الجمعة، 10 سبتمبر، 2010

شـــيخ العــــرب ســــالمان


أول مره أصدق الحاجات دي , أو يمكن ما صدقتش بس قلت مش هخسر حاجه , أهي فسحه . .

بقالي شهرين أو أكتر ضهري واجعني جدا , و من كام يوم الوجع دخل علي ركبي و مبقتش قادر أتنيها غير بصعوبة , مشكلتي إني بحب الرياضه جدا , بتضايق قوي لو قعدت يوم كسلان من غير ماتحرك , انزل أجري , أروح الجيم , العب سويدي مع نفسي , أي حاجه . .

فجأه و بدون أي مقدمات جالي الوجع الفظيع ده , والنبي ما حد يتفزلك و يقوللي . . أكيد شلت حاجه تقيله .  . لأ ما شيلتش يا خويا !! . . عادي بلعب زي ما أي حد بيلعب , المهم . . كالعاده مهتمتش في الأول و فضلت عايش حياتي عادي جدا , أنا أصلا عمري ماركزت في إني أريح لما أتعب , أو أتعالج لما أعيا . . كل الكلام الفاضي ده , لغاية ما الوجع بقي فظيع بجد , ماما ( وإسمحولي أقول ماما ) . . قالتلي روح لدكتور مفاصل وعظام والحاجات دي , يا ستي سيبيني أكيد هخف دلوقتي , لأ روح . . المهم . . روحت , (بعد ما خدت منها تمن الكشف طبعا) . .

 قاعد قدام الدكتور لقيته بيضحك معرفش ليه و بيقوللي . . توء توء توء . . لا مفيش , ده روماتيزم . . نعم يا خويا !! . . لاحظ سيادتك إن عندي 25 سنة !! . . (وعالعموم إعمل أشعه و تعلالي) . . بجد مبحبش روح وتعلالي دي , بتنرفزني , عملتله الأشعه و جيت ( طبعا خدت تمنها برضو , مش عارف ليه بستخسر أدفع في الحاجات دي ) . . تاني . . توء توء توء . . لا ده بس شوية خشونة في العظم . . والله العظيم أنا غلطان إني جيتلك أصلا , خدت الورقه اللي فيها نعكشة الفراخ اللي بيقولوا عليها روشتة و مشيت . .

أقول يا ستي الأدوية معملتش حاجه و أنا كنت عارف , هقضيها كده و خلاص ( بقولها و أنا واقف متني مش قادر أفرد ضهري حتي ) , تقوللي روح لواحد تاني , ورحت والله . . و كانت النتيجه . . ياااااااه , لاااااا . . دي حاجه عبيطه خالص , خشونة ايه يا راجل و روماتيزم ايه انت لسه شباب (طبعا بعد ماقلتله اني كنت عند دكتور تاني قبله ) . . ده بس شوية إجهاد , جزيت علي سناني و خدت الورقه , جبت الأدويه و ببص عليها . . لقيتها كلها مضادات روماتيزم و مسكنات . . الناس دي بتشتغلنا يا جدعان !!!! . . . . رجعت البيت و أنا حالف معملش حاجه , أنا كنت عارف والله إن الدكاتره دول كلهم مالهومش لازمه , مش مصدقكوا , مش مقتنع بيكوا , مش مقتنع بالطب ده أساسا ولا عمره فادني في حاجه , مفيش مره تعبت فيها و خدت دوا و عمللي حاجه . . بخف لوحدي علي طول لما أصبر شوية . . طب ايه و دكاترة ايه . . مش مؤمن بيكو خالص . . شوية أفاقين و حلنجيه . . (يمكن عشان كده مبحبش أدفع فلوس في الحاجات دي)

المهم قاعد في أمان الله ( لأني مبعرفش أقف )  , إذ ببابا (و إسمحولي أقول بابا برضو) , بيقوللي أنا عايزك تروح لواحد و تقوله إدعيلي , والدي الله يخلليهولي بجد ده مثلي الأعلي , ونفسي أبقي في ربع إيمانه وتقواه , وعندي كلام كتير عنه لو حكيته محدش هيصدقني فا مش هحكيه ( أنا حر يا عم !! ) . .

