو هي قرفت منك , يبقي ساعتها إنت ليك حق تقرف منها لو هي اللي غلطت . . هي هي صدقني مفيش فرق . .
طيب ما هي اللي غلطت مرة ممكن تغلط ألف مرة . . وحتي وإحنا متجوزين . .
آه ممكن . . وبرضو اللي يغلط مرة ممكن يغلط ألف مرة . . يعني لو إنت مش هتآمن ليها . . هي كمان من حقها متآمنش ليك . . وبعدين إسأل أي حد غيري يقولك مين شهوته الجنسيه أعلي . .

طبعا أنا كل ده بكلمك بعقليتك . . العقلية اللي بتقول إن البنت اللي غلطت مرة تبقي عليها اللعنة وتترمي في الزباله . . إنما أنا أصلا مش شايف إنها لما تبقي مش (بنت) ده يدينها في حاجه . . يعني شكلها قدامي بالظبط زي اللي بتسرق . . واللي بتقتل . . واللي بتنصب . . كلها سيئات وكبائر مع إختلاف درجاتها . . لو تابت توبه نصوحه . . كله في الآخر بيبقي ولا كأنه حصل . . ده قدام ربنا . . يهمك في إيه أي حد تاني . . !!!
وبعدين لو إنت بقي محموق قوي علي موضوع إنك لازم تبقي أول واحد في حياتها . . يعني لو مطلقه مش هتتجوزها ؟؟ . . . لو أجنبيه مش هتجري وراها ؟؟؟
. . . . . .
المشكله فينا . . إحنا لو فكرنا كويس وحكمنا ديننا اللي بنحكمه في كل حاجه تانيه في حياتنا هنلاقي إن الحاجه دي أولي من أي حاجه تانيه . .
ولو بطلنا نتفرج علي الأفلام العربي المتخلفه اللي رسخت في دماغنا الأفكار المتخلفه دي . . يمكن نبقي أحسن . .

كلمه أخيره للبنات : أنا عارف إن المشكله في الراجل وعقليته في المجتمع الشرقي , بس برضو المشكله التانيه إن البنات هي كمان إقتنعت بالعقليه والأفكار دي , وبقوا فعلا قدام نفسهم حاسين إنهم لازم يترموا في الزباله , إقتنعوا إنهم لا يصلحوا , هم كمان إتأثروا وإتأخروا للأسف , يعني ولا ثقه بالنفس ولا دين . . 

15 التعليقات:

Unknown يقول...

أولاً كل سنه و انت طيب و بخير
ثانياً انت اتكلمت في حاجات كتييير هحاول أعلق على أهم النقط
طبعاً عجبني أوي نقدك لكلمة (مش بنت)يعني هتكون بقت ولد اللفظ مالوش معنى اسمها(مش بكر) و كمان كلامك عن ان المظهر بيخدع و الطيبه شئ داخلي مالوش مظاهر مظبوط جداً و ان اللي يستر انسان في الدنيا ربنا هيستر عليه في الآخره...نظره منطقيه من انسان مُتحضر
بس انت اتكلمت عن رؤيتك كراجل مُتحضر للبنت اللي غلطت (مره واحده) اسمحلي أكلمك بوجهة نظر أُخرى كبنت, الغلطه هنا كبيره أوي في مجتمعنا لأنها غلطه أخلاقيه من الدرجه الأولى و بتمسك الشرف من رقبته يعني اللي بيسرق مثلاً بيبقى عشان محتاج أو طماع أو أو..لكن اللي بتدي نفسها لواحد بتعمل كده عشان ايه؟؟!!
ده غير ان البنت رغبتها أقل زي ما انت قلت يعني هيه مبتعملش كده الا اذا كانت عايزه تجرب و ده قمة الاستهتار بنفسها و بعائلتها
تعرف ان الرجل اللي ماعندوش تجارب و بيتجوز واحده غلطت قبل كده حتى لو طيبه عمره ماهيسامحها اللي غلط نفس الغلطه هو اللي ممكن يعرف يسامح فحاجه زي دي
اللي غلطت مره واحده مش أحسن من اللي غلطت كتير لأن اللي بتوب بصدق ربنا بيسامحها و يسترها لكن اللي معندهاش نية انها تتوب أو تابت عشان اتجرحت من اللي سابها مش ضروري تكون أطيب, و بعدين مش عايزين نشجع البنت اللي فرطت في نفسها بارادتها تماماً و نقول انها مخسرتش حاجه لأ خسرت كتير أولهم احساسها بالعفه...و مش ممكن تتقارن ببنت قدرت رغم كل المغريات تحافظ على شرفها
مفيش حد مهما عمل بيترمي في الزباله لأن محدش يعرف اللي جوا حد و الناس اللي بترمي بالأحكام و خلاص يروحوا يحاسبوا نفسهم الأول
الموضوع شائك جداً لكن على الأقل خيوطه العريضه معروفه و مفهومه في زمن مسابش حاجه غير ناقشها و في الأول و الآخر ربنا غفور رحيم و ستار حليم لكن ده ميمنعش ان الزنا ذنب كبير و عقابه للي متابش بصدق كبير و أليم
تحياتي ليك

