الأحد، 29 أغسطس 2010

أنا المعلم رشدان




كلارك كينت -  بروس واين – بيتر باركر . .

حبايبي من زمان قوي . . ومقدرش أعيش من غيرهم

طبعا للي ميعرفش , دي الأسماء السريه للرجاله . . سوبرمان – باتمان – سبايدرمان , بالترتيب كده . .  

طول عمري بعشق أفلام الخيال وبتجنن لما بتفرج عليها , الـ(فانتازي) والـ(ساينس فيكشن) , وخصوصا أفلام الأبطال الخارقين , وعندي طبعا مجموعة قصص من زمان عن كل الأبطال دول , و مستحيل هفرط فيهم , كنت دايما لما بتفرج علي أي فيلم خيالي عامة , أول ما أخلصه . . أقعد بقي أراجع في كل مشاهده واحد واحد في دماغي , وطبعا بنسي البطل ده خالص , ببقي أنا البطل . . طبعا من أول الأفلام الهندي اللي بعتبرها خيال علمي , إتخيلت نفسي أميتاب بتشان في كل أفلامه , و كنت أقعد أتخانق مع أخويا و إبن عمي و إحنا صغيرين وكل واحد فينا يبقي البطل اللي هو بيحبه , بس الغريب إني في فتره من الفترات كنت بلعب معاهم و كان واحد فيهم جاكي شان و التاني أميتاب بتشان وأنا مصمم . . إني الشيخ الشعراوي . . معرفش ليه !!! , بعد كده بدأت أتفرج علي أفلام تانيه خالص , (ذا ماسك) مثلا , بجد بعشق الفيلم ده و بعشق جيم كاري أصلا , كنت فعلا بحلم و أنا نايم بالكلام ده , كنت أهبل قوي , و حتي و أنا صاحي أقعد كده سرحان مع نفسي أتخيل نفسي بجري بسرعه و بطلع من جيوبي أسلحه و مدافع و عربيات نقل حتي , وفيه واحده بتحبني , بس طبعا كنت بتخيل الكلام ده في البيئه المحيطه بيا , يعني أتخيل إني بقيت كده و أهلي و صحابي مذبهلين , و طبعا الواد اللي كان بيضايقني في المدرسه بمسكوا أفرموا , و البنت اللي هموت عليها تحبني و تلزق لي ( وهي أصلا متعرفش عني حاجه ) , وكده يعني . . شفت بعد كده بات مان بجميع أجزاءه , طبعا إتعلمت السواقه في خيالي و نزلت ألف بعربية بات مان في الحته عندنا و رحت بيها المدرسه و أخدت (نفس البنت) معايا لفة و قالتلي بموت فيك يا مصطفي يا مظبطني , وطبعا مسكت حراميه بالهبل و الناس كلها شكرتني . . بس مليش أعداء بقي زي بات مان الحقيقي علشان مش عايز وجع دماغ  . . شفت كمان سوبر مان و ده طبعا جابلي أكبر هسس في دماغي , طبعا كنت مقضيها طيران رايح جاي من المدرسه و الدروس , و عندي قوة خارقه ممكن أكسر دماغ أي حد , و أولهم الواد اللي كان مضايقني ده . . وطبعا باخد البنت اللي بحبها في حضني و نطير سوا ( بنت تانيه بقي منا كنت كبرت شوية) , وطبعا أهم حاجه . . عندي نظر خارق و بشوف من خلال الحيطه والدولاب والعربيه و . . الهدوم (مراهق قليل الأدب صحيح) , بعد كده جه دور سبايدر مان , وهمني موضوع الخيوط بتاعته دي اللي بيتشعلق فيها , طبعا قعدت أتشعلق بخيالي في كل عمارات حتتنا , وآخد البنت (أي بنت بقي و خلاص) في حضني و نتشعلق سوا . . يا سلام , كانت أيام والله أيام الشعلقه دي , طبعا أنا كنت بتقمص الدور قوي و بتخيل إن أنا دلوقتي متنكر في شخصيتي السرية (زي أي بطل خارق محترم) , ومش لازم حد يعرف . . عجبني قوي فيلم الحاسه السابعه بتاع أحمد الفيشاوي , فكرني بفيلم (وات وومان وونت) بتاع ميل جيبسون , بس هو كان بيسمع أفكار الستات بس , يعرف بقي مين معجبه بيه و مين مبتقبلوش و كده . . طبعا في لحظه بقيت بسمع الأفكار , و بقيت طول منا ماشي في الشارع عمال أبص للناس و كل مالاقي حد باصصلي , أألف حوار في ثانيه , و أقنع نفسي أنه بيقول كده , وطبعا في لحظه برضو بقت كل البنات بتموت فيا , بس للأسف أخلاقهم منعاهم أنهم يصرحوا بحبهم ليا . . هه . . يللا , طبعا ده غير إني ساعات يبقي عندي قوة سلاحف الننجا (بس من غير مابقي سلحف يعني) , أو أتخيل إني حاطط في درج الكومودينو اللي جنب سريري , البتاعة المدوره اللي بمسكها و أقول شوية كلام إنجليزي كده (إتس مورفن تايم) , و أبقي المغامر الأخضر أحسن واحد في الباور رينجرز , وطبعا بابا ميعرفش إني مخبي الميجازورد تحت عربيته في الجراج . . الحمدلله إني كبرت و عقلت . .  كل ده كوم بقي وفيلم إيدي ميرفي كوم تاني , مش فاكر كان إسمه إيه بس قصته بتحكي إنه كان ماشي في الشارع ووقع عليه نيزك خلاه عنده قوه خارقه , طبعا أنا مستنيتش , طول مانا ماشي عمال أدور علي نيازك , و أقول إمتي يارب بقي يقع عليا نيزك , لدرجة إني مره سألت واحد صاحبي قلتله هو مفيش نيازك بتقع هنا , قاللي يا أهبل . . مفيش نيازك في مصر . . النيازك في أمريكا بس . .  