المهم فين يا بابا الراجل ده . . قاللي في العريش !!! . . . طبعا أول سؤال المفروض أسأله , عرفته منين ده ؟؟ . . قاللي أنا كنت رحتله مره زماااااااااان قوي و كان عنده ساعتها 108 سنه !!! . . نعم !! . . أمال دلوقتي كام !! . . قاللي مش عارف بقي روح شوفه . . قلتله طيب . . . قاللي خد أخوك و روح بالعربيه , قلتله ماشي , قاللي تكون عنده تسعه الصبح عشان تلاقيه . . خلاص يا سيدي !! . . المهم الاقيه لسه عايش أصلا !! . .

طبعا أنا و أخويا بنحب المغامرات جدا , و بنحب بابا أكيد , فا روحنا , و خدنا معانا واحد صاحبنا , مبيحبش المغامرات , و بيحب باباه هو . . (وبعربيته طبعا , هع) . . مش عارف هي المسافه كام كيلو بس الطريق خد حوالي 3 ساعات , يعني قولو 300 كيلو مثلا , مش بعربيتنا الحمدلله , وصلنا العريش و أنا اللي سايق طول الطريق طبعا علشان يعاقبوني ولا كأن ضهري تعبان , و هناك إكتشفت إن لسه 50 كيلو كمان علشان مكان الراجل . . ياااااااه ده أنا خفيت , مش ممكن , يللا نرجع بقي . .  طبعا لا حياة لمن تنادي , هنروح يعني هنروح مش بعد ما وصلنا , فضلنا ماشيين نسأل و نتوه , نسأل و نتصل ببابا , نسأل و جبنا واحد صاحب اخويا ساكن هناك يدلنا (محدش يسألني يعرفوا منين ده ) , ووصلنا أخيرا لحته صحراااااااااااااا . . قلتلهم أدخل , قالولي أدخل . . بجد أول مره أشوف رمال متحركه , و أول مره أعجب بالعربيه اللي إسمها شيفروليه أوبترا دي , و أصدق مني زكي و أحمد حلمي , بجد الواد دعي علينا دعا من اللي حصل لعربيته . . وصلنا أخيرا بعد نص ساعه رمله لمكان فيه ناس . . خيمه صغيره و جنبها شوية غنم و عيل صغير و ست , إتجننا فعقلنا و سألنا الست . . الحمدلله مطلعش حد يضربنا بالنار و قالتلنا إن الراجل في حته تانيه خالص . . حته كلهااااااااااااا  . . أسفلت . . مافيهاش رمله خالص . . حسيت إني سامعه بيشتم فيا و فضهري . .