Tears يقول...

تصدق انا اول مرة اكتشف ان ده تفكيرك

بجد برفع لك القبعة و بحترمك اوى على انك لديك عقل و بتفكر بيه مش ماشى وراء القطيع

كلامك فكرنى بكتاب للدكتورة نوال السعداوى كانت بتكلم فيه عن معنى الشرف عند المرأه و عند الرجل

المجتمع متخلف و ده فى كل شىء مش بس فى الموضوع ده

شوف بينظر للمرأة اللى بتجوز بعد موت زوجها ازاى بينما الرجل عادى يجوز

شوف لو ام سمعت بنتها بتكلم ولد فى التليفون ح تعمل ايه بينما لو ابنها اللى بيكلم بنت يبقى كبر و فرحانه بيه

لو راجل ما اتجوزش يبقى حر انما لو ست تبقى عانس

لو جوزها مش بيخلف يبقى لازم تبقى اصيلة و تقعد تخدمه انما لو العكس يبقى لازم يجوز عليها عشان يقولها انتى ناقصك حاجة

فيه قله من الرجال فى مجتمعنا انما اغلبية من الذكور...


ربنا يباركك فى عقلك

FAW يقول...

وإنتي طيبه يا شيرين ويارب تبقي سنة سعيده علينا كلنا . .
أنا معاكي في اللي إنتي بتقوليه ومش قصدي أبدا أشجع علي حاجه , بس مسئلة الإحتياج دي واسعه , الدنيا مش أكل وشرب بس , حتي لو كانت الست أقل من الراجل .
بالنسبه للإنسان اللي معندوش تجارب أعتقد إن لو عدم تجاربه ده جاي من إقتناع مش مجرد إنه مش عارف ساعتها هيسامح ومش هيحس إنها متفوقه عليه ( لإن ده إحساسه ساعتها )
وبالنسبه للخسارة أنا شايف إنها برضو مسئله واسعه يعني اللي بيخسر دينه بيخسره في أي وضع وبأي ذنب , إحنا بس اللي حاطين عنينا علي حاجه معينه
أنا مش ملاك ولا مبغلطش ولا شايف الناس ملايكه والمفروض نعاملهم علي هذا الأساس
أنا بس شايف زي ما قلتي إن اللي بيحاسب غيره يروح يحاسب نفسه الأول وميقولش لأ ده غيري غلطاته أكبر
تحياتي

FAW يقول...

TEARS
متشكر ربنا يخليكي
أثرتي نقطه شدتني
موضوع الأم والكلام في التليفون , أهي العادات دي جايه من التربيه في الأول واللي بنشوفه , يعني لو البنت مكلمتش وحست إنها هتبقي مذنبه لو عملت كده , يبقي الولد برضو المفروض يحس بكده , يحس برضو إنه هيخسر إحترام الناس ليه
نورتي

reemaas يقول...

