الأحد، 1 أغسطس 2010

مــقدمه متــأخره



(( كلام كان لازم يتقال ))

زمان قالولي إنت بتكتب حلو , و قالولي كمان بترسم حلو , مش عارف . . بس أنا كنت بحاول , كنت بحب قوي أتريق علي كل حاجه , أغير في كلام الأغاني وأخليه تهريج بس بالقافيه برضو , أغير في كلام الإعلانات و المسلسلات وأعمل حوارات من دماغي و أكتبها  قالولي برضو إنها مسخرة . . . بس نسيت الكلام ده دلوقتي خالص . . أما الرسم , رغم مستوايا اللي بيقولوا إنه كويس قوي , بس أنا شايف إني لو كنت إهتميت أكتر كان زماني بقيت أحسن بمراحل . أنا برضو بطلت رسم من سنين , ورجعت تاني قريب , كمان رجعت أكتب , فجأه كده مش عارف ليه !! . . . و حسيت إني عايز أرسم طول الوقت , رسمت إتنين صحابي , ورسمت أخويا , ورسمت بتاع عشر ممثلين . . أنا أصلا مكنتش برسم بروفايلات بس رسمت , وكتبت شوية حاجات جت في دماغي فجأه , وفجأه كده برضو حسيت إن ده هدفي في الحياه , إني أكتب , وعرفت إني عشان أكتب لازم أقرا . أنا كنت بقرا كتير زمان بس بطلت , بس ناوي أرجع تاني إن شاء الله ,  لما والدتي شافت اللي كتبته وحطيته علي الفيس بوك  قالتلي ما تعمل مدونه , بما إنها مطلعه علي الحاجات دي , وعملتها , والموضوع شدني جدا بصراحه وحسيت إنه بيريحني نفسيا قوي , و لقيت ناس كويسه قوي كاتبه حاجات حلوه قوي ( إنتو آه ) , قريت كتير جدا ( رغم إن محدش قرا اللي أنا كتبته ) , بس تقريبا مبقتش قادر أبطل , رغم إن ده عطلني عن مشروع بدأت فيه من كام شهر , قصه واقعيه كده بكتبها , يارب تكمل . . . بس أنا قعدت مع نفسي وفكرت , أنا ناوي أعمل إيه . .  يعني عشان رغبتي الدفينه دي فإني أبقي كاتب , وبعد فحص و تمحيص و دراسه , إكتشفت إن الموضوع صعب قوي وكله مواجهات , و أول سؤال هتسأله من أي حد منكو . . بأمارة إيه نقرا كلامك ده يعني , وتطلع مين إنت يعني عشان تقول رأيك فأي حاجه أصلا . . المهم , أنا قررت اسمع كلامكو من قبل ماتقولوه وأفكر كويس فالموضوع , يعني بما إن الناس طبيعي إنها ماتخدش برأي حد غير لما يكون واحد دارس أو واحد خبرة , ويفضل الخبره تحقيقا لمبدأ إسأل مجرب و متسألش طبيب , والخبره دي يعني لما أكتب فموضوع أكون حاسس بيه فعلا مش مجرد سمعت عنه !! . . يعني أبقي إنسان معاصر لكل الأحداث الحلوه والوحشه , يعني أبقي إنسان شقيان , وبما إني أصلا – نسبيا – الحمدلله يعني – مش شقيان قوي – الله أكبر , فأنا قررت أمسك الطريق من الإتجاه التاني في الأول , أو في رأيي أمسكه من أوله , وعشان أنا مش ناوي أكتفي بالكتابه هنا إن شاء الله , فأنا قررت أدرس . . . وبما إني معايا ورقه ملهاش أي لازمه إسمها  ليسانس حقوق  ومعرفش أنا خدتها إزاي أصلا !! . . فأنا قررت أتكل علي الله و أحضر دراسات عليا في الإعلام , وبس . . ولغاية ما أخلص بقي إن شاء الله , هحااااااااااول جاهدا . . إني أشقي شويه . . إدعو لي .

5 التعليقات:

زهرة يقول...

فكر كويس انك تقرر تدرس من جديد شىء تكون حابه

والإعلام دراسة جميلة جدا وشيقه وبتمهد للشغل فى اكتر من مجال كلهم احسن من بعض

انا بدرس اعلام .. وشايفاه مستقبل محترم وناجح بس للى يقدر دة ..

ربنا معاك يا أستاذ مصطفى ويوفقك :)

FAW يقول...

زهره
منوره
متشكر جدا و ربنا يوفقنا كلنا , بس ( أستاذ ) دي تقيله شويه عليا , كفايه أرجوكي . . D:

The Queen يقول...

انت قلت انكلما رجعت تكتب ولما عملت مدونة علشان تكتب فيها حسيت انك مرتاح يبقى ده المطلوب مش لازم الناس تقرأ واحيانا الناس بتقرا بس مش بتفهم يبقى برضه ملهاش لازمة
اعمل اللي انت بتحبه بغض النظر عن ردفعل الناس والحلو بيفرض نفسه ولو بعد فترة
بالنسبة لموضوع دراسه الاعلام انا من اشد المؤيدين لان ده كان حلم عمري ومين عارف يمكن يتحقق في يوم من الايام
تحياتي لك

ساسو يقول...

مش مهم الناس تقرا كتاباتك
ممكن واحد يدخل يقرا بس ميقدرش اللي انت كاتبه
سيبك من كل دا
ومدام انت بترتاح في المدونه
يبقي اكتب كل اللي تحبه وحاسس بيه
واللي يدخل يقرا بجد هيكون شرف ليه هو مش لحد تاني
لأن بجد مدونتك جميله جدا

وفكرتك كتير حلوه
وربنا يوفقك
ويساعدك
واللي بتتمناه يتحقق

تقبل مروري

FAW يقول...

ده أنا إتشرفت بمرورك
شكرا جدا لذوقك يا ساسو