وصلنا أخيرا الحمدلله لجامع وسط الصحرا بس جنب الطريق الأسفلت علي طول , نزلنا فعلا و إتمشينا لغاية ما لقينا راجل نايم , هو ده , لأ مش هو , هو ده , لأ مش هو . . صاحبنا نط عليه . . و قاله إنت الشيخ سالمان يا ريس !!! . . قربت بوشي و قعدت أدقق في ملامح الراجل اللي فعلا شكله عنده بتاع 130 سنه مستريح . . إيه ده !! . . حاسب ياعم والنبي محدش يلمسه لحسن نلبس تهمه . . الراجل بصراحه كان هادي قوي و بشوش . . آه بشوش , قعدنا معاه و فضل باصصلنا و إحنا ساكتين مش عارفين نقول إيه , قطع هو الصمت و راح قايل نورتوني نورتوني , وراح ناتش إيد صاحب أخويا و قعد يقوله كلام غريب وبسرعه جدا , إهدي يا عم شوية ما أنا مش جاي كل ده و بعدين تطلع بتتكلم هندي , طبعا فهمت لوحدي إن دي لهجه عرايشي و ده أخره في الترجمه , إفهم إنت بقي و ربنا معاك , المهم مسك إيدينا كده واحد واحد و قال لكل واحد كلام , (محدش يسألني قال إيه لكل واحد , أنا فهمت كلامه ليا أنا بالعافيه ) , تقريبا كده قاللي صلي ركعتين و إدعي ربنا يبعد عنك شر بني الإنسان . . كلام عادي جدا !! . . مفهمتش , بس أنا أصلا مكنتش متوقع حاجه يعني , مشينا و إحنا بنضحك بصراحه إن إحنا مفهمناش ولا كلمه و إن  العربيه إتفحتت و البنزين راح (اللي صاحبنا حطو) عالفاضي  , بس قشطه يعني . . إتفسحنا . . (ومعملتش اللي قاللي عليه برضو) . . 

تاني يوم . . الكلام ده كان يوم جمعه , في رمضان , نمت بعديها بالليل و صحيت علي الفطار , بقوم من السرير و مستني الوجع الرهيب و متوقعه أول ما أبدأ أفرد ضهري , و بفرده أهو و . . . ولا حاجه , مفيش وجع خالص !! . . والله قعدت أتنطط في الأوضه . . وبرضو ولا حاجه . .  معرفش بقي . . هل المشوار ده هو السبب , ولا الأدوية جابت نتيجه أخيرا , ولا الراحه من المجهود , ولا هو الوجع خد وقته و راح زي أي دور برد مثلا . . الله أعلم !!

بس أنا فيه حاجه بابا قالهالي . . لأ حاجتين . . الراجل ده أيام ما إسرائيل دخلت سينا و وصلت للمكان اللي هو قاعد فيه , كل الناس هربوا إلا هو , فا مسكوه و حبسوه في أوضه مقفوله , وكل يوم ييجوا يلاقوه بره الأوضه , يحطوه تاني , ييجوا تاني يوم يلاقوه بره الأوضه . .

الحاجه التانيه إنهم لما جم يبنوا جامعة سينا ظهر و قالهم أحفروا هنا هتلاقوا بير مياه عزبه , في وسط الجامعه , (مع العلم إن سينا مافيهاش مياه عزبة في الحنفيات) وفعلا حصل . . برضو . . الله أعلم !!

19 التعليقات:

شريف القاضى يقول...

تصدق انى عندى مشكلة فى ظهرى من اول رمضان ...يارتنى جيت معاك للشيخ سالمان ...انا باخد الادوية وخلصتها , ولسه الوجع مستمر ..ما تدينى العنوان اروحله ...شكله راجل بركة , ولعلمك ربنا بيدى ناس بركة خاصة بشرط التقوى وعمل الخير..وواضح ان الراجل ده منهم ...
الف سلامة عليك وعليا ..ادعيلى بالشفا يمكن احصلك ...

FAW يقول...

الله يسلمك يا سيادة القاضي . .
بص . . المشكله إن الشخص اللي كان معانا من هناك قال لنا إن الراجل ده أصلا مبيقعدش فمكان واحد كتير , يعني غريبه أصلا إن إنتو عرفتو تلاقوه . . بس عامة هو بعد مطار العريش علي طول علي اليمين , ممكن تروح و تسأل , هو مشهور جدا ( الناس هناك كلهم رعويين يعني قاعدين في الصحرا كده في خيام مفيش بيوت )
و ألف سلامه عليك إنت كمان و ربنا يشفيك إن شاء الله . .

آخر أيام الخريف يقول...

كان فينه سلمان ده لما كانت رقبتى وجعانى ؟؟؟ :((((

FAW يقول...

آخر أيام الخريف
هو أنا قلبت عليكوا المواجع ولا إيه !!