ياسلااام لو الكل يفكر كده
ياسلام لو الكل يفكر فى حتة الستر دى

هنبقى فى دنيا غير الدنيا

عجبنى جدا فكرة رفضك لتعبير مش بنت وعجبتنى كمان فكرة كما تدين تدان وان الطيبين للطيبات يعنى كل واحد يحاسب نفسه اولا

FAW يقول...

reemaas
مبسوط إن الكلام عجبك
نورتي

شريف القاضى يقول...

تسلم دماغك على التحليل المتميز ده وعرض كل وجهات النظر ..وهو موضوع بالفعل يدعوا للتفكير والحيرة ...
ماشاء الله عليك تفكيرك يدل على نضج أحترمه فيك ...

FAW يقول...

شريف
ربنا يخليك يا باشا ده بس من ذوقك
وكل سنه وإنت طيب . .

Noha Saleh يقول...

معاك حق فى اننا لو حكمنا الدين فى كل حاجة الامور هتتعالج بشكل افضل
بجد موضوع رائع جدا

FAW يقول...

noha
متشكر جدا
ونورتيني

رحاب صالح يقول...

انا لية كل ما اسيبك شوية يا زقازيق .....
ارجعلك تاني...تاني...تاني....
بحب الزقازيق واهل الزقازيق واغلب اصحابي منها....
يا صباح الورد البنفسجي....
احييك واشد علي يديك وارفع لك القبعة....
بجد ما شاء الله عليك حللت الموقف بشكل رائع...
متفقة معاك....
الغلط غلط مش ولد وبنت
واحنا لأسف مجتمعنا الشرقي هو اللي خلق معني الشرف في غشاء بكارة وعذرية
بدون معني حقيقي....
يا ريت يكون في نسبة رجال عقليتهم وتفكيرهم بنفس عقليتك وتفكيرك ...
بتمني اننا نفهم معني الشرف ...بشكله الحقيقي ولا نحصره فقط بعذرية البنت....
ولية منلتمسش العذر للبنت اللي ممكن تكون اغتصبت وهي صغيرة مثلا او انضحك عليها ....وهو لية الشاب بس اللي مسموح له يغلط....مع ان ربنا مقالش كدة...ربنا مفرقش ف الغلط بين الرجل والمرأة...
ولو رجعنا لقصص الصحابة ياما هنلاقي
بس نقرا بتمعن ونفهم ....
اشكرك من قلبي وعقلي كثيرا ...
وبشكر العزيزة تيرز لاني قرأت تعليقك علي مدونتها وعرفتك منها

FAW يقول...

re7ab
عجبتني قوي وضحكتني جملتك الأولي D:
شرفتيني ونورتيني وأهلا بكل معجبي الزقازيق الباسله
وميرسي جدا لذوقك ولا شكر علي واجب بالنيابه عني وعن تيرز :) :)

رحاب صالح يقول...

اصل انت مش عارف الزقازيق دي لما اتعرفت عليها حبيتها...وكل ما فعلا ابعد شوية عن اصحابي اللي فيها بحكم الشغل والدراسة الاقيني بعرف حد جديد منها....
الزقازيق يعني صالح سعيد وعلا بركات وعمرو الطاروطي ومروة جمعة ومشيرة كامل ومي خليفة وايمان محمد وايمان احمد واحمد سمير ومحمود بدوي ومحسن محمدوغيرهم وغيرهم...
يعني مش اي حب ...وبصراحة حبيتها اووي برغم اني مروحتهاش غير مرة واحدة....!!!

بس كفاية اصحابي اللي فيها

FAW يقول...

كل دول ومرة واحدة !!!!
ده أنا علي كده مروحتهاش خالص :)

❤ soso ❤ يقول...

المشكلة هذا موجودة في كل مكان
لكني من وجهة نظري ان البنت تتحمل الغلط كله لانها سمحت لواحد انه يأخذ ويسلب منها اعز ما تملك وهو مهب حق لها الشيء ..
هذا رأي الشخصي