الاثنين، 2 أغسطس، 2010

منــك لله يــا ســبكي


ليه بنحب نهين نفسنا ؟؟؟ . . ولا فيه ناس هي اللي بتحب تهيننا ؟؟؟ . . أول مره أبقي قاعد مكسوف من نفسي و خايف أتكلم لا حد يعرف إن أنا مصري !! . . إحساس غريب قوي . . .

أول إمبارح جتلي حالة كرم نادره و قررت أعزم أختي علي السينما , بس الكرم هنا مش المقصود بيه الفلوس , إنما الموضوع نفسه , المهم . . رحنا سينما نايل سيتي علي الكورنيش (أقرب سينما كان فيها الفيلم ) , و لولا إن كرامتي بتحرقني قوي في المواقف دي , و لولا إني وعدتها , كنت رجعت فكلامي أول ما وقفت قدام شباك التذاكر و سألت علي سعر التذكره !!! . . بس برضه ده خلاني ماتفاجأش لما لقيت إن تقريبا مكنش فيه مصريين غيرنا , المهم إشتريت التذاكر زي الـ (.....) وقلنا نتمشي شويه في المول اللي فيه السينما , مش تعصب والله بس بجد أنا بتجنن من العرب اللي بييجوا مصر , يمكن مش كلهم بس الأغلبيه , ليه بيلبسوا حاجات غريبه كده ؟؟ . . و تسريحات شعرهم اللي من الفضاء دي بتخلليهم شبه الإخوه ( الإيمو ) , ليه كده !! . . المهم , الوقت عدي بسرعه و دخلنا القاعه , فعلا مفيش مصريين !! . . دقايق و إبتدي العرض , إعلان فيلم أجنبي مش فاكر إسمه . . وبعديه . . الكارثه . . إيه ده !!! , إيه الشئ ده , لوجو كبيـــــر بإسم الفيلم , ( ولاد البلد ) !! . . . إسم يحسسك بالأصاله و العراقه , ومليان بالسفاله و الصفاقه , إبتدي الفيلم بوصلة رقص شرقي من النوع المعتبر , من الكائن اللزج اللي إسمه (سعد الصغير) , وطبعا علي أنغام صوته الجميل إتفننت الأخت ديــنا في الرقص الشرقي الأصيل اللي هو عباره عن هز مثير للغرائز , بس كل ده ولا هز فيا شعره , عادي . . اللي جنني بقي إن أنا عمال مستغرب قوي من حال العرب وعمال أنتقد فيهم , وجه الأخ (سبكي) وراح راذعني جردل ميه ساقعه فوقني صح , إبتدي الفنان سعد بيه الصغير يغني ويقول ( إحنا ولاد البلد ) . . وعلي أنغام الأغنيه دي اللي المفروض من إسمها إنه واحد مصري فخور ببلده , قعد سيادته يرقص و يتلوي ولا أجدعها لا مؤاخذه , ده طبعا غير لقطات سريعه و متتاليه لكل رقاصات مصر تقريبا وعلي رأسهم الفاضله دينا , وكأن لسان حاله بيقول إن هما دول ولاد البلد دي , لأ و ليه لسان حاله , ما هو فعلا بيقول كده , يانهار إسود . . بجد إتكسفت من نفسي جدا و كنت عاوز أحط دماغي في الأرض زي النعامه , ليهم حق العرب يعايرونا بليلي علوي و ناديه الجندي و دينا الرقاصه , طب ما إذا كان إحنا فعلا معترفين أهو إن (( دول )) هما (مصر) , هما (ولاد البلد) , منك لله ياللي فبالي , بجد إتقهرت بطريقه فظيعه , وحسيت إن الناس كلها عماله تضحك علينا , كأنهم عارفين إن إحنا بس المصريين هنا , قعدت أبص حوليا و أشوف ضحكهم و همساتهم لبعضهم علي أنغام الاغنيه الوطنيه الملعونه دي , حسيت قد إيه المستوي الهابط اللي إحنا وصلنا ليه , يمكن يكون الهابطين دول قلة , بس للأسف كلمتهم بتوصل و بتبان إنها معبره عن الكل , خلوني إتمنيت إن الإعلام و السينما المصريه مكانوش يبقوا بالقوة دي في العالم العربي  , الله يلعن الإعلام السئ المسئ لمصر , إنتهت الأغنيه أخيرا وبدأت أطلع في الكرسي و آخد نفسي , لأ . . بجد مش متخيل . . إيه الهبل اللي بيحصل ده , بقالنا شهور عايزين نخلص من الموضوع ده , و سيادتك برضو مصمم عليه , لقطة في آخر الإعلان . . وصلة طويله من تلات دقايق تقريبا , وأمام المشاهدين من العالم العربي كله , واحد مسطول ماسك واحد تاني شكله ( سوداني ) و ماسح بيه الأرض علشان سابنا نتضرب في أم درمان يوم ماتش الجزائر , ليه كده !!! . . . هه , يللا . . ( أحمد مكي ) كان جامد قوي علي فكره . . 

5 التعليقات:

Lady E يقول...

هههههههههه يا نهار أبيض حد يدخل الفيلم ده سينما ده اعلانه بس مستفز ومقرف

بالنسبة للاخوة العرب فحدث ولا حرج اللي بيعملوا فيها اجانب بيبقى شكلهم وحش جدا من كام يوم شوفت واحد لابس لبس وعامل شعره بطريقة اعتقد انه مش فاهم ان ده الاستايل بتاع الشواذ !

بشترك معاك في الدعاء على السبكي في الفيلم ده وكذا فيلم تانيين

FAW يقول...

lady E
شكلك فهمتيني غلط
ده كان (إعلان) الفيلم
أنا مستحيل أشوف الفيلم ده ولا سينما ولا غيره , أنا كنت داخل لا تراجع ولا إستسلام زي ما قلت في الآخر بس ده كان من ضمن الإعلانات اللي قبل الفيلم
بس يا ستي . .

Antika يقول...

هاقولك زى ماتقالنا ايام ماعترضنا على فيلم (بالالوان الطبيعية)

"ماتحكمش عالفيلم من اعلانه .. خش الفيلم الاول وركز فيه كدة .. بعدين قول رأيك"

ايوة .. ده استفزاز فعلا
يتحرق دمى لوحدى يعنى ..!
xD

FAW يقول...

هو إنتي شفتيه ولا إيه ؟؟
ليه تظلمي نفسك كده !!!

Antika يقول...

اكيد لا يعنى !!
فهمتنى غلط

كان قصدى ان اعلانات افلام كتير بتكون سيئة جدا ومع ذلك بتلاقى ناس تقولك ماتحكمش غير لما تشوف الفيلم وكدة