إئــتــلاف الإســتــخفــاف

كنت قاعد إمبارح بتفرج عالتليفزيون وبالتحديد برنامج العاشره مساءا , و بصراحه أنا أصلا مليش في السياسه قوي و مش دماغي بس مؤخرا بدأت أحس إني زي ما تقولوا كده أهبل و محتاج أفوق , بس بصراحه إمبارح لما فتحت التليفزيون فجأه في وسط البرنامج لفت نظري حاجه تجنن , أول ما بصيت كده خبطت في وشي صوره جميله قوي , صوره كلها جمال , صوره مكتوب تحتها ( جمال . . . مصر ) , حقيقي . . يا جمال مصر , وفي الصوره دي بقي قاعد الأستاذ الفاضل (جيمي) بطلته البهيه , بس بصراحه شكله كان مندهش قوي فالصوره , طبعا أنا إتشديت جدا وإندهشت برضو وقلت أتفرج . . المفاجأه بقي إن ده كان تصوير حي من الشارع , الشارع المصري آه . . وفي قلب القاهره , ناس ماشيه عماله تلزق في البوسترات دي بهبل . . قعدت أدعك في عنيا شويه , و خرجت مني ضحكة سخريه مقدرتش أمسكها , هي خلاص بقت رسمي كده , للدرجه دي مستهفقينا , ولا كأن الشعب ده موجود أصلا . . المهم , ركزت شويه كده عشان أسمع اللي بيتقال , لقيت الأخت المحترمه مني الشاذلي بتكلم واحد علي التليفون كده إسمه مجدي الكردي و اللي وصفته بـ ( المنسق العام للإئتلاف ) . . يعني إيه إئتلاف أصلا !!!! . . . طبعا الأخت المذيعه كان واضح جدا إنها في قمة الدهشه زيي بالظبط و لما قالتله إن اللي واضح للناس دلوقتي من الصور دي إن الموضوع متعلق بإنتخابات الرئاسه اللي جايه و إنت ده ترويج للسيد جمال مبارك عشان الناس تتقبل فكرة التوريث و إن ده صادر من الحزب الوطني , بس اللي رد و قاله الراجل ده إن الموضوع مالوش أي علاقه بالحزب الوطني أو بأي أحزاب تانيه , فقالتله المذيعه امال تبع مين إنتو يعني ؟؟ . . فالأخ ده قاللها إنه و مجموعه من الأشخاص قرروا يعملوا الموضوع ده و يأسسوا الإئتلاف ده لتجميع الأصوات لصالح السيد جمال مبارك , و عقب بكلمه جميله قوي وقال : ( وهل ليس من حق المواطن المصري جمال الدين محمد حسني السيد مبارك أن يرشح نفسه لإنتخابات الرئاسه ) !!!! . . . طبعا الاخت المذيعه متقدرش تتهور فالكلام زي منا كنت هتهور لما الأخ رد علي سؤالها (هل الموضوع ده بتنسيق مع السيد جمال و مع الحزب الوطني ؟) بإنه قالها إن الترشيح ده أل إيه . . مالوش أي علاقه بجمال مبارك ولا يعرف عنه أي حاجه !!! . . . يا عم إرحمونا بقي و بطلوا إستخفاف بعقولنا , ضغطت علي نفسي و قلت أكمل , سمعت مني الشاذلي بتقوله إن السيد جمال قال تمانين مره قبل كده إنه مش ناوي يرشح نفسه للرئاسه إطلاقا , انا قلت هتكبسه و تحرجه إنما إيه !! . . الراجل ده فنان والله , بسلامته راح منجعص و قايل لو كل الأحزاب بتخاطب فئه معينه مكونه من بضعة آلاف من الشعب فإحنا معنيين بسبعين مليون مواطن ( أنا فاكر إنهم كانوا تمانين !! ) و الإئتلاف ده إحنا بنعمله مش بناء علي رغبة السيد جمال , لأ . . ده علشان نقنعه !!!! . . ( نعم !!! ) . . لأ كده كتير والله , يعني سيادته مش عايز و إحنا اللي عايزين , ونفسنا نقنع سيادته , والنبي يا سيادته توافق . . وطبعا السيناريو واضح جدا , هيعملوا البتاع ده اللي إسمه إئتلاف و يهيجوا الدنيا و بعدين يناموا شويه , وبعدين يجيبوا واحد شكله مهم . . أو يقبضوا واحد مهم و يطلعوه فالجرايد يقول ( وبعد إجراء الإئتلاف الرسمي والإكتتاب و المناقصه و كل المصطلحات دي ثبت علميا إن 99.9 % من الشعب بيقول نعم ) , وطبعا أنا واحد من الشعب مقولتش حاجه بس مش هروح أسأل جاري اللي فالشقه اللي تحت ( إنت قلت نعم و لا لأ ياد ) , ولا هنزل الشارع أقول بصوت عالي ( اللي قال نعم يرفع إيده يا ولاد ) , المهم . . وبعد الكلمتين دول طبعا هيطلع سيادته و يمسك ورقه كده متشخبط فيها و يلقي خطابه و يقول ( أنا بجد مش مصدق , قد كده إنتوا بتحبوني؟؟ , لا يا جماعه أنا عشان خاطركوا بس قررت أبقي ريس . . هه , و أمري لله ) , بجد حرام اللي بيحصل فينا ده , يا جدعان طب عالأقل إحترموا عقولنا شويه , شويه صغيرين بس والله , و إعملوا اللي إنتوا عايزينوا بس من غير ما تشتغلونا كده . . يا سيدي إحنا موافقين والله , إحنا شعب غلبان عمرنا ما نطقنا , دلوقتي يعني اللي هننطق و هنتضايق لوعملتوا أي حاجه غصب عننا , يا عم قول إنك تبع الحزب الوطني و إن جيمي قاعد جنبك بيمليك , عادي يعني والله , إحنا شعب حبوب قوي أصلا , المهم واضح إن الأخت مني مقدرتش تكمل برضو و طلعت لفاصل , وأنا قمت حطيت بطاقتي الإنتخابيه فوق المخده و نمت