19 التعليقات:

آخر أيام الخريف يقول...

عندك حس ساخر رهيب يا مصطفى ما شاء الله :)))

FAW يقول...

آخر أيام الخريف
ميرسي يا فندم ده بس من ذوقك
نورتيني . .

Antika يقول...

"طبعا في لحظه بقيت بسمع الأفكار , و بقيت طول منا ماشي في الشارع عمال أبص للناس و كل مالاقي حد باصصلي , أألف حوار في ثانيه , و أقنع نفسي أنه بيقول كده"

ممتعة جدا الحركة دى !! :D

كمان شدتنى الصورة اوى
العين بس ماظبطتتش معاك شوية
بس ف المجمل وهمى طبعا بالنسبة لمعقدة بورتريهات ! xD

totahabib يقول...

ههههههههه
ايه اللسعان ده بس
ده مش انا لوحدى بقى اللى طلعت كده
بس انت كبرت وعقلت وانا لسه ^^

FAW يقول...

antika . .
كويس إنك شايفه كده مش العكس D:
بالنسبة للصوره أدينا بنحاول أنا أصلا تخصصي عربيات . . D:
شكرا لمرورك . .

FAW يقول...

tota7abib
لااااا
ده إحنا كتير قوي
متخافيش إنتي مش لوحدك . . D:
مين قال إني عقلت . . مكنتش كتبت البوست ده , ولا إيه !!

ساسو يقول...

بجد عجبتني موت حكايتك الممتعه دي
واكتر حاجه عجباني
سماع افكار الناس
لأ لأ انا محتاجاك تسمعلي افكار ناس مجنناني ههههه
بس بجد دمك زي العسل

اقصوصه يقول...

رمضان كريم

وكل عام وانتم بخير :)

FAW يقول...

ساسو
شرفتيني
إنتي تأمري
وعندي كمان طاقية الإخفاء لو عايزه تزوغي من حته أو من حد . .

FAW يقول...

أقصوصه
أنا مش فاهمك
ماهو يا إما إنتي كمبيوتر مش (هيومان) زينا يا إما بتشتغليني
نفس الرد بتاع البوست اللي فات بالحرف !!!!

ساسو يقول...

خلاص قوللي جايبها منين الطاقيه العجيبه دي
نفسي مووووت القاها ملك ايدي
ياااااااه انا هعمل بيها عمايل

مستنيه طاقيه الاخفاء
ولا هترجع في كلامك

FAW يقول...

ساسو !!
إيه ده ؟
إنتي شايفاني ؟؟؟

ساسو يقول...

ليه

FAW يقول...

وسمعاني كمان !!!
هي الطاقية عطلت ولا إيه ؟؟

Noha Saleh يقول...

مدونتك حلوة جدا على فكرة
والبوست ده دمه خفيف اوى

ساسو يقول...

هههههه
علي اساس انك بعتهالي أوام كده

FAW يقول...

noha . .
ميرسي جدا
إتفضلي . .

ميلودى سبورت يقول...

اول مره بس مدونه زى العسل

FAW يقول...

admin
شكرا
يارب متبقاش آخر مره