آخر أيام الخريف يقول...

لأ انت قلبت الروماتيزم و انت الصادق :)))))))))))))))

FAW يقول...

لا ألف سلامه . .
فين أيام السمنه البلدي مكنش الناس فرافير زي الجيل المنيل بتاعنا ده !!!!

آخر أيام الخريف يقول...

شنطة المدرسة + التلوث + التوتر .... مرض العصر

FAW يقول...

نسيتي أهم حاجه . .
الكمبيوتر اللي بقالنا سنين قاعدين و مأتبين قدامه ده D:

آخر أيام الخريف يقول...

صح :)))

ساسو يقول...

يااااه الشيخ دا كنز بجد
صعب وجوده
يارتني عرفاه
عارف الجيل بتاعنا دلوقتي جيل العشرنات
ربنا معانا
بقي كله مكسر وحالته حاله
وطبعا الحمد لله

بس بجد الف مليون سلامه عليك
وربنا يبعد عنك المرض

FAW يقول...

ساسو
فعلا عنك حق
الله يسلمك وشكرا علي المرور . .

MR.PRESIDENT يقول...

واجب اختياري لو مكنتوش حلتوه وأنا غيرت فيه سؤال
لمعرفة إطلاعتكم فلو عايزين تحلو خير وبركه ، ولو مش عايزين متقلقوش الواجب مش هيتحط في أعمال السنة .
ما هي كتب الطفولة التي بقيت عالقة في ذاكرتك؟
مَنْ أهم الكتاب الذين قرأتَ لهم ؟
من هم الكتاب الذين قررت ألا تقرأ لهم مجددا؟
في صحراء قاحلة ، أي الكتب تحمل معك؟
ما هو الكاتب الذي لم تقرأ له أبدا ، وتتمنى قراءة كتبه ؟
ما هي قائمة كتبك المفضلة ؟
ما هي الكتب التي تقرؤها الآن ؟
اللي بعت الدعوه ؟
أرسل الدعوة لمدون واحد علي الأقل من أجل مشاركتنا باطلاعهم في القراءة ؟

حَـبآيـۃْ.بـטּـدۉڷ يقول...

مصـورتش الراجل ليه ؟

بجد 130 سنه عايش !! .. ماشاء الله ماشاء الله ..

عـآرف راجل زي كده لو جه يعيش في مدينه زي القاهره مثلا مش هيكمل 3 ساعات حي فـي ميدان التحرير :D

الناس دي عندها راحة بال وتأمل وراحه نفسيه قبل الجسديه كمان .. :)

بس غريبه حكاية الحرب دي !!
سبحـآن الله ..

Tears يقول...

حمد لله على سلامتك اولا

انت اصلا كنت بدأت تخف من الادوية و الدليل انك استحملت الرحلة الشاقة جدا دى

FAW يقول...

حباية بانادول
معلش بقي أنا قررت ماشيلش موبايلات بكاميرا تاني
علي فكرة 130 ده رقم تقريبي ممكن يكون أكتر الناس دي محدش يعرف عنها حاجه

FAW يقول...

tears
لأ والله صدقيني الأدوية ماجابتش نتيجه خالص بس هي كانت مسكنات فده كان بيخلليني أستحمل شويه . .

Noha Saleh يقول...

فى ناس كتير فعلا سبحان الله بيكون فيهم حاجة كده زى بركة
والله لو الراجل ده قريب او فى القاهرة كنت تلاقى عنده زحة كتير وكلهم ناس من سننا كده عشرينات يعنى
الف سلامة عليك

FAW يقول...

noha
لو الراجل ده في القاهره كان مات و هو قدنا في العشرينات
الله يسلمك
نورتي . .

علاء المصرى كل يوم يقول...

السلام عليكم
مشكورا مجهودك

ألا طالعت قصيدة الرد على حرق القرأن

على http://elmsryklyom.blogspot.com/

دعوة للأطلاع